العفريت..........

الطرف التالت فات فات

وفي ديلة دستة اموات

.......

حاكم ومسيطر عالدولة

ومعاه مفاتيح الاقفال

طب ماله العسكر ماهو اولي؟

بلا ثورة بلا لعب عيال

................

بيقولك: ليه ايدي خفية

ونفوذة مساحة هكتار

في الضربة بيقتل بالميه

ولا حدش يدرالة قرار

الطرف التالت فات فات.. وفي ديلة دستة اموات

......

متوالس مع/ ضد الثورة

ولا تسأل امتي ولا ازاي

هو يولع واحنا نطفي ..

.ما يميز حودة علي بشاي

كراريس واجندات بالكيلو

مولوتوف ومؤمرات خارجية

يتمني الشعب يوطيلو

هيموت علي كلمة شرعية

الطرف التالت فات فات ..وفي ديلة دستة اموات

الطرف التالت نام يحلم

الحرية خلاص ستوب

واذا كان ع الثورة وشهدائها........

دول طلعوا اساسا فوتوشوب

ولا حد بيضرب في رصاص

ولا حد في دم اخوة لاص

ولا فيش غير ايدي مخفية

لامؤاخذة بتكشف عذرية

الطرف التالت فات فات ..وفي ديلة دستة اموات

الطرف التالت حرباية

يتلون حسب الاوقات

عايش في قصور غارقة في ضلمة

وفي رتبة كل البشوات

عايش في شريطة وفي النجمة

في السيف في النسر وفي الشكمة

تلاقوة في قلوب الاموات

للسلطة ينظم سباقات

الطرف التالت فات فات ..وفي ديلة دستة اموات

الطرف التالت جوانا ..

احنا عشيرتة وسندة واهلة

الطرف التالت هو احنا ...

بسكاتنا بقولة يستاهلوا

الطرف التالت عرانا وسحلنا شوارع وحارات

الطرف التالت زبلنا وهتكنا احياء علي اموات

الطرف التالت يبقي اهبل لو فاكر انه صحيح فات

ولا فات ولايمكن هايفوت وفي ديله كل دي اموات

الطرف التالت زاد زاد وفي ضلة.............. كلنا اموات......................

وصف مصر

كتاب وصف مصر النسخة الاصلية الوحيدة احترقت؟؟؟

سبحان الله

وكأن فعلا مصر اللتي نعيشها الان لم تعد تستحق ذلك الوصف...وصف الزمن

الذي كان فية المصريون يدافعون عن البلد ضد الاحتلال الفرنسي الخارجي

الزمن الذي كان فيه المصريون علي الغريب ..وليس علي بعضهم...

..ويقتلون المحتل ان تطاول و اهان ابنه بلدهم .. الزمن الذي فهمنا فيه تاريخنا لاول مرة ولم يعد مجرد نقوش علي احجار

وصف الزمن الذي ادركنا فيه ماذا يعني ان تكون مصريا وان يكون وطنك هو اول حضارة في تاريخ العالم....ان يعلم اجدادنا بعد موتهم العالم ماذا تعني كلمات مثل... قراءة وكتابة وحضارة ..وايمان ...وتوحيد....

وصف المكان الذي ...عجزت جميع جنسيات العالم عن تغيير طابعة ..او حتي اهانة كرامة اهلة...

وصف مصر ووصف حال مصر ..ايام كانت مصر... وطن ...وليست مجرد دولة

زمن لم يكن لدينا به جيش ولكن كانت الرجال متوافرة بكثرة

اعتقد انه فعلا قد حان الوقت ليصير لمصر وصفا جديدا

من واقع سا عة وربع انتخابات ...................

ز بعد نقاش طويل : لو مش بتحبوا ربنا مش هاتصوتوا للاخوان

انا وامي في نفس اللحظة: ليه كدة بس با حجة ايه اللي دخل الاخوان في ربنا بس ؟؟؟

السيدة : اصلكم ماتعرفوش دول اتعذبوا كتير ايام مبارك.... وباما سقطوا غي الانتخابات ظلم

انا :هو عشان تم استبعادهم من السلطة قبل كدة يبقي كفرت لو ما اديتلهمش صوتي؟؟؟طب انا ما صوتش للاخوان ولو عادوا الانتخابات تاني مش هاصوتلهم برضة....ابقي مش بحب ربنا عشان سياستهم مش عجباني؟؟؟

ليه كدة بس؟؟

امي العزيزة: وبعدين يا حجة انتي عايزة الاخوان وشايفة انهم

اصلح .. حد قاللك غيري صوتك؟؟............ماكل واحد حر في اللي ينتخبه... ليه ندخلي ربنا وتحكمي علينا اننا مش فاهمين او ايماننا ناقص لمجرد راي سياسي؟؟

السيدة : لا ياستي انتي بتحبية طبعا...

انا : يا حجة سواء بنحب ربنا او لا دة اساسا مش موضع نقاش بينا ولا من حقك تقولي بنحبة ولا لأ انتي هاتجاملينا؟؟؟

السيدة : انا مش قصدي والله حقكوا عليا

السيدة لأمي: هي دي بنتك؟؟؟

امي بابتسامة: اه يا حجة

السيدة ربنا يخليهالك

امي: قومي يا حجة الدنيا زحمة ادخلي قبلي

السيدة : بس مكانك يابنتي في الطابور

امي: يعني هي الدنيا هاتطير ادينا واقفين بنتسلي .. ادخلي ادخلي

.........................................................................

دين اهلي!!!!!!!!!!!!!!

لو انت شايف ان فيديوهات التعذيب بتاعت الجيش مع البلطجة المزعومين اللي شكلهم يدي علي بلطجية_ ماهي اصلها بقت بالشكل دلوقت_ شئ عادي وهما يستاهلوا والحاجات دي..

تقدر تقولي بقي اشكال الناس بتاعت يوم 9 يناير كانت ايه؟؟؟

ايه ؟اشكالهم مسيحين مش كدة؟؟؟ بيبان برضة؟؟؟

ولا يمكن شكلهم نصاري زي ما البعض بيحب يقول كأنها شتيمة؟؟؟

ولا تفضل يبقي شكلهم بلطجية؟؟؟

ولا الاحسن بقي واروش من دة ودة شكلهم مفرومين

اه اسفة..مصريين مفرومين

انا بقي ماليش دعوة شكلهم مسلمين ولا مسيحين ولا مجوس حتي..._دة ان كان الاخوة يدلوني بتتعرف الديانة من الشكل ازاي يعني_

انا اللي ليا فيه ان من حقي قلبي يتوجع لما الاقي بني ادمين من بلدي مفرومين وجماجمهم بقي انصاف جماجم علي ايد ناس ممكن يكونوا ساكنين في الشارع اللي وراهم... او اللي وراك انت علي فكرة...

بس لما نقول دوكها شكلهم بلطجية يبقي نستحمل وجع القلب من هنا للصبح ...

يبقي نستحق فعلا يجي حد بكرة يبيدنا مسيحي علي مسلم ويقول اصل شكلهم عرب!!!!!

انا مش بقول ان اللي حصل حصل عشان هم اقباط ....انا كل اللي بقولة ان اللي حصل حصل عشان هم مصريين وليهم حق وطالبوا بيه.

ليهم حق يتظاهروا

ليهم حق في البلد

وحق العبادة اللي لا انا ولا انت ولا الجن الازرق اللي هايجي يديهولهم النهاردة لان دة حق ربنا .._انا بتكلم عن ربنا بتاع الكل علي فكرة مش اللي ليه ناس ناس _ هو اللي اداهولنا بلا استثناءات ولا تفرقة.

ولو اللي بيتفرم في البلد دي المسيحين بس

يبقي كلنا مسيحين من زمان بقي لاننا لو رضينا وسكتنا تاني وقولنا ياريت يحكمنا عسكري...بكرة كلنا هانرجع نتفرم..تاني برضة

ولو اللي بيتشتم في البلد دي ويتهضم حقة ويتمنع من انشاء دور العبادة مسيحيين بس.. يبقي كلها يومين وكلنا نبقي مسيحيين نتمنع من الصلاه بمختلف ادياننا ...لو طنشنا وقلنا وهما ايه اللي نزلهم يوم الحد؟؟؟؟

اللي نزلهم بالمناسبة _لو انت مش عارف _هو اللي نزل المدرسين والاطباء ومشايخ الازهر..

ببساطة شديدة الحق في النزول.. ببساطة اشد الحق في الحياه ..والاهم الحق في البلد دي

...انا الاحساس الغالب عندي حالا هو الحيرة؟؟؟حاسة اني تايهة مش عارفة احزن ولا اتفاجئ ولا اتصدم ولا اغضب... ازاي اقول للناس ماتهاجروش وانا قرفت من كل اللي فيها بما فيهم نفسي؟؟؟؟

بس خلوني اتكلم عن شوية مسيحين تانيين_ اقلية علي رأي احدي صديقاتي_

مصريين برضك بس دول كان ليهم اسم " اصحاب العظمة الزرقاء " واسمهم كان كدة عشان كانوا بيلبوا سلاسل حديد تقيلة جدا وهم ماشيين في الشارع _مش عياقة زي فيفتي سينت يعني_ ...بس الرومان كانوا بيجبروهم يلبسوها مش عشان هما وثنيين لا عشان يفرقوا المسيحيين عن ديانة تانية خالص

بس عشان المسيحيين المصريين يتعرفوا عن المسيحيين الرومان لانهم اقل منهم طبعا!!!!!!

خلوني اقول ببساطة مرادي من دة كله... بصراحة اه...ااااااااااااه

مصر فيها تفرقة ....وفيها عنصرية ....وفيها كل دة ....التمييز ضد المسيحين من مسلمين مش فاهمين ...........و ضد الشعب من نظام كامل طمعان وفاكر في القبة شيخ...او حتي قسيس _وسواء كنت مسيحي او مسلم هاتطلع مله اللي خلفوك ان اجلا او عاجلا _

وما هي الا مسأله وقت وتلاقي نفسك/ابنك/ زوجتك/ اي حد من ام عيلتك ....هو اللي مرمي في الصورة علي الارض ورجلة ورا رقبتة لانة بقي مخلي لما المدرعة دهستة....!!!!!!!!!!!!!!!!!

كلنا هانتحول لوجبات تندر سريعة... وبعد مانتاكل اللي مايتسموا هايسلكوا سنانهم ويبصوا في المراية ويقولوا...كماااااااااان..

ولما عصام شرف يوجه خطااااااب للامة ويتمخض الجبل فينجب مش فأرا دة حمله طلع كاذب اساسا ...يبقي ليهم حق يشوطوا فينا ويبقي بكرة لو اتقبض عليا في الشارع واتسحبت عشان شكلي يدي علي بلطجية....

او حد اتعرض لي في الشارع لمجرد اني بشعري ...يبق مازعلش ولا اتنيل علي عين اهلي ولا اعيط ولا اسيب البلد واروح السعودية بقي ولا حتي تركيا....

ولو حد تاني قاللي انه عايز يهاجر انا هارقع بالصوت ....

مش هانسيبهالهم يبرطعوا فيها ...لما انت تمشي عشان مسيحي ...وانا امشي عشان مسلمة ...تبقي المشكلة مش في الدين ...المشكلة في اللي ماعندهمش ريحة الدين...

السؤال هنا بقي هو ليه احنا كشعب مابنصدق نشبط في بعض؟؟؟؟ نفرح في بعض ؟؟؟ ليه لسه بلاقي حد يقول ...ياعم دول نصاري ؟؟؟او يا عم دول مسلمين؟؟؟؟

علي العموم انا مازلت علي موقفي بان كل اللي بيحصل دة طبيعي_اللغط يعني مش القتل عشان محدش يقلش بس_ الناس ماكانتش قاعدة 18 يوم في الميادين تلعب جولف !!!

دي كانت ثورة ودة اقل واجب بعد اي ثورة محترمة....

بس بقي اللعب اللي بيحصل والتدويخ وحاوريني ياكيكة بتاع ضربونا يابيه....واحنا قاعدين.....واحنا غلابة ومانفهمش يابية...وكنا بنحرسهم واه يا عيني يا جبنا....

والمساخر اللي كانت علي التلفزيون الذي يصر خالو انه يسمية تلفزيون التموين ..._لانه في جودة السكر والمكرونة والرز الاسود بتاع التموين_

دي كلها مسرحية سخيفة وقديمة وشفناها قبل كدة كتير ....

فبلاش حتي لو عايزين تمسكوا البلد يبقي علي جثث اهلها ..........

اكيد هانفهم ...ونعرف

انه مفيش حاجة اسمها احسن...او يستاهلوا دول بلطجية اوايه اللي نزلهم دول؟؟؟ او هما المسيحيين عايزين ايه ؟؟؟

او حتي....... احنا لازم نسيب البلد دي انتم مش شايفين الاضطهاد؟؟؟

هايفضل عندي امل اني ما سمعش جملة ..." عدوك عدو دينك"

بكل الجهل والغباء والاهانة والعنصرية اللي بتحتويها...

وبالنسبة للاخوة العسكريين العشمانين انهم يوقعوا الدنيا في بعضها عشان يقعدوا علي تلها احب اقول موتوا بغيظكم..

دة حتي غاندي هارش اللي بتعملوه وقال عن اللي زيكم "سيتجاهلونك ثم يحاربونك ثم يحاولون قتلك ثم يفاوضونك ثم يترجعون وفي النهايه ستنتصر"

بس في النهاية ياريت تاخدوا بالكم اننا احنا اللي هاننتصر

...مش مسلمين لوحدهم ولا مسيحيين بس ...

لاني مش هاقبل اعيش في البلد دي من غير جاكي وانجي وساندي وسناء ومروه ومينا _اللي بحب اسمه اوي علي فكرة_

واحمد _الواطي_ وسمر وشريف وحسن وميرنا واستاذ فريد ونشوي ومادلين

لا الصراحة ... احمد ممكن يهاجر براحتة!!!!!!!!!!

...مش هاقبل ان مايكل صاحب اخويا يهاجر ويسيب البلد لانة مسيحي ومش هاقبل ان حد يولع في شعري وانا ماشية لاني مش محجبة او بمعني اصح مش علي كيفه ...

.ومش هاسمح للعسكر بانه يحكم بالحديد والنار تاني

او لاي حد ...انه يقتل الناس بحجة انهم مسيحين او متظاهرين او معتصمين ومش هاسمح ان يبقي رئيس الوزراء بتاعنا ولا مؤاخذة شوربه.....

ولا ان الانتخابات تتاجل ولا .....ولا ....ولا....ولا.....

ومن الاخر بقي .....................يانعيش عيشة فل يانموت احنا الكل...

مولد سيدي المجلس...

انتخابات انتخابات ..دي في شهر حداشر بالذات

قرب جرب انت وهو ..قبل ماتجبر الانتخابات

سيرك ومولد سيدي المجلس شالله يامقامة يامتكسكس

فرصة بلاش من غير تعريفة مش طالبين غير البطاقات

بس تعالي ومتع نظرك يجي مليون اراجوز منتظرك

ضحك هاتضحك بكي هاتنح ...واللطم هانلطم جماعات

اما لوانت تحب تهيص نفسك تتدلع وتبصبص

فيه حته غجرية بقايمة ...من دة علي دة في الحركات

ولو انت هواك مش متنعنش غاوي تفقر وبتتدروش

يبقي عليك عالنخلة العوجة تلقي بتوع حزب الاموات

ليل ونهار ناصبين الحضرة

فردي فردي الله حي

بكرة الوطني زمانة جاي

خرب خرب ياكش تولع ...يلعن مين بدع الثورات

والمشي علي حبال بحماس

لو دة نظامك يابن الناس

تلقي الحل هناك في السيرك ويا _ اخواننا_البهلونات

قرب قرب والعب توس تكسب حزبك مرة ونص

فتح عينك تاكل ملبن ...نصباية بتلات ورقات

اما فتوة سيدي المجلس مجلس برضك بس مأسس

حاسب منه فلو تتلابط تلقي طوارئ ومحاكمات

بص براحتك واوعاك تنشر ...لو هاتسيح يبقي بأدبك

وبلاش وحياتك تتفائل

صح دة مولد بس المولد برضة يعوز حبة احباط

اما الوصفة عشان تلقانا وتكون من مريدين مولانا

اسمع مني وامشي عليها حتي ان كنت نازلها فئات

فوت طوالي تلقي سلالم كله عليها واقف يرقص

هاتلاقي موالد بالتيلة منهم واحد من غير حمص

جمد قلبك وادخل صوت....

يبقي دة مولد الانتخابات..............................

...........................................

دبلة شمال

سأدخل مباشرة في الموضوع وأسال سؤالا صريحا وارجو ان اجد اجابة علية

هل تقبل اي فتاه الوقوع في غرام رجل متزوج؟؟؟

حسنا ..قبل ان تفكرن في اجابة هذا السؤال او تفكر انت في جملة ساخرة ان كنت شابا ...

لاوضح اولا ان هذا ليس سؤالا من نوعية الاسئلة التي تجدونها في اعمدة المقالات داخل المجلات النسائية التي اعتبرها من الاهانة للنساء دعوتها بذلك....

لست محررة عمود..احذري يافتاتي ...او كيف تتعامل مع المراهقات ...او اسرار البنات ...

فعلا جال هذا السؤال داخل عقلي لمدة ليست بالقصيرة ....

ربما عندما رأيت كيفية اعجاب الفتيات بفيلم من نوعية انت عمري وتصنيفة في احاديث الفتيات علي انه فيلم رومانسي و_اللللللللللله...كميلة اوي_ واشياء اخري..من هذا القبيل.

لن اكذب وأقول انني وجدت له اجابة عامة فقط حددت اجابتي انا من هذا السؤال ..وهذا كل ما اطلبة ليس تحليلا موضوعيا ولا فلسفة للامر من وجهة نظر اخلاقية ..فقط رايكن كفتيات هل تفعلينها..نعم ام لا ؟؟؟

ولا اتحدث عن علاقة اثمة ولا حتي زواج ثاني ..فقط علاقة عاطفية..

ان تتورط احداهن في حب او اعجاب او حتي استلطاف مع رجل تعلم مسبقا انه متزوجا باخري

...

وطبعا نوعية الاجابات التي ستردني ان لم تكن شتائم ...قد تكون استنكارية او رفض تام للفكرة من اساسها ..علي اساس _انه عيب وحرام عليا واشوفلي حاجة نافعة اتكلم فيها وبلاش مسخرة_

_

ولكن فعلا لن اكذب كما قلت ببساطة هذا هو ماشعرت به عندما امسكت بالقلم في يدي

فهل ستنكرين تماما.. انك ربما انجذبتي ولو مجرد انجذاب طفولي لرجل متزوج من قبل؟؟؟؟

ربما معلم الصف في الاعدادية

او حتي استاذك الجامعي ...

كاتبك المفضل ربما ...

ممثل مثلا ..

او حتي شخص ما تعرفينة بشكل سطحي من العمل..؟؟

ولكن ما لن اصدقة ابدا ان تقول لي احداهن انها لم تعجب ولو قليلا برجل ذو خاتم فضي يحيط باصبعة ..

الغريب هنا ان سحر بعض الرجال المتزوجون للفتيات الصغيرات...

يكمن في انه هذا الرجل كبير مسئول عن منزل وميزانية...

بل وينام ليلا وبجانبة في الفراش سيدة ما دون ادني شعور بالذنب..

هذا اخر نضج ..خرج من نطاق المكالمات التليفونية الهامسة البعيدة عن انظار الاهل ليلا

..

هذا رجل يتوقف الكثير علي قراراته وحكمتة اللا متناهية

هذا هو ...

عرك الدنيا وعركتة ويعرف النساء كظهر يده ...!!!!!!!!!!!!!

وطبعا لايخفي علي احد التحدي الذي يخلقة وجود زوجة

...

تخلق منافسة ...من نوعية انا اجمل ...سيتركها من اجلي

طبعا لاتدري معظم هاته الفتيات ان في معظم الاحيان تكون الزوجة هي المسير الخفي لكل ماسبق وهي السبب الاساسي في انها _الفتاه_ تراه

_سيد الرجال_

بالنسبة للسيدات الاكبر سنا يعني الوقوع في حب رجل متزوج ......

علاقة عاطفية مثيرة دون ادني التزام...

حقا لن تقومي باعداد طعامة ..ولا بنقع ملابسة الداخلية لعدة ايام علي امل عودة اللون الابيض لها مرة اخري

ولا بغسيل جواربة..ولا الاستماع لشكواه المستمرة عن الالم في مؤخرة عنقة ولا عن مدي افلاسة في نهاية الشهر وطبعا لن يقترض منك مالا ......هناك اخري تفعلا هذا ولتكتفين انتي _بالدلع_المؤقت طبعا

بالطبع بعد فترة ستريدين تحطيم راسة ربما لانة متزوج ولأنه ليس لك وحدك...

هذا طبعا بعد ان تقعي في غرامة كليا وتدركين مدي بلاهتك

او لأنك لم تحبية واكتفتي اي نوع من الاوغاد هو

!!!

وهذا ببساطة مايثير الجنون بالنسبة لتناقض المشاعر الانسانية

ولكن حقا ما السبب الذي دفعني لهذا السؤال الغريب؟؟؟

فعلا لا أدري ...ربما لانني اؤمن بالحكمة النسائية الامريكية القائلة

ان معظم الرجال الجيدين اما متزوجون واما شواذ!!!!!!!!

غريب اليس كذلك؟؟؟

حقا لست ادري ...ولكن ماذا تفعلين لو اختار لكي القدر ان تقعي في غرام رجل متزوج ...؟؟؟

اتفعلينها..؟؟ لأننا ببساطة كبشر لا نختار من نحب سواء كنا رجال ام نساء...فهل ستقبلين مشاعرك تجاهه؟؟؟

او حتي عرضة بالحب ...او ستقعي انتي في غرامة مع علمك بوجود زوجة؟؟؟

هل تفعلين مثل ما فعلت مني ذكي , ونيللي كريم, وانجلينا جولي؟؟؟

بالترتيب مع حلا شيحة, ومنه شلبي, وجينفر انيستون؟؟؟

استتركين نفسك للاستمتاع بالعلاقة وحاله الحب المؤقتة تلك

ام سترفضين ...وتعلنين اعتصاما مفتوحا حتي يستجيب قلبك لمطالب عقلك؟؟؟

وهل اصلا ساعتها سيكون لعقلك راي مختلف ؟؟؟ام انه سيتفق مع مشاعرك؟

ويري انها فترة_وتعدي_مثلا ؟؟؟؟؟؟

ولا تنسي فعلا ...انك ربما فعلتيها قبلا ..ولكنك تخشين الاعتراف وربما حقا لاتذكرين من الاصل...

ليس الموضوع بتلك الصعوبة ....

نحن جميعا بشر ...خلقنا لنشعر ونبكي ونتألم ونحب وننفصل كذلك

وللاسف لو كان لنا ان تنحكم في شئ من حياتنا لكنا تحكمنا في المشاعر

ولكن ...

هل علي الانسان ان يثق في مشاعره ويتبعها اينما ذهبت به من باب الحدس ....؟؟؟

ام ان علينا ان نتبع قواعد المجتمع حولنا ...وننسي ان احيانا كثيرة للقلب احكام؟؟؟

ولا تنسون ان المجتمع ايضا متناقض قد يجرم حب رجل متزوج ولكنة لا يمنع الزواج الثاني؟؟؟؟؟

فعلا لا ادري؟؟؟؟؟؟؟؟؟؟؟؟؟؟؟

فما هو رايك؟؟

حلوي جديدة…نكهة مختلفة

دائما ماكنت استنكر وصف امي للعلاقات العاطفية بأنها كثمار البطيخ!!!!

اما حمراء وإما……لا يهم

هذا لان فعلا العلاقات العاطفية بداية من الاستلطاف الي الحب الي الانفصال تبدو لي اشبة بقطع الحلوي….

تري جميعها ملفوف بعناية في ورق ملون يجذب النظر والشهية..

وعلي عكس ثمار البطيخ غير الناضجة ..فقطع الحلوي جميعا لها بعض الفائدة لاحتوائها علي السكر الذي يقوم بتصحيح ضغط دمك ان حدث و احسست يوما ما بهبوط او حتي صداع…

الفيصل هنا يكون في النكهة …لانك ستسعد باستعادة توازنك وثبات بصرك ووضوح رؤيتك للحياة بعد تناولها ....لكن مثلا فحلوي كالعرق سوس قد تشفيني من الصداع لتسبب لي الغثيان لعدة ساعات.

اما النوع الاسوأ علي الاطلاق فهي تلك التي تبدأ بمذاق شهي وممتع وتنتهي بأخر شنيع يثير القشعريرة في جسدك...

وضاعة هذا النوع انه لايجدي معه الحذر فمهما وضعتها علي طرف لسانك اولا.. ستبدو وديعة ولذيذة الي ان تقع الواقعة ويحتل مذاقها فمك بأكملة ...

عندها فقط سيظهر طعمها الاصلي..وسيصعب عليك بعدها التخلص من شعورك بالغباء

....

طبعا سيكون بصقها هو الحل الامثل في ذلك الحين ولكن بما ان الطعم سيظل محاصرا لعقلك وروحك لمدة لا بأس بها فبعضنا قد يفضل ان يبقيها بفمه ربما ليستفد من السكر القليل بها او ربما فقط لانه لا يجد ماهو بديل افضل ...

وعلي غرار صندوق الحلويات الذي تبتاعة بالجملة وانت لاتعرف مابه بالتحديد يظل الجميع يفضون اوراق الحلوي بحثا عن قطع الشيكولاتة التي غالبا مايندر وجودها ..

ربما تجدها غامقة..او باللبن ....وللمحظوظين بالبندق ولكن في كل الحالات فمعظمنا يصير يومة رائعا عندما يجدها

...

و ربما انت من اولئك الاشخاص المستعدون لاستبدال تلك القطعة النادرة من الشيكولاتة بأخري من الطوفي اللزج الذي يلتصق بالاسنان ويجعل يومك ملئ بألم الضروس....

ففي الحلوي الاذواق دوما تختلف ..وربما تكون حساسا للشيكولاتة نفسها او حتي للبندق..من يعلم؟

فلنعترف اذن انه مهما اختلفت الاذواق فلكل منا نوعة المفضل من العلاقات العاطفية والحلوي علي السواء

...

فمنا من يفضلها هشة وسريعة الذوبان كغزل البنات..

ومنا من يحبها لاذعة كحلوي الليمون...

او قد يفضلها احدهم منعشة كحلوي النعناع ...

او ربما كريمية وناعمة كالخطمي

ربما تفضلها انت مليئة بالمفاجات كبمبون الفواكه

او حتي تلك التي تعثر علي خاتم في نهايتها وتدعي ..حلوي البخت!!!!!!

ولا يمكن بالطبع ان نغفل من لايملون المضغ ويفضلونها مستمرة كاللبان بالسكر...ولكن لايخفي علي احد مايصاب به هؤلاء من ألم في عظام الفك لايام...

ولكن مهما اختلف نوعك المفضل من الحلوي فلكل منا نوعة الخاص الذي يعبر عنه تماما قد تكتشفة سريعا ان كنت محظوظا ...

اما اذا كنت كبقيتنا فقد تحتاج لتجربة العديد من الانواع اولا حتي تجده يوما ما ..

ولكن لاتتفاءل فهناك الكثيرين منا لايجدون ذلك الطعم المميز الذي يذوب له القلب والعقل ابدا ..هؤلاء غالبا ما يكتفون بأفضل ثاني شئ وحقا قد يكون لزجا مسببا للتسوس او ما هو اسوا..

وعموما انا اري انه مهما كانت حلواك لاذعة ...سيئة المذاق ..منعشة او حتي سريعة الذوبان ...

فستظل دوما المرة القادمة سر مستغلق فلن تعلم ابدا متي ستشعر بتلك الحاجة الملحة للسكر ولا ما ستجدة في الورقة الملونة التالية التي ستفتحها..

ومهما زادت مضار ها الا انه لا يوجد علي وجة الارض من يقاوم سحرها فكلما ابتعدت عنها او مللتها او حتي اقسمت علي عدم تناولها فلابد ان تعود مهما طالت المدة لتجرب حظك مرة اخري مع نكهة مختلفة....

بخور .... كركدية باللبن ...و47 سنة عشرة!!!!!

ما الذي يجمع ببساطة بين تلك العوامل الثلاث ؟؟؟؟

اولا قبل ان اشرح الشئ المشترك علي ان اوضح انني فعلا لا ادري لما قررت ان اكتب هذه الرساله؟؟؟

فعلا لست ادري السبب... فقط انزلقت الكلمات من راسي وشعرت انها تستحق

اما عن الذي جعلها تستحق فهذا بحق شئ مبهم لي

......................

هذة الرساله شخصية جدا وتخرج من شغاف قلبي...فانا متاكدة تمام التأكد انها لن تجد من يفهمها او يقدرها

ومع ذلك ببلاهة اكتبها واشاركها

....................

منذ حوالي اربع سنوات قابلت سيدة عجوز بالصدفة البحتة التي تظل ترسل لنا الكثير من العلامات

التي نتجاهلها بواقعية فظة....

كنت غاضبة للغاية لانها عطلتني عن مشاهدة فيلم كنت ابتعتة لتوي

فيلم كنت متشوقة منذ فترة طويلة لمشاهدتة

سارت السيدة في نفس الطريق وتكلمت كثيرا جدا ...ثم حكت قصة لاتعنيني في شئ عن سبب وجودها في هذا المكان

فقط عندما بدأت التفسير ادركت السبب الذي حتم علي مصادفتها...

كانت هناك لزيارة صديقتها الاقدم والاعز

ببساطة قالت : نعرف بعضنا منذ 47 عام ولم نفترق ابدا

لطالما كانت صديقتي ولطالما ستظل ...

فقط عندما صمتت ادركت انها لم تكن بصدفة ابدا...

علامة كبيرة مضيئة كالعلامات التي تنير مداخل المطار ليلا حتي تهتدي الطائرات للممر...

....................

...............

وخمنت ان مالم تفسرة لي المراة في حديثها هو بالتأكيد عدد المرات التي تشاجرت فيها مع صديقتها تلك

كم يوما من ايام الاعوام السبعة واربعون اغضبت احداهما الاخري؟؟

كم من المرات التي بحثت فيها احداهما او كلتاهما عن صديقة اعز بديله... فقط لتكتشف بعد فترة قصرت او طالت انها تملك واحدة بالفعل؟؟؟ واحدة ليس لها بديل....

بالتأكيد لم تذكر كيف اصابتها الغيرة من صديقتها او اصيبت صديقتها بالغيرة منها........

.....

لم تخبرني عن افتراقهما عندما تزوجت احداهما او كلتاهما ولو لاسابيع او شهور؟؟؟

لم تنطق حرفا عن كمية الاعتذارات التي قدمتها كل منهما للاخري خلال تلك الاعوام علي اخطاء لا تذكرها اي منهما.......

وبالتأكيد لم تخبرني عن المرة التي تعارفتا فيها علي سلم الكلية في اول ايام اختبارات العام الجامعي الاول لكلتاهما

لم تخبرني باي من هذا واغلب ظني ايضا انها لا تذكر التفاصيل اصلا

فقط انا خمنت.........

فقط بعد مرور سبع واربعون عاما لا تراها تذكر سوي انهما لم تفترقا ابدا.........

وبالتاكيد في تلك الحقيبة الجلدية السوداء التي كانت تحملها كان البخور المفضل لهما يختبي في كيس ورقي ذكي الرائحة سيترك اثرة في الحقيبة لايام.............

ومالم اعرفة انها بعدما وصلت وجهتها وقبلتني مبتسمة.. بالتاكيد صعدت لصديقتها وشربتا الكركدية ولم تنسيا ان تذكرا ملحوظة خبيثة... حول انه يحتاج القليل من اللبن ليصير ممتاز...

تلك الملحوظة التي لم تغيرها الاعوام ولا نسيتا مغزاها الذي لايفهمة غيرهما.........

بالتاكيد لديهن العديد من الارفف تحمل في طياتها اكوام من افلامهما المفضلة

جنبا الي جنب مع ذكرياتهن عن اول مرة شاهدانها سويا..........

والكتب كذلك ...لابد ان هناك الكثير منها

والصور ..وعادل شكري ... والعود

ودكتور مدحت

وباجوش .........والقلعة والبحر......وزواج صديقتهما الوحيدة...,واسراء الاخت الصغري...والمحنة ..و...و..و

بالتأكيد كل هذا موجود

الكثير من الذكريات .....السعيدة منها والمؤلمة

ولكن الاهم من كل هذا انهما لاتذكرا عند اول سؤال تسأله لايهما

سوي ان تقولا:

احنا عشرة 47 سنة................

......................ثم تاتي التفاصيل

سحر الخواء.....

سحب حولي في كل مكان
سحب من مختلف الالوان
سحب بيضاء, سحب سوداء
سحب وردية وزرقاء وصفراء
واخري رمادية لها العجب, تاتي فتحجب كل الوان السحب

سحب احلم ان اطالها
واحيانا اصلي كي لا تطالني

قد تاتي سحبي بالمطر
قد تظهر فتداري القمر
سحبا يبهرني بريقها
وسحب تذوي دون خبر


حولي في كل الاوقات
لاتخلوحياتي من السحب
سحب لها اسباب عده
اخري تغزوني بلاسبب

استقبل يومي بسحابة
قد ترحل قبل حلول مسائي
احيانا اشتاق لاخري
تهفو لتنير لي سمائي

لي في كل حال سحابة
واحدة لسعادة روحي
ثانية مخلوقة لبؤسي
سحبا تتسبب في فزعي
سحبا لتزيد من بأسي

سحبا لها طهر ملاك
سحبا مثل الشياطين لعوب
قد تسأم من وخزي سريعا
وكثيرا ماتصير دؤوب

المس سحبا ترفع مني
واري الخلق من البدء
استشعر تيار النشوةيسري في قلبي بتأني

وتمر سحابه عن بعد تكسرني وتحط في شأني
لاعود فأطفو بسحابة تجمعني وتلملم قلبي

سحبي لها احساسا خاصا لا تجد له غيري مهرب
اتحكم وحدي انا فيها دونما ان اشعر او ارغب
سحبي تخرج من احشائي

فأنا الطقس وانا السحب

كوكي .... والمانجو

كوكي فتاه جميلة .. ممتلئة الوجة طفولية الملامح

كوكي لها بشره وردية اللون وانف احمر علي الدوام

...........................

كوكي تعرفت علي فيفي منذ بداية حياتها لم تعرف صديقة ولا اخت غير فيفي ... كانت فيفي حياتها وكانت كوكي حياه فيفي

كانت فيفي تحب المانجو .. فعشقته كوكي

عندما تحضر لهما ام فيفي المانجو تنقض كوكي علي المانجو بمجرد ان تفتح فيفي الثمرة وتسقط فيها بوجهها

كان هذا يضحك فيفي بشدة ...لهذا كان ايضا يسعد كوكي

صارت في ملابس كوكي الكثير من بقع المانجو

ولكنها تحملها بفخر كنياشين الحرب

مرت ايام كثيرة و كوكي ملازمة لفيفي كظلها في المدرسة والحديقة وحتي المنزل

ولكن البشر يتغيرون هكذا تعلمت كوكي

بالطريقة الصعبة تعلمت

تعلمت انهم دائما مايصيروا للاسوأ

..............................

فيفي الان صارت شابة وقلت مقابلاتها لكوكي وندر الوقت الذي تمضيه معها

كوكي حزينة ولكنها لا تقدر ان تبدي حزنها لفيفي

خطبت فيفي ولم تحضر كوكي الخطبة

لم تعلم كوكي ما ارتكبت من خطأ

ربما هي ام فيفي... سمعتهما منذ اعوام يتشاجران لانها تصر ان تتخلص فيفي من صداقتها لكوكي وفيفي تحاول اقناع امها ان كوكي جزء من حياتها لا يمكن الاستغناء عنه

شعرت ساعتها بالفخر الشديد لتمسك فيفي بها ولكنها خشت ان تكون امها اقوي منها

لم يحدث هذا ... ولكن كوكي حزينة لعدم رؤية فيفي تخطب

كوكي قابلت خطيب فيفي ولكنة لم يعجب بها ابدا

خطيب فيفي يقول انها طفوليه زيادة عن اللزوم

تزوجت فيفي وانقطعت علاقتها بكوكي تماما

كوكي مكتئبه تمضي معظم وقتها في مكان مظلم

لا تري احدا ولا يراها احد

كوكي تشعر بالخيانة وان حياتها انتهت بانتهاء علاقتها بفيفي

.....................................

مرت مدة لم تعلم كوكي طولها

هناك من يفتح عليها مخبأها مدخلا النور المؤلم لعينيها

كوكي تنظر فتري وجها قديما عهدتة قبل ان تغزوه تلك الملامح الحزينة

انها فيفي .. لم تصدق كوكي عينيها

فيفي بجانبها طفلة رائعة الجمال ذات عينين واسعتين

فيفي تقدمها علي انها ابنتها الوحيدة وتقدم كوكي لابنتها

علي انها صديقتها الاقدم والاعز

نامت فيفي بجانب كوكي وبكت كثيرا ذلك اليوم

فيفي تطلقت من زوجها لانه لم يفهمها يوما

كوكي تشعر بالسعادة لأن فيفي عادت لها

كوكي لا تستطع ان تعبر لفيفي عن سعادتها

فيفي عادت لتصير حياة كوكي من جديد

.................

الان كوكي تري فيفي وابنتها يوميا

كوكي ماتزال تقوم بحركتها المعهودة بالغطس في المانجو من فوق الكرسي

لكن الان فيفي _وابنتها ايضا_ تضحكان بشدة

................................................................

.....................................................

هناك سيدة عجوز تقف في مطبخ

تنظر لفتاه صغيرة بجانبها سيدة شابة في تجلسان في صاله المنزل و تضحكان بشدة

وهي تعد كوبين من الشاي

تقول السيدةالعجوز للشابه

: نفسي اعرف ايه السر

من يوم ما اشتريتلك عروسة كرنبة دي

كل ما نجيب مانجة لازم تقع من علي الكرسي فيها

زي ماتكون مغناطيس

مانجة

...............................................................

..................................................................

.................

النوت دي تكريما لاقدم صديقاتي والفتاه التي لن انسي انها كانت اجمل من عرفت

الي دميتي وصديقتي رائعة الجمال كوكي

لن انساك مهما حييت

الاعتصام علي طريقة زوزو نبيل

كان ياما كان في قديم الزمن و الاوقات ... شركة في اسكندرية اسمها النصر للمنسوجات

ودي كانت من زمان بس كان في إدارتها قولان....

كان العمال فيها غلابه ومظاليم .. وبيقبضوا يدوبك شوية ملاليم

بس كانوا عايشين في ثبات .. وأقساط ...لجل عيالهم مش في نفس الهم تبات

لغاية ما الشركة المذكورة اتخصخصت ..و دخلت في قطاع الأعمال يعني بين الخاص والحكومي اتنصصت

واتغيرت ادارات وبعدها ادارات تلات مرات باختلاف الروايات

والعمال برضة شغالين مظبوط زي مايكونوا بزمبلك... ماهو كله ماشي بنظام ... مات الملك.. عاش الملك

لحد ما في يوم صيام شمسه حامية وهواه قليل

كنت رايحة شغلي _طبعا مش في شيفت بالليل _شفت دربكة كتير وطريق ابوقير كان واقف... قلت يخرب بيت الحشيش اللي بيخلي السواقين مساطيل

بس شبط واحد من دي المحطة وقال حود من شارع تاني ياسطة...

عمال كابو معتصمين قدام النقطة وشكلهم مش متزحزحين النهاردة

سألته بسرعة بعد مالفت انتباهي ... ماتعرفش معتصمين ليه يا أخ ... يعني ايه الداعي؟؟؟

قاللي بعيد عن السامعين يا ابله .. دول هنا من امبارح وادارة الشركة عاملة هبله

واتلفت حوالية من غير داعي .. وكمل بصوت واطي.. صراحة... قشعرلي دراعي

ليهم مستحقات من 2004.. ارباح وحوافز ومنح متأخرة

وبدل ماينصفوهم في الشهر الكريم نفحوهم سلفه تتخصم .. شفت المسخرة؟؟

قالولهم اسهمكم بتخسر ... والسلفة اصلا في ثانية بتتبخر

............................................

اول ما روحت قلت اجوجل الحوار يمكن اعرف تفاصيل اكتر بدل مانا زي الحمار

لقيت نفس الكلام الكتيان لأ وزيادة حبتين كمان

قال فيه اعضاء مجالس ادارات بياخدوا بالالوفات

القصد وانا راجعة من اجازة العيد .. ركبت من نفس المحطة من جديد

بس المرة دي قابلت واحدة من العاملات .. قالتلي ده احنا في الاعتصام بنبات

لما روحنا شارع ابوقير اربع خمس ايام

لا حد عبرنا ولا قلنا سلام

لا وكمان ادولنا اجازة يومين في العيد .. والباقي يتخصم كأننا عبيد

حلفنا والله ماحنا شغالين ولابد نفضل كعمال معتصمين

وبقالهم علي الحال دة يجي 15 يوم .. لا بيقبضوا مليم ولا شافوا طعم النوم

وقعدت تشتم في واحد كدة... بيه..... سألتها طيب ومطالبكم ايه؟؟؟

قالتلي يعدل معانا وناخد ارباح اسهمنا المتأخرة

وحقوقنا بالقانون... دي في كتب متسطرة

وحد اعلي وحد ادني .. وقبل كل دة حد يقعد معانا مش سايبنا ندن في مدنه

ياما نفضل موقفينله الشغل والشركة.. هانخسر ايه ؟؟؟ ما احنا كدة كدة خسرانين خلقة

.......................................

القصد نزلت محطتي وروحت شغلي .... وصراحة موضوع كابو بقي من مشاغلي

تخيلت الباشا بتاع الشركة شايف العمال ومشكك.. لأ وتلاقية بيقول لنايبة حاجة من نوعية : ياراجل فكك

مسرحية سخيفة وعماله تتكرر ... نفس الوشوش الزبالة تقولش علينا في المقرر

................

وهنا ادركني ميعاد الانصراف فطيت من مكاني ومضيت بمنتهي الانصاف

معادي بالثانيه و بكل تفاصلية ... واتمشيتها للبيت

اصلي............. كنت عايزة اخس كام كيلو

.............وفجأة وانا بكتب في السطر اللي فوق .... اكتشفت اني برضك من النوع المخنوق

يعني مثلا الشهر اللي قبل العيد قبضت مرتبي ناقص فتيت

حوالي 420 جنية من اجمالي اصل المرتب .. اللي طبعا مش هاقول هو كام عشان القارئ يفضل مؤدب

ولقيت نفسي محروقة اوي علي حقوقهم زي ماتكون ليا...

وقلت هما علي عكس معظم شعب مصر علي الاقل .....يعرفوا يعني ايه ملابس داخليه

بمناسبة مسخرة تسمي: احدث جلسات محاكمة محمد حسني مبارك

سوري ياريس

سوري من بناتك

سوري من ولادك

سوري من شويه سيس

حطوا من مقامك

سوري علي المحاكمة

سوري عالنداله

سوري عاللي قدروا وعلوا صوتهم

في حضور جنابك

وقالوا يعدم وقالوا يسجن

وقالوا ايه؟؟؟... عايزين عداله؟؟؟

فكك ياباشا

دي ناس بلاوي.. دة كلام قهاوي

هوانت في في "جمال" كلامك

ولا في "علاء" اخلاق رجالك

ولا انت اصلا في يوم اساسا

طنشت مرة وعليت دماغك؟

دي الناس حياتك وسوزان مراتك

كانت تولع....في شموع بلادك

الله يحظك ويعللي حظك

وينتقمللك من كل فاتِك

هو انت يعني عملت ايه ؟؟؟

ليه مفقوعين من سوسو ليه؟

عشان صغنن ولسة شاب؟

عشان حنين تقولش اب؟

ولا عشان كان كله ماله في جيب عياله

عياله... الشعب

ياناس كفاية حقد ودناوة

عايزين ايه تاني ؟؟ ليه الغباوة؟؟

هايعمل ايه غير اللي عمله؟

مش كان مدعم " كافور"" ومترو" ؟

و"جنينة مول"؟ ولا اتسطلتوا ؟؟

و"الفور سيزونز" في اسكندرية ؟

قصة شريط ؟؟ بحرفنية

والكاس بتاعكوا مش خدله صورة في الافريقية؟

ويقولواايه؟ شربنا منه كتير وشفنا؟

ياناس كفاية ظلم وتبالي

هو احنا شفناه؟؟ ولا عمره شافنا؟؟

دة كان مسالم و كان في حاله

وكان شايلنا في جيوب رجاله

زكريا عزمي واحمد نظيف

سيد قراره وشوري الشريف

وعز برضك قزعة ولطيف

يبقي الرئيس لخبط في ايه؟؟

مش كات مشاغله كترت عليه؟؟

هيسيب دة كله وينتبه غرقت دي ليه ؟؟؟

ولا الدويقة جلمودها راح كام شاب فيه؟؟؟

ولاانتوا كنتوا يعني عايزينة يرحل؟؟

ويقول كبرت ومابقيتش اقدر؟؟

انتوا اتلحستوا ولا المسيل في دماغكوا اثر؟

يصح يترك اسرائيل من غيرطبيعي ولا امدادات ؟

مش برضو جيرة ولا انتوا نسيتوا كل اللي فات؟؟

لو جارك انت انبوبتة فضيت هاتسيبوا ياكل مثلثات؟؟؟

يصح برضك يسيب بلادة؟؟ زريبة اهله

عزبة ابوه؟

ماخلاص يا عالم ماتخفوا حبة .. ماتعزروه

عمل ايه يعني؟؟

سرقلوا سرقة؟؟ ما الكل نافسة

ظلمكوا حبه؟؟ مرة من نفسه

ولا انتوا حبكت معاكوا تمة تلاتين سنه؟؟

كان يعني لازم تقولوا يمشي من هنا؟؟

كان يجري ايه لو كان بقي ؟ دة حتي كان حر و تقي

كنا نسيبوه يفضل في شرم محتمي

وشهر تسعة كان هايقوم

و.....

ويجيب جيمي

اسمحلي اقوللك و ياريت ماتسمح

علي كل مرة كبرت مخك

ونسيت تفر في كل ورقة

وفقرت شعبك

ولهيت في قصرك

وطلقت العمر, علينا فقرك وكلاب جنابك

وحمير كلابك وسحالي جحرك

وقلت عادي دي بسيطة جدا انتوا اللي بس معقدينها

بالvery

وعشان سيبناك تلاتين سنة

وسكتنا لما سحلتنا

من واحدة سيس

لأ فعلا سوري

تركيا عملتها يارجاله!!!!!

بصرف النظر عن انني مازلت طفلة في موضوع التدوين هذا , وانني ليس لي الباع الطويل للكتاب او المدونين الذين اعرفهم بحكم القراءة, والتتبع ,او الصداقة الشخصية ..
الا انني ادرك ان لدي عادة غريبة بعض الشئ وهي انني لا افضل انصاف الحلول ابدا ابد ابدا ....
وربما تكون لا تصالح لامل دنقل هي خير معبر عن شخصيتي .. بل وشعوري حاليا ..
اعترف انني من قبل كنت من انصار السلام وان _الصلح خير قوم نتصالح_ ولكن بشروط .. الان انا غيرت رايي تماما وكفرت بكل سلام او صلح مهما كانت شروطة منصفة..
فعندما اري ان تركيا قد قامت بطرد السفير الاسرائيلي وتخفيض تمثيلها الدبلوماسي في تل ابيب الي سكرتير تاني وهو مايعني سحب السفير التركي مع عدم غلق السفارة _اي ان اكبر راس في السفارة هو السكرتير الثاني_
اعتراضا علي حصار غزة وعلي تبرئة تقرير الامم المتحدة لاسرايل من مقتل الثمانية ناشطين في هجومها علي سفينة مافي مرمرة من اسطول الحرية الشهير علي ايدي الجنود الاسرائيليين ...
عندما اري هذا واعود لاري مشهدا باهتا عن رد فعل الحكومة المصرية والحكومات العربية بشكل عام علي حصار غزة اللانهائي وايضا رد فعلنا نحن علي مقتل الخمس مجندين _الغلابة_علي الحدود الفيروزية لسيناء اشعر بالدم يغلي في عروقي صاعدا لراسي ..
وايضا عندما اسمع من يقولون ان الدولة لايمكن ان تكون علمانية لاننا لسنا مثل تركيا لابد ان تكون اسلامية.. ا
لهذه الدرجة وصل بنا الحال من السطحية والاستهانة ايكون الدين مجرد شعار نضعه علي راس الدولة فقط ؟؟؟؟ لوحة بها ايات قرأنية فوق راس كل موظف مرتشي؟؟؟
علمانية ام دينية ؟؟؟ اهذا ما يشغلنا الان؟؟ انا افضل ان اكون علمانية ذات موقف علي ان اكون اسلامية غير ذات معني ... واقصد بالعلمانية هنا ان افصل الدين عن الدولة وليس ان اكون كافرة لان العلمانية تختلف تماما عن الالحاد ..
وهذا يذكرني بموقف الاخوة الاسلاميين الذي تمت اشاعتة ايام ظهور الشوعية في الخمسينات و الستينات بالاتفاق مع الحكومة ورجالاتها ... فظن الناس ان كلمة الشيوعية هي مرادفا للكفر مثلما يتم التعامل مع العلمانية الان ...
والدتي نفسها مع كونها شخصية اكثر تفتحا نوعا ما عن بنات جيلها .. الا انها نقلت لي هذا الظن عندما سألتها وانا في العاشرة عن معني الشيوعية .. فردت ببساطة هي ناس كافرة تقول ان كل الامور بيد الشعب_ لا حظوا هذا_ وان الله غير موجود... اليس هذا شبية بما يشاع عن العلمانية ونظام الحكم التركي؟؟؟
عندما اكتشفت معني الشيوعية والعلمانية والفرق بينهم وبين الالحاد ... علمت ان الفارق الوحيد هنا هو الافراد فياليتنا علمانيون ذوو كرامة ... علي ان نكون مفتخرين بشعار ديني لا نطبقة ولا حتي نكن له ذرة من الاحترام ...
قد يظن من يقرأ هذا الكلام _ولا اظنهم كثيرون_ انني ادعو او اشجع لحالة حرب مع اسرايل؟؟؟ بالعكس كما انا ضد المصالحة فانا ضد الحرب.. وهذا ليس تضاربا انا فقط ارغب في ان نتخذ موقفا .. ان نتخلي قليلا عن دور _ الدولة السيس اللي لا ليها في الطور ولا في الطحين _ ان نتعامل مع الموقف بقدر فداحتة .. والموقف فادح بلا نقاش...
وبالمناسبة اعجبني جدا وصف عم احمد فؤاد نجم لرد فعل ابنته الرائعة نوارة .. عندما قامت ثورة تونس .يقول هو : قالتلي احنا جايين بعد تونس ولما سالتها اشمعني؟؟؟
قالتلي : اصل احنا "بصرم"
فليسمع منك الله يا نوارة ويصيبنا" الصرم" هذة المرة ايضا.

بجد الرجاله راحت في73؟؟؟

انا كل ما ادور علي راجل محترم الاقي العبارة دي في وشي... الرجاله راحوا في 73 ؟؟؟

انا لقيتها شبه جملتي اوي اللي بقول فيها ان الرجاله راحوا في الوبا علي غرار الاخت العفيفة هنادي... اللي هي اساسا ماراحتش في الوبا ولا نيلة .. دي راحت من ال.. احم العك ولا مؤاخذة..

فقلت اسأل اصحاب العلم والتجربة يمكن حد يعرف يفند النقطة دي ويدلني علي المكان اللي مخبيين فيه الرجاله ..ده لو كانوا لسه ما اتعرضوش للانقراض اصلا .. واتمني من كل قلبي نلاقي رجاله ولو حتي من مصابين الحرب .. اهو ينفعوا برضوا لحد ماربنا يفرجها علي البلد دي بشوية رجالة ناجين من الوبا و من ال..... الجيش قصدي التجنيد يعني بتاع 73محدش يفهم غلط والنبي.. انا جتتي مش خالصة ومااستحملش محاكمات عسكرية ولا مدنية حتي...انا عن نفسي مش عارفة الاجابة وماما مصممة علي ان الرجاله في مكان غامض من قبل 73 اصلا بزمن يعني نظرية 73 بالنسبة لها نظرية تفائليه.

الصراحة انا كنت دايما بقول ان نساء عائلتنا مصابات بلعنة من نوع نادر اسمها ولامؤاخذة "الرجاله النص كم" اذا اصطلحنا علي تسميتهم برجاله...

يعني علي غرار لعنة كينيدي اللي ظبطت العيلة بحالها ولو ماتعرفش لعنة كينيدي "ماتقرفنيش" و جوجل عليها عشان انا مش رايقة احكي الصراحة....
بس بعد مدة متوسطة الطول والعرض وشلحة من تجارب شخصية وسلخة من تجارب الاخرين و"بردخ" من اللي بيحصل في البلد وقراءة متفحصة لكتب الفلسفة والمنطق بتاعت ثانوي وجامعة وصلت "لكونكلوجن" يعني نتيجة الا وهو ان الرجاله اختفوا من الوجود في حادث غامض وسابوا الدنيا تهيص الا من نماذج ._ يعني يحسب لها شرف المحاولة _ اذكر منها علي سبيل المثال لا الحصر كابتن احمد الشحات اللي تسلق المبني السفارة الاسرائيليه عشان ينزل العلم ... ولو اني معترضة طبعا علي مبدأ ان يكون دة هدفنا من الاعتصام امام السفارة ... انزال العلم...بجد ماستغربتش من كون مفيش حد اعترضة من السفارة ...كنت متأكدة من دة العاملون بالسفارة .. والحكومة اللي وراهم في تل ابيب اذكي بكتير من انهم يعملوا كدة يعني .. من باب: سيبهم يفرغوا الكبت يا عزرا ياخويا ... كدة يعني لو مانزلناش العلم كنا هانزل حاجة تانية وماكانتش هاتبقي قماش بقي من الاخر.....
بس الحركة عجبتني كونة مالوش لا في الطور ولا في الطحين .. يعني العمليه كلها وجدان جمعي... موروثات ان العلم الاسرائيلي دة عامل زي ماتقوم من النوم الصبح علي برص ماشي علي مناخيرك مثلا ...لا شعوريا هاتقوم تنفض نفسك ويمكن تضرب مناخيرك وانت مش حاسس .
المشكله ان الرجاله انحصر حضورهم في مواقف مش في شخصيات .. يعني مثلا فين الاقي راجل ينزل بدل العلم اتفاقية تصدير الغاز ..او بلاش يبعت حتي باتنين جنية عيش للمجاعة في الصومال ..ولابلاش سيرة افريقيا بتعفرت الناس .. يقولوا احنا مااالنا ؟؟؟ مش نخلص من مصايبنا الاول... ثم ان كمان الصومال مش داخلة في اتفاقية الميه ..نتعب نفسنا ليه بقي.. اهو لو فيها راجل كان عرف هانتعب نفسنا ليه..

القصد ..مثلا لو فيه رجاله في البلد كان معبر رفح اللي بينيمني متنكدة يوميا دة اتفتح او اتوارب نص فتحة ...او اتعمل فيه خرم من باب التهوية حتي

لو فيها راجل ماكانش يطلع لنا واحد يقول عايزين نبني البلد الانتخابات والاستقرار ..استقرار ايه و عمل ايه بس المصالح مسوسة والشركات متخصخصة والمشاريع متوقفة

لو كان فيها راجل ماكانش عمال كابوا اللي وقفوا في عز الشمس يومين ورا بعض في عرض طريق ابوقير امام قسم باب شرقي عدل

وتصدقوا والنعمة ماحد تف في وشهم ولا قفاهم حتي...

الله يرحم الرجاله ...الفاتحة علي روحهم وروحنا من بعدهم.