Gabala trip (Azerbaijan)

Sunset in Gabala

Gabala in the Evening

Gabala

من فتره طويله قررت اني اكتب عن الحاجات اللي البنات بتواجهها في السفر بشكل عام .. ولو كنتي عربيه بشكل خاص ..

بس الكسل .. وكراهه الارتباط بحاجه  لمده طويله هابقا مضطره اعملها ابديت واكتبها كل يوم او كل فتره محدده .. والكسل تاني .. منعوني من اني اعمل الموضوع ده .. بس بما اني خلاص هاسيب الشغل اللي انا فيه علي اخر السنه الدراسيه ان شاء الله فقلت لأ ماينفعش التجربه دي تروح سدي فلازم اوثقها ..

واديني هاوثقها ..

اولا: انا مصريه اسكندرانيه من محرم بك .. بس احنا عزلنا وحاليا ساكنين في الحضرة الجديدهللي مايعرفهاش منطقه شعيه مليئه بالمتحرشين ولاد البلد اللي كل واحد فيهم يتحرش بيكي عادي بس لو حد غيره ممكن يتصداله اشطه جدا!!

ثانيا : انا ككل بنت شرق اوسطيه اتربت في اسره متواضعة الحال .. كنت بحلم بالسفر تقريبا طول عمري لحد ما سافرت قطر بشتغل مدرسه انجليزي في مدرسه انترناشيونال ابتدائي وساعات مترجمه وبالعكس!

تفاصيل السفر للشغل كتير وهاتكلم عنها بعد كده بالتفصيل ..

بس الوضع لا يختلف كتير عن ظروف الشغل في مصر .. الدول العربيه عامة مش لطيفه اوي في قوانين العمل بتاعتها ونظام الكفاله اللي مايسمحلكش تنزل مصر زياره الا لما تاخد اذن الكفيل قبلها باسبوع عالاقل ويايوافق يا يقوللك الشغل محتاجك!!

مستوي المعيشه في بلد زي قطر مرتفع فشخ يعني لو جنابك بتقبض 10 ريال مثلا هاتجيب شقه ادميه ب4 وتاكل ومواصلاتك ب5 وده من غير خروجات وا هنكره ولا حشيشك ولا بيرتك فلو ليك في الحاجات دي يبقا تركن علي جنب ولو مالكش يبقا ممكن تحوشلك مبلغ مش بطال بس مش ربع مليون جنيه ولا حتا مية الف الا لو قرطت علي نفسك جدا .. او اتجوزت .. وده اللي بيعمله معظم الناس اللي عايشه هنا

فالحياة قاسيه علينا كلنا !

سافرت كذا دوله من اللي مش محتاجين فيزا للمصريين لان وجع الدماغ اقل بكتير من الدول اللي ليها فيزا ..

مكتوب كتابي علي رفيق الدرب .. والاب الروحي لكل الهبل اللي انا بتهبله في الحياه .. الاستاذ مارتن كريفين برضك مدرس ب كلاس تيتشر او كما يقول اخويا "مدرس كشكول" وثانوي انترناشيونال وبريتش برضك  وبالعكس

ومع انه خواجه كما احب تسميته .. الا اني لا مش معايا باسبور انجليزي ومش ممكن يبقا الا لو عشت في انجلترا لمده 5 سنين .. ولا مش هايحصل لاني حتا مش عارفه اخد فيزا زياره .. ولا.. حتا لو مرتبطه او مرتبط بواحد انجليزي مش هايدوك الفيزا الا لو عايزين يدوهالك!! فمش هانرغي كتير

فيه مميزات كتير لكون البنت تعيش لوحدها لفتره .. واه انا مؤمنه ان الاستقلال بالحياه واحب في فتره ما من حياة كل بني ادم قبل ما يتهبب يتجوز ..  

عن تجربه .. العيشه لوحدك مختلفه تماما عن العيشه مع اهلك حتا لو بترجع كل يوم وش الفجر .. الوحشه في بيت فاضي .. نفسك اللي انتي ملزمه تتعايشي معاها وتتقبليها لان معنديش خيارات تانيه .. مش كلها شكولاته في التلاجه وايس كريم في الفريزر ..

بس برضه مفيده جدا لروح اي انسان!!

عالعموم انا خلصت علي كده اللي عايز يسالني في حاجه يسال وانا هاجاوب المره الجايه .. ده اذا حد مهتم اصلا !!

السفر برا صعب بس مش مستحيل!