هابي نيو ثورة!

سعيده جدااا ان مرسي مشي وانا نزلت مع اصحابي من اول لحظه وزيطت امبارح وفرحت لما اتشال  :عشان ادعاء التدين في العمل السياسي يسيئ للدين وللشعب! واحنا مش في عصور سيطره الكنيسه علي اوروبا .. وماينفعش نعيش بإداره شويه ارهابيين!
ده ان كانت دي كانت اداره من اساسه ... شويه العاهات علي الارهابيين المتقاعدين ! كسر الاسلاميين ..ده ان كان عندنا اسلاميين برضه في مصر !

ومش موافقه  التطبيل للجيش والشرطه زياده عن اللزوم ..لان اللي نسي ماسبيرو واللي نسي الداخليه بلطجيه يبقي بيضحك علي نفسه وسوري بيقول خزوقوني كمان وكمان انا مبسوط وانا اهبل ..خالد سعيد مات بايد شرطه لسه شغالين والناس اللي طلعت براءه من كل قضايا قتل الثوار بيطلعولنا لسانهم دلوقتي ..

واللي نسي ايد الظابط اللي معلمه علي قفاه ورعبه وهو داخل اي قسم يغير بطاقته  .. واللي نسي جبت عينه ياباشا يبقي بيستعبط نفسه..!

 والقضاء مش شريف وقلنا الكلام ده قبل كده وماينفعش نغيرها كل 5 ثواني حسب الموقف .. القضاء طلع قتله الثورا براءه وحابس الوف مؤلفه من الثوار زي حسن مصطفي مثلا مع اختلافي معاه بس لا ينكر شغله عالارض ..

و عبد المجيد محمود اللي رجع للنيابه العامه اكبر هباب في القضاء ... النائب العام هو اللي برأ الناس دي وقبلهم كان بيطرمخ للجيش والشرطه والمحاكمات العسكريه وكمان قبل خلع مبارك واشهر بلاويه لما اكد ان الشرطه بريئه من دم خالد سعيد..

وحوار القلوب اللي بيرسمها الجيش في الهوا والميا اللي كانت بتوزعها الشرطه بتفكرني بالEX بتاعي اللي لما كان يعمل مصيبه ويلاقيني رايقه لسبب بعيد عنه تماما يجي يزيط في الزيطه ويعتبر اننا كده صفينا المشكله لمجرد انه صدف اني عملت حاجة كويسه في حياتي !!

في رايي الناس لازم تثق في نفسها شويه ... مش محتاجين حد يجي يشيل البطوله .. مش محتاجين نثور عالفرنسيين ونعين واحد الباني ولي علي مصر ..!!

#في_60_داهيه_الاخوان #العبوديه_ستايل_اوف_لايف #الداخليه_لسه_بلطجيه


#النايبه_العامه! #محدش_فاهم حاجه 

THE SHOW.

انا لسه قافله اخر بوست كتبته هنا!! ..

 كان عن مغامراتي في دروس الرقص مع عايشه ذات المؤخره اللاتينيه الجباره ولوسيان المستطري الذي ارغب في اكله في سندويتش ...

جرت مياه كثيره من الوقت ده .. وعارفه ان محدش افتقدني اكيد والحياه استمرت والتلاته اللي كانو بيقروا الهري ده لقو هري تاني يقروه .. المهم ..

انا كملت رقص من ايامها مابطلتش .. 3 شهور بالتمام والكمال عدوا عليا من اول يوم رحت فيه ارقص 25/3 اللي فات ..
انا رقصت من 3 ايام بالتحديد  يوم 25 /6 لسخريه القدر علي مسرح المركز الثقافي الفرنسي متواضع الحجم والامكانيات .. كان المفترض اني هارقص مع الناس من ريزو دانس علي المسرح الكبير في مكتبه اسكندريه بس هم حرفيا "اتشرمطوا" علينا ولغوا الحجز قبل العرض ب6 ايام .. فكملنا برضه وعملناه ببلاش في المركز الفرنسي ..

المهم اني اتدربت شهر واحد..علي الرقصات اللي فيه .. انا برقص بقالي بس 3 شهور زي ماقلت .. العرض كان عباره عن بنت صغيره عايزة تروح السيرك فبيجيلها ساحر ويفتحلها سيرك وتشوف العروض وفي الاخر بتروح تعيش معاهم ..

انا كان المفترض لاني تفوقت اوي في الرقص مع عايشه ذات المؤخره اللاتينيه العظيمه.. كنت هاعمل دور من ادوار المهرجين اللي بيرقصوا رجا .. وبس كده..

بعدين عايشه نفسها كانت هاتقدم دور مدربه الاسود .زبس لظروف سفرها لفرنسا " قصدتني بانجليزيتها المتكسره" اني اعمل الدور بدالها مع اطفال الباليه .. اللي يتاكلو زي صوابع تويكس بالظبط.. فقلت اوك

كان نفسي ارقص جاز متقدم شويه مع البنات المراهقات اللي اصغر مني ب10 سنين عالاقل وخبره عني ب5 سنين في الرقص بس yhlem المدربه رفضت لان اكيد واحده بادئه من شهر ونص لايمكن ترقي لمستوي بنات بيرقصوا باليه من سنين .. بس سبحان الله وبشكل غرائبي عجبتها قدراتي في الرقص اللاتيني وفي الجاز المبتدئين بتاع الكبار اللي زيي .. وكمان فيه بنت خلعت منها في العرض مع مجموعه المراهقات .. فلقيتها بتكلمني وبتطلب مني اجيب سكارف لان الرقصه فيها سكارف واروح اتدرب معاهم ...

ثم بعد فتره كان عليا اني اختار اي رقصه هارقص فيها الجاز بتاع الكبار ولا اللاتيني لان الاتنين ورا بعض .. فاخترت اللاتيني طبعا بس فضلت احضر بروفات الجاز للخبره وللمساعده كمان .. وفي يوم ساعدتها كويس جدا لقيتها بتقوللي محتاجالك ارجوكي اقبلي .. لان الرفصتين " اللاتيني والجاز  ولا بعض بلبس مختلف فانا هاتفشخ .. اتنكت عليها شويه وقبلت وانا بطير من الفرحه .. ولقيت نفسي بتدرب علي 4 رقصات .. رجا لاتيني زي رقص شاكيرا كده.. وجاز مراهقات .. وباليه اطفال .. وجاز للشباب .!!!

ركبي لمده شهر كانت بتأن .. وجيبي كان بيأن من المواصلات والمصاريف الفشيخه اللي صرفتها .. مع العلم اني بشتغل مدرسه انجليزي ..مش باخد فلوس من حد يعني ...ولغت المكتبه الحجز .. واضطرينا نغير اتجاهات الرقصات كلها وحركات كتير كمان قبل العرض ب6 ايام بس! لان المسرح الجديد ربع مساحه المسرح بتاع المكتبه!

المهم وصلت يوم 24 وفصلت بايدي  قبل العرض بيوم .. لبس مدرب الاسود لانه ماكانش جاهز..

وجه يوم 25 /6 غلطنا كتير .. بس استمتعنا جدا .. العرض كان تحفه وعجب الناس كلهم جدا ..

اما بالنسبه لي عزمت اصحابي كلهم وكانوا فخورين بيا جدا ..احلي جمله اتقالتلي اني كنت عامله زي ما اكون في بيتي ..وانا عالمسرح برقص.. انا بحلم باللحظه دي بقالي تقريبا 20 سنه .. بس لما حصلت كانت مرعبه ومخيفه جدا ..

بس كانت عظيمه في نفس الوقت .. وكفايه اني بحاول واعمل اللي عليا .. وفعلا انا ماحسبتهاش وماتخيلتش عمري اني هاطلع علي مسرح وارقص قدام ناس ! بس انا عملت الحاجة اللي بحبها .. وربنا ظبط الباقي بالتدبيرات الالهيه البحته...

انا عن نفسي مش موهوبه قد ماانا محظوظه .. الحمد لله

سلام.

لسه صور مدربه الاسود مانزلتش بس دي واحده من الاسود اللي كنت بدربهم :) "كوزيما" فرنسيه عسليه

Jazz teenagers with scarfs dance

Reggae clowns dance

Jazz adults dance

لهواه المذكرات (11)

طوووووووووووووويب .. بما ان عيد ميلادي ال 25 يوم 19 ابريل باذن الله زي ما قلت قبل كده فأنا قررت اني اكافئ نفسي علي الانجاز العظيم ده .. وانتظمت في كلاسات الرقص كلها اللي بروحها بس طبعا فوتت الباليه امبارح لاسباب مرضيه L

المهم النهارده كان عندي كلاس راجا من 8 ل9.30  والراجا او كما تنطق بالاسبانيه او الانجليزيه راجاي بتعطيش الجيم علي طريقه ايران .. هو نوع من انواع رقص الشوارع اللاتيني .. خليط من الهيب هوب والسالسا .. يتضمن الكثير من عمل المؤخرات J    بتبسيط ولتقريب الصوره علي نمط رقص كليبات الاغاني بتاعت شاكيرا .. وجاي لو والواد المخلع ابو ضفاير ده شون بول ..وجاسولينا وبتاع ..

الكلاس كالعاده كان بقياده المايسترو عايشه .. كائن مغربي في التانيه والثلاثين من عمره .. مزة التنين .. بترقص تقريبا من ايام ما كانت في ضهر ابوها .. بتتكلم عربي مكسر وفرنساوي لحد مايجيبو مدرس فرنساوي .. الانجليزي ساعات بساعدها في الترجمه منه لما بتبقي مش عارفه الكلامه بالعربي .. ماعلينا شباب شباب .

الفكره ان الست دي نجحت انها تبقي مثلي الاعلي .. مزة جدا مع انها مش حلوة اوي .. بس جاذبيه قاتله .. جسمها مش نحيف زي المدربات اللي يحسسوك انك بزلومه جمبهم مهما كنت رشيق .. طويله ذات مؤخره لاتينيه جباره ..تجيد كل انواع الرقص اللاتيني باحتراف معلمين .. بحب خفة دمها وطلاقتها في الهزار والكلام والحركه .. تحس وهي واقفه قدامك ان الارض الخشب بتاعت الاستوديو او المسرح هي ملجأها الطبيعي وعالم الحيوان وبتاع , من الاخر شخصيه طاغيه .. تقف امامها احتراما ماينفعش ببساطه تدخل مكان وتفوت علي عنيك مهما كانت الدنيا زحمه .. انا عارفه ده لاني قبل ما اكتشف انها هي اللي هاتدربني راجا .. قابلتها في فري جام .. او كما يطلق عليها بالعربي ليله عزف حره في تايترو اسكندريه _ملجا ثقافي سكندري_ كان جماعه اصحابي بيعزفوا مزيكا اسباني ولاتيني وكده وهي كانت حاضره ما قدرتش امنع رادار عنيا من انه يلقطها ولما شفتها في الكلاس الاول .. افتكرتها فورا لان برضه حضورها طاغي ولا يمكن تفويتها علي اي عين مهما بلغت درجة العمي فيها !! اتوقع انها فشخت قلوب رجاله كتير اوي في حياتها .. وبما انها منطلقه ولطيفه جدا فاتوقع برضه ان قلبها اتفشخ كتير .. اصلنا زي المدمنين .. المفشوخين عاطفيا بيعرفوا بعض بالشكل بمجرد النظر زي ما كنا بنقول في الهندسه من غير اثباتات يعني .

المهم انه واحده واحده بتنمو بيننا صداقه غريبه منبعها اني بقيت مجنونه بالرقص اللاتيني وبيها شخصيا .. وهي _ربنا يصلحلها نظرها ويشفيها من العته قولوا امين_ بتقول اني برقص كويس جدا!! .. وانا اقتبس من كلامها علي فكره فروحوا حاسبوها هي المهم اني في حالة سعاده طاغيه مغطيه حتي علي الكام يوم تعب اللي كانوا عندي اللي لاول مره من سنه تقريبا اقضيهم في البيت في قلب السرير ذاته !

اه وبمناسبه الجنان وانا مروحه بيتنا وبما اني ساكنه في منطقه شعبيه افتخر بها ولا افخر بمن هم فيها .. اتعرضت لحاله تحرش لفظي .. تعليق سخيف وانا بقفل الجاكت علي صدري وطبعا كلمه" صدري" هنا قيلت للتهذيب ليس اكثر لان الكلمه اللي سمعتها كانت اكثر وضوحا وفجرا وفجاجه .. 
وبمنتهي البساطه نقلت الموبايل من ايدي اليمين لايدي الشمال .. وبايدي اليمين _عشان البركه طبعا _بالذات باصبعي الوسطي في ايدي اليمين .. قمت بارسال حركه نابيه مع ابتسامه بارده لابن ال*****ة  اللي قال الكلمه ..

 بالنسبه لده انا متعوده عليه اللي انا مش متعوده عليه بقي ان شاب في عربيه كان جاي من ورانا وشاف المشهد كامل هدي العربيه جمبي مخصوص عشان يقوللي _برافو عليكي يا انسه _ انا كنت لسه هاديله الصوباع التاني الصراحه بس اكتشفت انه صادق في تحيته لما كررها وهو بيبعد بالعربيه_ برافو عليكي بجد انتي جدعه اوي _ الصراحه حسيت بزهو رهيب .. مش لاني اخدت حقي لا بس لان الناس اخيرا ابتدت تفهم ان الادب والاخلاق والحبشتكنات والذي منه  لايجب انها تمنع بنت من الدفاع عن نفسها وكرامتها وان ده لايقلل منها شيئ بل بالعكس يخليها بنت بميت راجل وماشربش الشاي اشرب ازوزه انا !

المهم اليوم كان عظيم الحمد لله خمسه وخميسه .. مع ان احوالي الماديه والعمليه مش ولابد خالص والعاطفيه كذلك والصحيه برضك .. وكفايه كده عشان ما افتكرش القرف تاني .. بس لطيف اني قابلت ناس جديده .. زي عزة عبمونعم صاحبه اوجي "صديكي" الانتيم عشره السنين الطويله وزميل سرير واحد في باجوش ايام الجامعه ... 

استشمتعت استشمتعت يعني . وعشان يكمل يومي قابلت لوسيان وانا خارجه وسألني ماجيتيش الباليه ليه؟؟ قلتله كنت عيانه فقاللي بلهجته "المستطريه" اللي بحبها دي .. سلامتك تعالي يوم السبت بقي ماتنسيش ...

والنبي لو ماكانش "لوسيان" كنت اكلته في ساندويتش .. واه محتاجة حد ابن حلال يفكرني اتصور وانا بعمل الحاجات دي بدل ما انا بحكي عمياني كده .. فيديو او صور هايبقي احلي كتير صح؟؟؟

  ياللا كفايه كده عشان ضهري وجعني واللومباجو ابتدي ينقح عليا .

سلامات بقي علي راي العسيلي :)

كادر

ينظر الجميع تجاه العدسه ويبتسمون ... لما لم تكن جزءا من تجمعهم عندما التقطوا تلك الصوره؟؟تسأل نفسها ..

ربما لانها لم تكن يوما صديقتهم؟؟ هي حتي لا تكاد تعرف اسمائهم الاولي !

اذن لم تلك الرغبه الملحه التي تجبرها ان تفكر في سبب عدم وجودها معهم في لقطه يشير تاريخها الي قبل تعارفها بهم اصلا ؟!

تفكر في قرارة نفسها وتدرك لاول مره ان هذا يحدث لها منذ الطفوله ! ربما لهذا لم تحتفظ بالعديد من الاصدقاء ..ربما واحده او اثنتين طوال حياتها ..

يتكرر الامر كلما تعرفت لمجموعه جديده ..تشاهد صورهم .. ويغمرها هذا الشعور المؤلم في انها ترغب في تلك الابتسامه التي علي وجوههم .. تتمني ذلك الحضن السخيف الذي يمارسونه امام العدسه .. تفكر مرارا .. لما لم اكن معهم في الصوره؟ .. هي تعلم ان السؤال في حد ذاته دربا من دروب الجنون ... وشعور الغيره المصاحب لاجابته هو الجنون بعينه!

سأكون صديقتهم يوما ما .. فقط علي ان اجتهد واستمر في هذا المجتمع فترة كافيه ليصير لي الحق المكتسب في التقاط تلك الصور الحميمه معهم ...

ربما لهذا كانت دائما وابدا شديده اللطف مع الجميع ... تساعد بنفس صافيه .. تتمهل في حوارها وحتي ان اغضبها احدهم .. تسامح .. فقط هي تريد ودهم ..ودعوتهم لها ان تدخل في الكادر !

دخلت في العديد من الصور قبلا .. وصار لها الكثير من الذكريات الغير متصله ببعضها...

خرجت من الكثير من الصداقات بعدما اكتشفت ان ابتسامة الكادر في كثير من الاحيان تكون للعدسه فقط!

تقرر الا  تتعامل مره اخري بذلك الشغف مع الصور ..لن تسمح لذلك الشعور في مؤخرة راسها وهي تشاهد لقطاتهم الحميمه ان يعتصر قلبها ويدفعها دفعا ان تكون فردا من ذلك الحيز ..

تفتح "بروفايل" صديق جديد وبدون شعور تذهب للصور .. تنظر لهم في مكان غريب لم تألفه قبلا .. وتسال نفسها بصوت عال" ايه المكان ده؟"

ثم تتنقل بين الصور وتراهم ينظرون للعدسه يبتسمون في سعاده جشعه والاذرع قد تشابكت علي الاكتاف ..

تنظر للصوره التاليه بفخر .. هي الان تعرف اسمائهم الاولي .. معظمهم علي الاقل .

هم الان في مكان تعرفه جيدا ... ولكن ياتري ؟؟لم لست معهم في الصوره؟

تعديلات شيزوفرينيه النزعه! (مذكرات عنبه 10)

باللغه العربيه الفصحي.. اكتب _ومحدش يسأل ليه؟_

 

مكالمه هاتفيه عكرت صفو استغراقي التام في تفاصيل رواية الفيل الازرق لاحمد مراد التي اعارتني اياها اعز صديقاتي !

مكالمه لم تطل مدتها لاكثر من دقيقتين وربما لم تكملهما ..جعلت عقلي منشغل ويعمل بكفاءة ميكروباص ملئ تانكه للتو وعدل ضغط اطاراته بعنايه.

لمده ساعه ويزيد_اعيد وازيد _ .. الي ان قررت ان اكتب اَمله ان يخفف ذلك من سرعه عمل خلايا مخي اللي تكاد تنفجر.

حاليا احاول ترتيب شتات حياتي التي تفسخت وممكن تبديل حرف السين شين في الكلمه السابقه _عادي جدا_

Assignments

  لم انتهي من ربعها بعد .. عمل مغضوب علي فيه واكاد لا اتسلم اي "كورسات" جديده الا بالكاد .. حاله ماديه متدهوره .. والاحدث "علاقه عاطفيه شبه منتهيه" تدهورت كما يتدهور حال خلايا مخ مريض الزهايمر بمرور الوقت فلا يعد هناك طريقه لاعادتها لاصلها او ختي وقف تدهورها!

 كف هو عن اختلاق الاعذار وكففت ببساطه انا عن الاهتمام .

الغريب انني كلما اشرح الموقف لاحداهن اجابة علي السؤال الابدي "مابشوفكمش مع بعض ليه؟ "..تنهال عليا جمل من نوعيه ؟ معقوله ؟؟ بعد كل ده؟طب ماتحاولي شويه كمان بدل الزهق اللي انتوا فيه ده؟ ؟فابسط كفي مفتوحين امامي وامط شفتي بمعني " دنيا_ هانعمل ايه"

عطن غريب تسرب بيننا , كما وصف د. رفعت اسماعيل يوما سبب انفصاله عن خطيبته هويدا .

طبعا لم تنتهي العلاقه رسميا ولكني متأكده بنسبه 90% انها في عداد ذلك..

مااراه عجيبا هو انني غير حزينه مطلقا .. يمكن القول لغير العين الخبيره انني غير مباليه ..ولكن الحقيقه غير ذلك .والا لم عكر صفوي اتصاله الهاتفي منذ قليل؟؟

اغلب الظن عندي انني اريد الانتهاء من الموضوع وذيوله سريعا .. الشهر القادم سأتمم عامي ال25 ولنقل ان حاله الشيزوفرنيا المليئه بالهلاوس السمعيه البصريه التي تواتيني كل عام في مثل هذا الوقت قد حان ميعادها ..وحقا لم تجعلها العلاقه الا اسوأ حالا!

لا يسيئن احدكم فهمي فأنا اعمل في مكان مرموق جدا واعد دبلومه عليا في جامعه اجنبيه _اون لاين_  في تدريس اللغه الانجليزيه .. لي العديد من الاصدقاء .. والكثير لأكون شاكرة .. ولكن بحق الله كما يقولون في الترجمات الردئيه للافلام الاجنبيه ..لم يكن هذا هو ماتخيلت عليه حياتي في هذا السن مطلقا .. لم تكن تلك احلامي . وحقا بعد فتره سئمت تدريس نفس المناهج .. ودراسه نفس الكتب .. انا راضيه تماما بحياتي .. ولكن لايزال هسهس الطموح الشيزوفريني اياه يلقي بظلاله الثقيله علي روحي .. وتلك العلاقه الغير مؤديه لمكان ما او لوضع مختلف عما نحن عليه الان ..لا تفعل سوي تكبيلي بجنزير اضافي!

ربما لن افعل ما اردت فعله يوما ولكن علي المحاوله عالاقل حتي لا اجدني يوما نادمه انعي حظا جلبته بيدي علي راسي كأحدي زميلاتي السناجل.. التي تكاد تري في وجهها عند القاء السلام عليها .. جملة انا اريد ان احب لانه لاشئ اكثر اثاره في حياتي افعله !

اعلم ان هذا الكلام يبلغ عني صورة ليست لطيفه علي الاطلاق .. ولكن هذا احد الاسباب وليس كلها او اولها .. اسبابي لا تعني احدا غيري ولكن لنقل .. انني لو وجدت ما ابحث عنه في العلاقه العاطفيه لكانت قراراتي تغيرت كثيرا ولكن ايماني الدائم بانني استحق ما هو افضل .. وانني استحق ان يبذل جهدا من اجلي ..ايمان خاص مقدس ليس من حق اي شخص ان يلومني عليه اذا لم يكن يحاول تحقيق هذا ..حتي لو كان الطرف الاخر .

لاأدري ما سأفعل وغغالبا لن استيقظ غدا لارشح نفسي لانتخابات النرويج الرئاسيه ..ولكن لنكتفي بانني لاول مره منذ 4 شهور اتخذ خطوة في الدبلومه .. وبدات فعلا في اعداد الpresentaion  النهائي استعدادا لتقديمه.. افكر بجديه في الرجوع لدراسات عليا في علم النفس لم ابدأها قط بسبب التسويف .. واشياء اخري احلم بها منذ فتره .. منها الفوز في لعبه criminal case مثلا  :)

اتخذت خطوة ولو صغيره في مجال تصميم الازياء اي نعم هو عمل لدي صديق يمتلك مصنعا لملابس الاطفال الجاهزة ولكن من قال ان تبدأ كبيرا متعه؟ المتعه في النمو لان العبره في الطريق وليس الوجهه ..

يكفي انني بعد سنه كامله في علاقه متداعيه الاطراف ادركت ان عقده حياتي قد حُلت .. رهبتي تجاه الاستمرار الطويل في علاقه قد زال .. فقط اعي انها ليست العلاقه الصحيحه مطلقا .. ولا هذا الوقت هو الوقت المناسب لي اساسا للدخول في علاقات جديه .. او حتي هزليه .. لم اقرر بعد ما سأفعله في حياتي العاطفيه .. ولكن في العموم لدي العديد من الخطط والافكار.. اتمني ان احقق ربعا منها وليس اكثر من ذلك.

علي الاقل ..حتي تمر فتره شيزوفرنيا عيد الميلاد السنويه التي امر بها حاليا.

لا اريد الاطاله اكثر من ذلك لانني فعلا لا اكاد اتحمل الابتعاد عن روايه الفيل الازرق لذلك العبقرينو احمد مراد التي ضبط نفسي اكثر من مره اليوم وانا اقرأها خلال سيري في الشارع!.. ولا يحتاج الامر للكثير من الذكاء ليُفطن انني كدت ان اُدهس اكثر من مره بسببها .. فحفاظا علي روحي _هاطبق عليها_ حتي انتهي منها .

 سلام

مذكرات عنبه ...الوصايا العشرتاشر

مش مهم مين هايقرا كالعاده انا بكتب عشان افضفض... والنهارده انا كنت مخنوقه .. وامبارح كمان... واول ... واول... يوم الخميس كان اجازتي الجمعه رقبتي اتلوحت لما وقعت .. وركبت رقبه ... والسبت والحد اتخانقت مع سي زفت ..لاسباب غير معرفه ....

والنهارده كمان كانت الخناقه الكبري... ورقبتي بتوجعني لاني شيلت الرقبه وعاندت من كتر القرف ...

ده الملخص.. التفاصيل ...
الكثير والكثير من الاخبار ..الدبلومه اللي بحضرها خلص معاد تسليم التاسكس اللي فيها وهما اساسا اتفرمتوا وضاعوا في الوبا ..فهاعيد من اول وجديد...
الامتحان العملي او المشروع النهائي مش عارفه احددله معاد لاني ماخلصتهوش او بمعني اصح ما ابتديتش فيه اصلا بسبب الشغل...

حياتي العاطفيه في الحضيض شكرا للسؤال...
 حاله البلد مسخره حقيقيه...
الناس بتقاطع بعضها وبيتخانقوا لاتفه الاسباب ... الكل مريض نفسي في حاجه ماسه للعلاج...

الحمد لله عموما... مش عارفه اتكلم عن ايه ولا ايه ..كل حاجه هافتحها عايزلها 254578956985 ساعه كتابه...
بس المجمل ان الحياه ماشيه..

الفكره اني بتعلم حاجات كتير اوي بسرعه اوي ...
ماتحكمش علي حد لان كل الناس ملطوطه في القرف سوا... اتودت دايما احمد ربنا اني عندي حياه عشان يبقي فيها مشاكل بسيطة زي دي...

الفكره انك لما بتشوف بلاوي الناس مش بتهون عليك بلوتك بس بتحس انك مكسوف تتكلم فيها اصلا لانها ببساطه مش بلوه مقارنه بالهبل اللي انتا مالي الدنيا عويل عليه ...

زي بالظبط المشهد بتاع صباع شخصيه محروس.. اللي كان خدش قد الفسفوسه ومش بيبطل لا كلام ولا شكوي منه ...

الحياه بقت معقده وبسيطة في نفس الوقت ..بتحب حد خليك معاه وميتين الناس كلها ... متضايق من حاجة ارميها ورا ضهرك...ماتندمش علي اي خطوة اخدتها مهما كانت غبيه ..اللحظة اللي هاتندم فيها مش هاترجع وانتا اوردي بتضضيع نص يومك في حاجات ممكن اوي ماتعملهاش او تقولها ...وتستفيد بالوقت ده!!!

ماتديش الامان ..فرقه بسخاء ... ثق في الناس عالاخر ...وهاتتفاجئ ..
سامح اوي وحب اوي .. واحزن اوي وافرح اوي واحمد ربنا اوي اوي ..انه مديلك كل ده تعيشه ...
استمتع بالدنيا حلو وزفت ...
لان الزفت عمره ماهايبقي زفت للدرجه ..لان دايما فيه اللي ازفت منه قدام عنيك ...بس صايب حد تاني غيرك..
واعرف ان مهما يأست هاتفرج فماتيأسش وتضيع وقتك ...
الحمد لله عالحب والموت ..والحياه والمكسب والخساره ..والصحاب والاغبياء والاعداء .. الحمد لله عاللقمه والنفس والبيت ..الحمد لله عاعيله والصحاب مهما كانوا مطلعين عينك .. الحمد لله من هنا لاخر الزمان ...

مش عيب انك تعرف غلطك وتتاسف لربنا لما تفقد ثقتك فيه وفي الدنيا اللي خلقها ...
مع انه خلقها وخلاها ابسط من البساطه لدرجة انه مش بيجي في بالنا انها بالبساطه دي فبنعقدها بمبدا ودنك مني ياجحا ...!!
خليك صريح ..وعيشها بالبساطه اللي هيا عليها ...  فكك من كل ولاد التيييييييييييييت اللي بيعكروها ويعقدوها ...
حب اللي يحبك واللي يتعوج اديله بالجزمة ...قول اللي يعجبك واحترم اللي حواليك وماتحاولش تنافسهم في مين فيكم تعبان في حياته اكتر لانك تبقي مؤيض نفسي فشخ لو عملت كده ...كل واحد عنده اللي مكفيه ...

ومره تانيه علي عدم الثقة فيك اللي بيجيلنا كتيييييييييييييييير اليومين دول ..احنا اسفين يارب ...

سلام 

بنت حوا..

عزيزي ابن ادم ..
تريد النساء في حياتها العاطفيه واحدا من اختيارين .... اما رجلا .. او ذكرا !

فإذا لم تكن رجلا بما فيه الكفايه لتعتمد عليك وتخفي همومها واعبائها خلف كتف افتراضيه وفرتها لها عن طريق منحها شعورا حقيقيا بالامان;
فعليك ان تكون ذكرا تزاوجيا لا مثيل له ... وحتي هذا قد لا يكفي تماما ..

واذا لم تكن قادرا علي ان تمنحها احساسا بالاكتفاء البيولوجي لأي سبب كان ... فعليك ان تكون صقرا لا يشق له غبار .. اسدا سيصارع كل الوحوش الخارجه من العاب الفيديو جيم ليبقيها امنه..وحتي هذا قد لايكفي تماما ..

فالحقيقه عزيزي ابن ادم ان النساء كائنات طماعه في حبها .. تريدك رجلا وترغبك ذكرا ولن ترضي رضاءا كاملا بغير هذا وذاك معا..
فلا تغتر عندما يخبرونك بسخريه عالمقهي كحلا لمشاكلك معها : "انهن لا يفقهن حرفا عما يردن" ... ولكن لتعلم انهن يعلمن تماما .. فهن يردن الكل وليس الجزء.

فاذا كانت امراتك تساورها الشكوك حيالك ولا تدري اتبقي معك ام ترحل وتحيل حياتك الي حجيم مستعر من البكاء ونوبات الغضب وغيرها ..فتأكد انه انت من ينقصك احدي الاختيارين السابق ذكرهما .. وهي فقط تحاول لفت انتباهك ...

فلا تشغل بالك بالمقابل الذي ستمنحك اياه لانه اكبر من قدراتك علي التخيل

فلتتأكد من ذكورتك قبل ان تتباهي بها .. وارجوك لتتحقق من رجولتك .. قبل ان تصدر احكامك ..
ولا تدفن رأسك في الرمال موقناً انك اكمل الكائنات .. وانهن ناقصات العقل والدين .

انتقال

اشتم رائحته وانا اخلع ملابسي .... ويأتيني عبيره وانا اطوح بها علي فراشي ..واتذكر:

في البدايه لم اكن اتقبل تلك الرائحه ابدا ...

 مزيج غريب من عطره ورائحه سجائره وعبير شعري.. انتقل اليه من كم المرات التي ارحت فيها راسي علي كتفه .

في البدايه كرهت ذلك المزيج الغير متناسق .. ومالبثت ان اشتقته ..فأدمنته ؟؟؟ وصرت اتعمد استنشاقه فور ان اراه ...

يضحك هو ...ناظرا لي ببراءه ..متسائلا عن سبب ذلك النفس العميق الذي ادخلته صدري بالقرب من ملابسه ..

ابدا لا افسر .. فقط اكررها عند رؤياه كل مره...

في البدايه لم اكن افهم ... وكرهت كل مستحضرات شعري التي تشارك فيه ..

والان صرت اتعمد ان انقله اليه ليُخلّّق المزيج ... تسللت الرائحة لجلدي لتصير رائحتي السريه

اريح راسي علي كتفه واغفو ... تماما..

 اغفوا كما لا اغفو في امان فراشي الوردي الوثير !!

ولا يتحرك كي لايوقظني ...واستيقظ لاتعجب؟؟

كيف ولم انم بالامس في ظلام وهدأة الليل ودفء فراش اعددته بيدي ,

ان اسقط غافيه في صخب وزحمة الصباح .. علي كتف.. لايميزه من الدفء سوي انه له ؟

........................................................................................................................................................

اشتم رائحة شعرها وانا اخلع ملابسي .. مختلطا برائحة عرقي !

حقا لا احتمل رائحه ملابسي الان الا معبقة بعبير شعرها ونفحات عطرها التي انتقلت اليهم.

كنت قبلا لا افهم لم تغيرت رائحتة ملابسي .. وربما رائحتي انا ايضا ؟

ثم فطنت للسبب وانا اتشمم راسها المستريح علي كتفي وانظر لعينيها الغافيتين بامان تام.

انها هي.. صار عبيرها هو عطري المفضل..

لكم تمنيت تلك اللحظة .. ان يشعر احدا بالامان بسببي وان يكون هذا ال"احد" .. هي وحدها

في البدايه كنت اتافف من راسها .. ثقله لايريحني ... ثم تعودت دفء خدها .. فاحببته فأدمنته

وصرت اقدم لها كتفي لترتاح .. املا ان ينتقل عطرها لملابسي ولكتفي دفء وجهها!

كيف صارت لي كل تلك الاهميه في الحياه؟؟ كيف اصبحت ابتسم مغمورا بالسعاده لاشياء تعودت ان تضحكني سخرية من قبل ؟؟

كيف احلم بتقبيلها فقط لانعم بالمزيد من الدف والعبير المنبعث منها ؟؟

اختزلت النساء في واحده .. ولكن كيف اختزل مخلوقا كهذا كل الرجال في شخصي؟؟؟

(مذكرات عنبه 8)جيزويت وكبده واشياء اخري

مذكراتي العزيزه :

انا واطيه وعارفه .. حقك عليا ادي راسك اهيه ابوسها ...

انا غبت كتييييييير اوي عليكي علي غير العاده .. بس واله مش من باب من لقي احبابه .. بس من باب اني في الفتره دي يا اما مشغوله اوي اني اكتب .. يامشغوله اوي اني اعمل حاجة اكتب عنها .. يامشغوه اوي في مشاكل كأباني ومش عارفه اكتب عنها ايه ولا ايه؟!

فسامحيني يامذكراتي العنبيه ...

ايه بقي اللي حصل في الفتره دي؟؟ انا قلت فوق .. طبعا المشاكل .. تنقسم في حياتي الي كذا نوع .. مشاكل في الشغل ..مشاكل مع ماما .. ومشاكل عاطفيه .. ومشاكل ماديه ..ومشاكل نفسيه

المشاكل مع ماما .. مش قد كده بحكم اني بكبر في السن وماما مربياني زياده عن اللزوم فهي عارفه اني مش هاتجوز عرفي ولا هارجعلها بحمل سفاح يوما ما وهو كل مايقلق امهات البنات في مصر .. علي اساس ان البنات لا بتضرب ولا بتشرب !! ماعلينا

غاية ما هنالك اني لما بروح متأخر شويه وفعلا بيكون بسبب المواصلات .. يعني مثلا من يومين قامت خناقه شنيعه لسه متصالحين منها النهارده لاني ... احم .. روحت بدري .!! اه والمصحف .. فانا اكيدد ماكنتش في الشغل لاني بتاخر في الشغل مع اني كنت في الشغل وروحت بدري عشان السكه .. بس نعمل ايييييييييييييه بقي ماما..

مشاكل الشغل قليله او معدومه الحمد لله  I heart my job جامد يعني.. والحمد لله .. وهذا يحل المشاكل الماديه كمان ...

يتبقي المشاكل النفسيه والعاطفيه والمشاكل النفسيه الناتجه عن المشاكل العاطفيه والمشاكل العاطفيه التي تسببت فيها المشاكل النفسيه ؟؟؟!!! ايه؟

المهم يعني اللي بالبلدي كده الجنان ... انا بتجنن عالواد وهو بيتجنن عليا ... انا لسه متضرره نفسيا من المعامله اللي كانت بيننا قبل كده او منه بمعني اصح ليا

... وهو مقدر ده للاسف .. فمش عارفه اخد منه لا حق ولا باطل وغالبا اليومين دول انا اللي بطلع غلطانه بس محدش يفتن بقي ..!! لا يتمرع وانا مش ناقصه ..

بتصرف زي الاطفال .. مع ان ده مش طبعي .. بس بعد الارهاق النفسي اللي اتعرضتله بسبب مشاكلنا القديمه اللي ما اتحلتش هي بس اتنست في غمرة الاعتقال و اتمسحت من المناقشه بمجرد خروجه ... الا اننا الان مش في عالم البوس في الرصافه .. احنا في العالم الحقيقي .. حيث ابن عمتك بيأسفنلي ...

وخالتك حاطة نقرها من نقري .. مامتك بتزيط علي فكره ... وماكنش المفروض تطلع اسرارنا برا ... وانتي اشتكيتي لاصحابي...مش واثقه فيا وقلة الثقه مش حلوه ... وانتا كنت بتكلم دي بتقولها ايه؟؟ وانتي بتهزري مع ده كده ليه ... وانا ما اسكنش في السادات .. انتا هاتتقمر ... انا عايزة ابقي جنب صاحبتي ..

الطبيعي يعني ..

بقالي مده معملتش اي نشاط .. يعني ماروحتش تمرين الباليه بقالي كذا مره ... بس النهارده حسب الاتفاق اللي تم بيني وبين شروق بنت خالة المحروس اللي في اعدادي اني اروح اذاكرلها شوية انجليزي والماني لحد ما يجيبوا مدرس   نزلت من بيتنا علي 4 وبعد التحرش والعراك اليومي وخلافه وصلت المنشيه وقابلته وبعد خناقه قصيرة لاني مخنوقه من التحرش ... ومن انه  ما استنانيش في المكان  المتفق عليه بالحرف ... وصلنا بيت الخال الساعه5 بالظبط...

اشتغلت شويه مع شروق ابنة خاله المدعوق اللي مطلع عيني ... وبعدين طانط مات خالته كانت عاملالنا اكله غريبه جدا في بيت يعني .. مكرونه بالكبده!! ولشده دهشتي عرفت السبب لما دوقتها ... كأني  بالظبط باكل في اكبر محل كشري في مصر ... تحفة لسه لحد دلوقتي نفسي انزل اركب واروحلها اقعد عالحله اجيب اخرها ... طبق واحد لا يكفي يا طانط فاطمه!!!

نزلنا وكالعاده اتخانقنا تاني ...بقي اسلوب حياه خلاص .. اتعوج عليا لاني كنت مزعلاه بشويه كلام قديم .. ولانه احم احم 5 قل اعوذ برب الفلق من شر ماخلق .. بيغير عليا J  يافرحتشي .. مع اننا كنا لسه ضاربين بعض بالجزم ... روحنا الجيزويت عشان كان فيه حفله لفريق نوبي اسمه هاي دام او السد العالي بيعزفوا اغاني نوبيه روعه ...

وهنا نأتي لفقره اجمل لحظات اليوم اللي بقيت بعملها دوما : ده اول نشاط ثقافي اقوم بيه من وقت انقطاعي عن دروس الباليه .. فدي نقطه ..

وكونك تشوفني واقفة في ظلام زحمة مسرح الجراج اللي في الجيزويت والمزيكا شغاله وهو واقف ورايا لافف دراعه علي رقبتي وايده علي كتفي ... وانا عماله اترقص يمين وشمال عالمزيكا النوبي الروعه واسقف مع الناس بعدين ابتسم ...لا يمكن بعدها تشك ان بتشهد احلي لحظات يومي ...

المهم ماطولناش كان اغنيه وهو اتخنق من الحر والناس الكتير خرجنا هو شرب سيجاره .. وانا اتخانقت معاه تاني _ماتستعجبشي ماتستغربشي_ لانه افسد عليا اللحظه !!

فهو بعد ما خلص قاللي ياللا ندخل تاني فانا صعب عليا صراحه ربنا فقلتله لا خلاص بلاش وبعدين الوقت اتاخر .. كانت لسه 8ونص بس كون النهارده الجمعه فانا بتعامل في البيت معامله سيندريللا .. لو اتأخرت عن 9 ماما هاتحولني انا شخصيا لبطيخة وقارعه كمان ...

فأثرت السلامه ووافقت انه يروحني ...علي مضض

الغريبه بقي اني فعلا اول مره اقطع حاله الانتخه دي النهارده ... يعني نزلت جمعه وانا مش من عاداتي اعمل كده .. روحت الجيزويت وانا بقالي زمن ماعتبتوش ... وتقريبا حجزت تذاكر لباليه بحيرة البجع بتاع سيد درويش يوم التلات او الاربع اللي جاي العرض يومين باذن الله ...

اول مره هاحضره انا حافظاه من المشاهدات لاني اتفرجت علي نسخ كتيره منه وعاجباني القصه فشخ !! بس هاتبقي باذن الله اول مره اشوف العرض حي قدامي ...

الخلاصه ايتها المذكرات العزيزه انها كانت ليله لطيفة مليئه باالباستا والكبده الحريفه.. والخناقات .. والجيزويت .. وسيد درويش ..

الليله كانت ببساطه علي طرازي المفضل من الليالي ....ليله حيه ...

سلام

(مذكرات عنبه 7) طعم الفرحة

(الخوف بقي بعد اللي حسين شافه يطلع يديني بالجزمة والصراحه هايبقي عنده حق هو مايعرفش اللي عملناه عشانه معلش .. هو كان فاكر انه لوحده وكمان هو مصاب بضلع مكسور من مجند ابن مره وسخة داس علي صدرة بالبياده وما اخدش اي علاج او رعايه طبيه فلو طلع مش طايق امي لانه فاكر اني ماسألتش عليه يبقي عنده حق الصراحه وماقدرش الومه ... بكره كله هايبان الخوف بقي لا اخد علي دماغي تفتكروا ايه؟؟؟)

دة كان المقطع النهائي في تدوينه امبارح والطبيعي اني اوفي بوعدي بما اني مش اخوان واحكي ...

الاول العيال ما جوش علي 11 ولا عالمنشيه استنينا من 9 ل3 وبعدين المأمور ابن المره الوسخة طلع بمنتهي التناكه لكم الناس اللي واقفة واعلن ان العربيات عطلت فهاينزلوا من قسم محرم بيه ..!!!

الكلام ده الساعه 3 حيث المواصلات من اي حته لاي حته حلم صعب المنال .. منال او سلوي حتي ..!!

المهم ناس راحت وناس فضلت لاتكون اشتغاله ... احنا (انا-مودي فتحي-نورهان احمد- والبت لو ) ركبنا تاكسي بعد مشقه وباقي الناس كل سلك طريقه .. انا كنت علي اعصابي .. ياتري هافضل احبه ولا هارفضه ؟ياتري هو هايحبني ويفهم اللي حصل ولا هايسلم ببرود ويمشي؟؟

لقينا تجمع ناس واحنا في التاكسي مودي كان راكب قدام ..

مودي: فرمل ياسطة ..حسين اهوه

قلبي: : بوم بوم بوم بوم بوم بوم!!

مودي نزل وانا فتحت الباب فضلت في التاكسي لثانيه مودي بصلي .. وشاورلي انه هايروح يسلم عليه انا قلت: روح روح

نزلت من التاكسي والموقف كالتالي:

الموبايل في ايد وJumper   الاحمر اللي اشتريتهوله النهارده في ايد.. لقيته بيحضن مودي وضهرة ليه كنت هاروح اسلم بس رجعت وقفت مكاني .. اتسمرت اقدم رجل واخر 10 علي حد قول نورهان..

حسين اتدور وشافني... جه عليا  وقف ثانيه كده وبصلي ... انا اخرت خطوتين لورا استعدادا للقلم علي وشي لاني واطيه من وجهه نظرة .!!

واذا بي افاجأ انه اترمي في حضني .!! الكلام ده فين يامؤمنين في الرصافه محرم بيه جنب القسم .!!

انا بقي وقع من ايدي الموبايل وكيسه الjumper الجديد وحضنته طبعا ينفع اسيبه يحضن وانا لأ؟؟؟

صراحة ربنا الواد عفقني ماحضنيش J  ..تقريبا والله اعلم بيحبني وكان مفتقدني فشخ؟؟

الحضن طول فالناس ابتدت تتفرج... الحضن مش بيخلص فاصحابنا ابتدوا يضحكوا علينا .. الحضن استمر اكتر ..فأهالي بقيه الناس عنيهم ابتدت تدمع ..

بس لما دخلنا في مرحلة البوس .. في الشارع في الرصافه-محرم بيه ..جنب القسم .. كان لازم الناس تيجي تفصل مابيننا .. كان فيه حبه ناس ابتدت تصورنا تقريبا ..!!

ياسر عبد القوي من بعيد: امسك ولاد الكلب دول ..؟!!

نور الزوربا: الله يخرب بيوتكم احنا في الشارع..

مودي : كفايه؟؟..احنا كده نحضرلهم كفاله فعل فاضح في الطريق العام .. وابصله ويحضضني ويبصلي ويبوسني ..

واخير بعد ما ياسر عبد القوي نجح في الفصل مابيننا لبسناه الjumper  وسلم عالباقيين .. الزياطين اللي مشوفتش خلقه حد فيهم ايام الفشخ في المحاكم ..

بعد الزيطة مودي اخده علي جنب اختصرله اللي حصل معايا في 20 يوم في 5 دقايق ..

ونور الزوربا بيقوللي : ايييييييييييييه ياما ؟؟ بالراحه اهدوا انتوا مش في باريس قلتله انا مالي هو اللي حضن والبوس دي كانت بوسه واحده..اخويه يعني !

نور: نعاااااااااااااااااام اخويه وبعدين انا عاددهم 4

.. نورهان كانت بتقوله وهو في حضني: كل اللي كان راعبها انك تبقي مش عارف ان فيه حد بيسال عليك وبيحاول يشوفك ويخرجك.. قالها: انا كنت حاسس والله ..!! انا عيطت طبعا ..

اخته جت... حضنته..نفس المشهد

 راحت شغلها وانا روحته البيت واخده اجازة بقي ... واتكلمنا كتيييييييييييير .. صعبان عليا كسرته هو واصحابه.. الشخص متغير تماما وما اظنش هايرجع زي الاول .. حسين كان عنده ضلع مكسور وبكرة هانروح المستشفي نعمل اشاعات وكشف وكده..  
كان بيهيس جامد جدا من كون محدش سأل عليه وتقريبا فقدوا الامل في انهم يخرجوا ... شخص مختلف تماما..
مش بيتكلم غير علي اللي حصل جوا اوفر اند اوفر اند اوفر.. انا عن نفسي هاسمع برضه اوفر اند اوفر اند اوفر .. الناس دي محتاجة دعم نفسي ابن كلب بعد مابيخرجوا ..

يوم الاربع ناس تانيه وقصص تانيه وقلوب تانيه مخلوعه من مكانها .. وناس مستنيه ارواحها تتردلها ..

جلسه من سيدي جابر للبرج مع العلم ان البرج اتعملتله دايره خاصه للعيال دي ... يعني احنا اشتريناهم بال70 الف بتوع امبارح.. الحمد لله ..

مكملين مع الناس الباقيه .. مكملين مع حسن مصطفي اللي جلسته برضه الاربع في البرج ..

النهارده يوم مرهق وسعيد زي امبارح بس اسعد بكتير طبعا .. يمكن ال5 دقايق الي اتقابلنا فيهم اسعد 5 دقايق في حياتي كلها .. حياتي بقالها معني .. معني مش حب وكده لأ .. لما الناس عنيها دمعت حطيت نفسي مكان اللي ساعدونا انا ومودي وباقي الولاد كويس (ماهينور_ياسر عبد القوي_شمعي اسعد) وغيرهم كتير ... عرفت ان فعلا اللي بيحصل في البلد دي ماينفعش يتسكت عليه باي حال من الاحوال ..لأنك لما تبقي مكاني ويبقي المحبوس ده قلبك انتا وحياتك انتا .. صدقني مش هاتقول ادوله فرصه.. نهدا شويه .. هما الناس دول عايزين ايه ؟!!

سلام

عذرا لو فيه اخطاء حروف او املاء .. انا مانمتش بقالي 73 ساعه :)

(مذكرات عنبه6) لولولولوي الف نهار ابيض

فاكرين واحد كده اسمه حسين؟؟ و14 واحد باقي معتقلين في الغربانيات ؟؟ اللي كنت بتكلم عنهم في اليوميات؟؟؟ وقارفاكوا حب ووجع قلب وحاجات كده ؟!!

اسككككككككككتوا مش دفعنالهم الكفالات وطالعين بكره الحد الساعه 11 الصبح باذن الله ؟!!

اه والله الحدوته طويله ملخصها ان ربنا كريم .. والعند لايورث غير النتيجه المطلوبه .. شكرا لدماغي العنديه انا فخورة بنفسي فشخ النهارده .. فعلا ومحدش يسألني ليه

العيال كلهم خارجين بكرة الوحش ان فيه 31 اسم تانيين راحو البرج من قهوة عبد الكريم اللي في سيدي جابر في احداث امبارح ... لابسين قضايا سلاح وبهدله وبرررررررررضه بالغش دفعه جديده ووجع قلب جديد بس فعلا ... مهما كبر الموضوع انا مقتنعه ان ربنا والعند والمشي ورا قلبك ممكن يحل اجعص حاجة تقعد شنبات في بيوتها ..

هانخرجهم باذن الله .. بس الاهم ان الناس فرحانه .. وانا طايره .. هاشوفهم بكرة ومش واحد ولا اتنين الفرحه جماعيه

كان المفرض ان المامور ابن الوسخة يجيبهم النهارده بس عشان اتنكنا علي اهله لما قال دول ممولين وهايطلعوا الكل .. جنون العظمه اكلوا في لامؤاخدة ..وقرر يجيبهم بكرا .!!!

اقول حاجة بقي وعسي ان تكرهوا شيئا وهو خير لكم انا متخيله العيال مبيتين ليله فل .. كفااااااااااااايه انهم زمانهم فاشخين النباطشية بتاعت الليل كلها وهايفضلوا فاشخينهم لبكره باذن الله ... لو كانوا جم النهارده كانوا هايجوا فجأة دلوقتي هما تلاقيهم زايطين علي ام السجن كله J

ربنا يجيبهم بالسلامه بكره .. ماهينور جت النهارده بعد ماطلعت انا لمأمور قسم المنشيه ابن المرة الشر***.. وفهمنا انهم جايين في ساعتها .. اصل الاستئناف كان اتأجل ليوم الاتنين .. واحنا في عرض ان العيال يباتوا في حضننا ساعه بدري .. مين يصبر ليوم الاتنين ؟؟حيث يمكن يحصل تجديد وتفضل الكفاله زي ماهي .. 70 الف جنيه اتلمت من الناس اتدفعت النهارده فديه ل14 واحد خاطفاهم الداخليه ... ولسه البقيه تأتي .

بكرة معادنا الساعه 11 قدام القسم ان شاء الله يجوا بالسلامه... انا مش مصدقة نفسي من اللي حصل النهارده بجد .. ربنا كريم .. الحمد لله .. الخوف بقي بعد اللي حسين شافه يطلع يديني بالجزمة والصراحه هايبقي عنده حق هو مايعرفش اللي عملناه عشانه معلش .. هو كان فاكر انه لوحده وكمان هو مصاب بضلع مكسور من مجند ابن مره وسخة داس علي صدرة بالبياده وما اخدش اي علاج او رعايه طبيه فلو طلع مش طايق امي لانه فاكر اني ماسألتش عليه يبقي عنده حق الصراحه وماقدرش الومه ... بكره كله هايبان الخوف بقي لا اخد علي دماغي تفتكروا ايه؟؟؟

ياللا احكيلكم بكرة عشان تعبانه جدا وعايزة انام .. ولو اني عارفة اني مش هاعرف اغمض عيني من السعاده :)

سلام

(مذكرات عنبه 5) الحمد لله!

مش هاكتب النهارده عن اغنيه ولا عن احداث ..الاشخاص اهم حاليا.

 امير اسعد خرج ! .. انا سعيده جدا.. ومكسوره جدا .. 

سعيده لان ببساطه (امير خرج).. "شمعي" اخو "امير اسعد" دفع الكفاله قبل الاستئناف وخرجه .. "امير" وصل وسط البلد عالعصر ..

اول ماشفناه طلعنا نجري عليه قدام قسم المنشية ... "امير" خرج وكان بيكلم الناس في تليفونات .. يمين وشمال كل الناس بتسلم عليه .. انا لقيت نفسي بحضنه وشمعي اخوه بيقوله :

خطيبه حسين يا امير .!

امير بصلي وفتح دراعاته وضحك: حسين ماكدبش يعني ..

رد جوز اخته : انتي حلوة اوي علي حسين خساره فيه يعني ...كلهم قعدوا يضحكوا ..

انا ماقدرتش غير اني اخد امير في حضني .. 10 ثواني بالظبط .. وماعرفتش اسيبه غير لما اخدت بالي انه مش حسين .!

كان المفروض حسين يبقي معاهم النهارده بس المحامي سبق وعمل استئناف ومبقاش ينفع ادفع الكفاله غير لما يتبت في الاستئناف دة اللي اتقاللي ..حسين تقريبا ماشافش مامته لما راحتله البرج هو لسه فاكر انهم مايعرفوش هوا فين ..!! لان امير بيقوللي اداله العنوان يقوللهم هو فين :(

امير : الو .. ايوه يا ماما انا خرجت.. ايوه ياماما انا واقف عالاسفلت اهوه (وبيضحك)

منظره وهو بيدب برجله الشمال علي اسفلت الشارع قدام القسم واحساسه بالحريه .. قتلني .. كان المفروض حسين كمان يبقي هنا دلوقتي...انا قلت كده لنفسي وانا بعيط.! كالعاده كلهم وامير من ضمن قعدوا يحايلو فيا .. ياجدعان زيطوا وسيبوكوا من الغم بتاعي .. امير خرج .!! انتوا بتقولوا ايه؟

احساس بالذنب ولا حبي ليه هو اللي قاتلني مش عارفه المهم اني بعد مرور حوالي 20 يوم علي اعتقالهم .. اول مرة احس اني مش يائسه ومش زعلانه ومش عاجزة ..

انا حسيت ان قلبي اتخلع من مكانه .. !!

لما امير ندهلي وقاللي هو كويس اوي وبيهزر وواقف علي رجليه ما اتكسرش كنت فخورة بيه جدا .. بس ماقدرتش امنع نفسي من حاجة غير لائقه علي الاطلاق انا شديت امير من هدومه وشميتها بنفس عميق .. قاللي ايه ده؟؟

بمنتهي البساطة رديت: ريحة الحبايب يا امير :)

الانسان اللي واقف قدامي ده كان معاه من اقل من ساعتين.!! بيني وبينه ساعتين زمن ومش عارفه اكسرهم لاني ببساطة مش من اقارب الدرجة الاولي ولا ليا واسطة في السجن !!

الكفاله تعسفيه وخساره الفلوس وهاتتخفض يوم السبت ...!! كل ده كلام قانوني رائع بس .. دبة رجل امير عالأرض قدامي.. وقولة انا في الشارع ياماما .. خلتني انسي كل ده ... طز في الحكومة والكفاله والفلوس .. طز في ال20 يوم اللي مش هايزودهم يومين كمان .. طز في كل لحظة هايقضوها معتقلين "ورجاله ابطال" .. طز في اي حاجة تمنع يوم واحد من حياتهم يضيع في زنزانه مقفوله عليهم زي الحيوانات ..

طز في اي حاجة تمنع انهم يعرفوا اننا طالع عين ابونا من يوم مااعتقلوا عشان نشوفهم حتي .. !!

مش هاحكي تفاصيل.. احاسيس بس ده اللي محتاجاه النهارده وده سبب اني عملت التدوينات دي اصلا..

1_محمد فتحي (مودي) العزيز "مودي" .. العزيز اوي "مودي" .. وجوده جنبي ضروري لعدة اسباب: بيحكيلي عن ايامهم سوا اللي ماكناش فيها انا وهو علي اتصال اوي .. بيحكيلي اني في عز ماكنت مطلعه عينه (انتقاما علي سوء معاملته ليا طبعا) كان مابيسلمش علي اي واحده حتي ولا بياخد باله ومش بيجيب غير سيرتي .. ومش بيقول غير انه بيعشقني ..!!!

مودي اللي لما بيقلده بيجيبه بالمللي وبيخلع قلبي بس بيخليني احس انه موجود...مودي اللي كلامي معاه يوميا عالتليفون او رؤياه في الشارع هو ونورهان اللي هايأتي ذكرها كمان شويه اكتر حاجة هونت عليا اخر 10 ايام..

قبل ما اقدر اوصله .. كنت متبهدله حرفيا .. كنت باخد صدمات الغاء الجلسات وعرضهم وانا في الطريق بطريقه كارثيه ...

مودي بيفكرني بحسين .. مودي بيحب حسين .. وانا مش قادره استغني عن مودي لاسباب عديده منها انه جدع .. وابن بلد .. بس اكتر سبب .. انه بيفكرني بيه ..بيكملي الجزء الناقص من الصورة اللي كان لايمكن اشوفه لولا الظرف ده .. بيكملي التصرفات اللي كنت بسال دايما عليها ياتري بيعمل ايه لما بتصرف معاه كده ؟؟

 واكتشفت الاجابه من مودي..ولا حاجة .. بيحبني .

سبب تاني عشان احب مودي انه عرفني علي نورهان .. بنت بلد مفيش منها اتنين معرفتنا لاتزيد عن اسبوعين وبتنزلي كل يوم المنشيه عند القسم او المحكمه او لما كنا في البرج عشان تبقي معايا.. هي ماشافتش حسين قبل كده ماتسمعش عنه غير من حكاياتي انا ومودي .. قالتلي النهارده: لما يطلع بالسلامه كلميني اجي اشوفه واسلم عليه .

نورهان مفيش بيني وبينها عشره .. بس فيه بيني وبينها ضيقه وشده .. في بيني وبينها كسرة قلب كانت بتداويها بحرفيه ..بيني وبينها جدعنه لما تطلع الفلوس وتدفع وتقوللي لما حسين يخرج ابقي اعزمينا .. ولما انا ادفع تحاول تردلي الفلوس .!!

نورهان بنت مفيش منها اتنين .. بنت منتهي الجدعنه .. فتنتني بطيبتها .. وعفويتها وطولة لسانها اللي زي العسل ..

عماد جاد واحمد ممدوح .. اتنين محامين زي الفل ونفسي ابقي محاميه بسببهم فقط لا غير .. انا قررت اني هارجع الجامعه تاني بس كطالبه حقوق السنه الجايه باذن الله .. عماد هو الوحي لده  .. واحمد ممدوح الشهير بدوحه احد اجدع محامي القطر السكندري.. هو الدافع والمحفز.

عماد اتفشخ معايا حرفيا وانا بقومه كل يوم تقريبا  الصبح علي تليفوني .. ايه حصل .. يكلمني ويقوللي .. يحكيلي لما  ما اعرفش اروح ويرجعني من الطريق لما العرض يتلغي عشان ما اروحش عالفاضي ..

احمد ممدوح : اتعرفت عليه علي تويتر زي عماد .. وزي عماد برضه ساعدني بدون سابق معرفه .. اعتمدت عليه زي اخ واكتر ولما اتشرفت بيه وجها لوجه .. زاد حبي ليه ..مليون درجة :)
لحد قبل ما يخلص النوت دي بثواني .. رن تليفوني ولقيت العزيز ممدوح بيكلمني لا لشيء غير انه يطمني عليهم في السجن ويطمنني انهم هايخرجوا .. وماتحسيش بالذنب .. وكلي هما بيكلوا كويس ومتغطيين ومش محتاجين لا بطاطين ولا اي حاجة ارحمي نفسك شويه انتي بنت حلوة وشكلك في المؤتمر كان تعبان جدا.. !!!!! فيه ناس كده
في حين اني بكلم عماد علي تويتر وبيحاول بمنطقيته الرائعه انه يهون برضه عليا.!!! حد شاف ناس كده؟؟؟ قبل كده؟؟ انا ماشفتش وماتخيلتش اني هاشوف !!

حياتي في الفترة الاخيرة بتتمحور حوالين الاربع شخصيات دول لمده 20 يوم هي الاصعب في حياتي لحد دلوقتي ... كانوا سندي المادي الوحيد .. ومكتفيه بيهم تماما .

ايماني بالله بيأتي من وجود ناس زيكم .. لو ربنا مش موجود كان لايمكن يبعتكم في طريقي ..وثقت فيكم ثقه عمياء وسبت نفسي تماما .. ولشدة دهشتي ماطلعتش غلطانه وما اتخذلتش ولا مره!.

انتم سببي الاعظم للايمان ...

ولو كنت مؤمنه بربنا قيراط قبل ما اقابلكم انا دلوقتي مؤمنه بيه مليون ... وبسبب انه حطكم في طريقي ,هافضل اصليله وادعي ان روحي تتردلي تاني ووانا واثقه انه هايعملها زي ما "كعبلني" فيكم.

ولانه حطكم في طريقي وصبرني علي رؤيتهم بيخرجوا واحد ورا التاني ووراني انه اكيد فيه حكمه من ده وغرض ... فالحمد لله .
سلام.

الاثبات العلمي لنظرية البطريق.. بحبكم ياولاد الايه :)

(مذكرات عنبه4) سيدي ياللالي !!!

الاربعاء: 6/2/2013 8:26 م

الاوله للنبي .. والتانيه لأيوب يالاللي..

والتالته قسمتي .. والرابعه المكتوب يالاللي..

والخامسه كنت غالب صبحت انا المغلوب ياللالي ..

النهارده كان العرض لمساجين قضيه احداث المنشيه في برج العرب كالعاده .. الصبح نزلت من البيت .. وروحت لاصدقاء المحابيس اللي اعرفهم و اللي كان المفترض انهم رايحين البرح علي 11 او 11 ونص بالكتير.

فوجئت لما وصلت انهم مستنين محمد عز واخته اسراء .. ييجوا من الابراهيميه للمحطة وهما لسه اساسا مانزلوش من البيت ؟! انا كان كل همي اني اروح البرج قبل عرضهم عشان ...احم .. اشوفهم !!كلهم يعني واطمن عليهم _مش كلهم يعني_والاكتر يعرفوا  اننا مش سايبينهم ..وخصوصا حسين بقي مش هاكدب .. لأن الباشا كان محفظ نمرة تليفوني للزنزانه كلها فمن الطبيعي اني كل مرة بروح متأخر عشان الشغل فالنهارده اجزت اصلا وطبقت صحيان من امبارح ...

فكوني ابقي واقفة منهاره في محطة مصر وهما مصرين يستنوا ؟؟ كان فوق احتمالي حاولت كذا مره امشي لكن مودي فتحي منعني بحجة انتي معايا .. يابنتي اهدي هانروح بدري باذن الله

انا: مامته في البرج من الساعه 7 يامودي كل اللي بتقولوه ده مايخصنيش؟؟ انا مش مشكلتي يطلع ولا لأ الطلوع اصلا من المنشيه والكفاله هاتتدفع في المنشيه ... انا عايزة اشووووووووفه عشان لو ماطلعش!!

هما بمنتهي البرود: انتي متعصبه ليه اهدي؟؟

المهم.. وصلنا متاخرين ... بعد العرض طبعا !!

وطلعت فوق الجبل قصدي اودعهم ياللالي

لقيتهم سافروا والريح متبعهم يالاللي

قابلت مامته كانت مفلوقه من العياط ... _اكيد يعني_ وقالتلي:  ماطلعوش يارودي.. انا شفته .. انتي جيتي متاخره..

انا سمعت الجمله الاخيره دي ولحد لحظات الي بكتب فيها الجمله كل ما افتكرها اعيط.. تاني !!

دي المشكله اني برضه روحت متاخره .. وده اللي محدش فيهم كان فاهمه لما اصابتني حالة الهستريا في برج العرب ..وقعدت اقول كلام كتير مش فاكرة منه كلمه غير اني كنت تقريبا بلوم نفسي اني روحت معاهم مش مع مامته... كان كافي جدا بالنسبه لي انه يعرف اني موجوده من اول يوم واني كنت بحاول اشوفه يوميا بس مكانش مسموحلي كان مهم بالنسبه ليه انه يعرف اني جمبه ....

 احساسي بالذنب اني المفترض الانسان الوحيد اللي هو افتكر نمرة تليفونه رقم رقم .. كان المفروض ابقي هناك من الفجر .. بس انا جيت متأخره L .

طبعا هما زعلوا من اللي قلته بس انا لو مكانهم هاحط في بقي جزمة واخرس خالص.. بس فوجئت باسراء شقيقة عز اللي افرج عنه امبارح بس.. بتقول لاحد اصدقائها :

هو حسين مطلع كفرانهم جوا وهي تطلع كفراننا برا ؟!!!

انا اتفاجئت ؟؟ انا كل اللي قلته اني اتأخرت واني عايزة اشوفه ومالحقتش وياريتني ماجيت معاهم؟!

فين الكفران اللي طلعته؟؟

رديت رد عبيط مش فاكراه بالتمام بس حاجة من قبيل: سوري يا اسراءاني طلعت كفرانكم بس انا كنت عايزة اشوفه مش اكتر!.

 عرفنا ان الخلاصه انهم اخدوا اخلاء سبيل ... بكفاله 5000 جنيه !!.. فشخ القضاء واجب علي فكره .. معظم الناس اللي باقيه بسطاء جدا مايقدروش يجمعوا المبلغ في اكثر احلامهم ضراوه.!!

وحسن مصطفي المناضل الجامد اوي علي فكره ..اساسا ما اتعرضش .. ونازل جلسة يوم 13 مهبب علي دماغهم فبراير باذن الله ..!! ربنا يسترها .

اندفسنا انا وماهينور ومامت حسين و3 محاميين شجعان (العزيز علي قلبي فشخ عماد جاد_ مؤمن دهب اللي اول مرة اتشرف بيه ومحمي تالت لم اتشرف باسمه الصراحه) داخل تومنايه عامله زي مكنة التفريخ اللي كنا بنبيض جواها علي حد قول عماد...

الكوميديا اني لسه مكتشفه حالا ان عماد اللي كنت قارفاه فيس وتويتر بقالي 5000 سنه كان قاعد ورايا !!

هو عرفني وانا بعيط ومسك ايدي وبتاع .. وطانط مامت حسين زغرتله اكيد J  وانا زي العبيطة لم اتعرف لوجهه العزيز افتكرته محامي اشفق عليا .!!.. اسفه ياعماد ..
كنت بحاول اكلمه وتليفوني ضرب فلاته فالشاشه ابيضت .. وهو اساسا كان قاعد ورايا وافتكرني تجنبت الكلام معاه عشان  _ حماتك كانت جمبك_ علي حد قوله من دقايق عالفيس بوك..!

ولا يفرق معانا ياريس وانتا بتقول ايه؟؟

كنت محتاجه اعرف انك عماد يا عماد ... L كنت محتاجة احس انك في ضهري كصديق عزيز ومحامي قدير .. ياللا الحمد لله كنت موجود بصورة ما.

المهم وصلنا المنشيه متأخرين وكان للاسف معظم الموظفين خلعوا ..بس المحامين الشجعان ومنهم العزيز اوي برضه احمد ممدوح _دوحه_  الجدع اوي ومن اخر الرجال المحترمين في مصر .. قدموا 

 زي طلب تخفيض كفاله وهايتبت فيه بالكتير سبت او حد وخلاص وينزل المبلغ لقدرة الناس...هأو

امانه ياريس الغليون ترجعهم ياللالي ..

اخد حبيبي في ايدي والباقي غرقهم ياللالي

انا هنا اتعرض لأزمه شديده هما هايجوا عالمنشيه تحت دفع الكفاله بكرة بالكتير باذن الله .. والاستئناف ياسبت يا حد بالكتير برضه ... مين يصبرني انا ؟؟

من الاخر مامته ماتعرفش تدبر المبلغ بالسرعه المطلوبه .. انا اعرف .. انا اوردي عملت حسابي علي اكتر كفاله اتدفعت في القضيه واخدت معايا الفين جنيه النهارده .. بس للاسف الكفاله طلعت ازيد .. الموقف كالتالي :

حسين هايبر اكتيف جدا_ماجمع الا  اما وفق ياروح امك_ ومطلع ميتين كل اللي جوا .. الشاويش كمثال بيسألهم بجهب انتوا بتوع البلاك بيري فرد حبيبي بألاطة لا حضرتك احنا بتوع الاي فون ؟!!

وهما نزلين من عربيه الترحيله شتم الظابط بأمه؟!!

هو اللي كان عاملهم حس .. اشطه؟؟ مطلع كفرانهم علي حد قول الاخت اسراء .. وهلما جرا ...

الفكرة دلوقتي هو معاه امير اسعد .. محمد البدري ....امير فيلسوف رهيب .. قله كده بس اهله اشطة هايدفعوا الكفاله ويخرجوه هواااااااا ...
حسين هاتتدفعله الكفاله انشالله بكرة الصبح قبل مايوصلو حتي.. محمد البدري عنده 18 سنه .. طيب جدا .. وغلبان اوي وعضمه نوعا ما طري . لو كل صحابه خرجوا ممكن يجرله حاجة حرفيا من الوحده ومش عارفه اهله يقدروا يدبروا المبلغ ولا لأ؟؟

الفكره اني عارفه ان سي زفت مش هايرضي يطلع ويسيبهم او يسيبه لوحده؟؟ اعمل انا ايه؟؟ وانا مال امي يعني بقي؟؟

 عماد بيقوللي نفس كلام ممدوح: ماتدفعيش ال5 الاف  انتي هبله؟؟ هما مزيطين وحبيبك ياختي لابس بنص كم في التلج ده ومزيط...

برضه مش فاهمه انا بقي المفروض اعمل ايه؟؟ وممكن التعريص يشتغل تاني ماتضمنش سيادتك؟!

بكره هاينزلوا القسم الزيارات بقي متاحة ومن حق اي حد يشوفهم يدخلهم اكل ..ميا.. سجاير ..هدوم... جن ازرق .. لو عرفت هاسأل هو عايز ايه ؟؟ تطلع ولا تفضل معاهم؟؟

انا عارفه الرد بس لازم اسال برضه J

مش عارفه هاشوفه ولا لا ولو شفته هايتصرف ازاي؟؟ ممكن يكون فاهم اني مش موجوده او سايباه فيقابلني وحش .. مش مهم .. اهو هانجرب والسلام ..

تفتكروا اعمل ايه غيركده يعني ؟؟

ياللا سلام .

(مذكرات عنبه 3)يوم طويــــــــــــــــــــــــــــــــــــــــــــــــــــــــــــــــــــــــل .. أوي!

الاربعاء: 6/2/2013 1:05 ص

يومياتي العزيزة :

اسكتي مش احنا وصلنا ليوم الاربع ؟؟ .. اخيرا شفت للاسبوع ده اربع ..

النهارده مكانش عندي شغل  كان عندي حاجتين اولهم مؤلم جدا .. وثانيهم مؤلم جدانين!

اولا: روحت  الابراهيميه شارع اللاجيتيه الساعه 5 ونص عشان كان المفترض فيه مؤتمر شبه صحفي لحوار الناس بتاعت المنشيه المعتقلين.. خلاصه المؤتمر ان فيه النهارده ناس تانيه خرجت منهم محمد عز .. .. ناس اتقبض عليهم وهما رايحين يركبوا عربيه من قدام القهوه ... بلد بنت ستين وسخة برخصه...

التفاصيل قطعت قلبي عيطت مرتين وانا بسمع نور زوربا وعز بيشرحوا نفس الكلام تقريبا ..

نور/عز: المعامله سيئه جدا... اضربنا في المدرعات .. اتسرقت موبايلاتنا وبعض اغراضنا الشخصيه.. اترحلنا علي برج العرب.. قلعونا بالسلبات وقعدنا عالبلاط لمده 14 ساعه في التلج ده... مقفول علينا باب مايتفتحش غير للأكل لمدة 14 يوم .. الاستحمام او النضافه وخلافه نوع من الطموح ... كان معانا واحد عيان بالقلب لما يتعب والناس تتوتر الشاويش يخش يشتمهم عشان يهدوا ... معامله غير ادمه ولا حيوانيه حتي.... كنا بنغني وحسن كان محبوس لوحده بس كان يهتف ويغني يسمع السجن كله ..

وغيره بس هي دي اهم التفاصيل اللي خلتني اعيط لمده ساعه كامله بلاتوقف ...

طبعا بعد اللي حصل ده ما حصل انا ماقدرتش لقيت كل اللي خارجين من السجن بدل ماحد يواسيهم بيواسوني انا .. معلش بكره حسين يطلع.. هما كويسين ..

انا: ازاي كويسين بعد الي قلتوه؟؟

هما: والله كان مطلع عنينا.. 

انا : بس هو لسه جوا ومعاه ناس تانيه كتير 17 واحد تانين؟؟ وبعدين انا اللي قاتلني يا نور ان محدش راح زاره .. انا مش مسموحلي لاني مش اقارب الدرجة الاولي .. حاولت كذاا مره ومانفعش .. هو حاسس انه لوحده

نور الزوربا: طب هما اهله فين صحيح الحاجة الوحيده اللي كانت مزعلاه ان محدش زاره

انا: اهله معتمدين علي محامي اصلا قايلهم معاد الجلسه غلط .. ومش مقتنعين بمرواحي للنيابه اجيب اذن زياره..

نور: ثانيه واحده ؟؟ انتي رضوي ؟؟

انا بهبل: اه ليه؟

نور بيكركع ضحك: انتي نمرتك ***************

انا بهبل تاني : اه ليه ؟

نور : ههههههههههههههه دة حسين قرفني بنمرتك  قعد يفتكرها بتاع يومين وحفظها للعنبر كله ههههههههههه كلم رضوي لما تخرج كلم رضوي !!

انا بهبل شديد: قول والمصحف؟؟

وهنا اعزائي المشاهدين اصل لجزئي المفضل من اليوم ...  انا بضحك ببلاهة وفاشخة بقي وعنيا محمره من الدموع .. مودي فتحي بيضحك وهو واخدني في حضنه.. ونور بيعيد علي مسامعي النمره ..ونورهان بتدعي عليه لأني وسختلها الjumper  بالمسكرة من العياط..

ماجاش في باله حاجة وهو جوا غير نمرة تليفوني؟؟ فعلا ؟؟ ما جاش في باله مرة اخته ؟؟ او مامته؟؟ او ابن عمه؟؟ او البقال اللي تحتهم حتي؟؟ قول والمصحف أاااااااااانور؟؟؟ أااااااااااانور؟

مش فاكرة حاجة غير اني كنت بضحك بعدها .. صعب عليا بس لما قالولي انهم حاولوا يوصلولي وتليفوني اللعين كان مقفول وان ابن الوسخة صاحبه التاني اللي كفايه عليه ابن وسخة لحد ما اشوفه قالهم مش هاقدر اوصل لحد من اهله؟؟ وانا ايه يابن ال*#@$$%#%:: زمالك يعني؟؟ ولا اسماعيلي؟؟

المهم خلص المؤتمر بمقابله العزيز احمد ممدوح المحامي وجها لوجه لاول مرة .. سألني علي حسين فكان الرد باين علي وشي .. قالي: بكرة باذن الله نروحلهم البرج نجيبهم ماتقلقيش :)

دي اول حاجة سيئه حصلت .. تاني حاجة اني روحت اعمل شعري !! اه طبعا عايزني اروح للواد منكوشه يوم مايطلع؟؟ معندكوش ذوق علي فكره !!  الفشيخ في الموضوع انا ساكنه في محرم بيه والكوافير جنب شغلي يعني في فيكتوريا وده لغير القاطنين بدير النحاس .... قصدي اسكندريه.. زي المسافه بين اسكندريه وتوشكي!!

ركبت مع مودي ونورهان .. هما نزلوا في فليمنج وانا كملت .. خلصت الساعه 11 بالليل وابتديت رحلة العوده.. ايه السيئ بقي في ده؟؟ ان جه في بالي فكرة .. طب لو ماطلعوش بكره؟؟؟ طب لو اتمنيت واستنين وروحت البرج بكرة وروحنا من غيرهم؟؟؟ طب لو طلعوا حبه وخلوا حبه ؟؟ زي حسن مصطفي اللي فاقدين امل خروجه ؟!!

بأذن الله لأ .. وباذن الله نخلص من الفران المسعوره _ الاخوان_ ومن قهر واحد زي  الظابط اللي قال لنور.. انتوا مش فاهمين ان البلد دي ماشيه بالكرباج لمدة 7000 سنه ...! مش هاتعرفوا تغيروها ...

ردي علي كل اللي حصل امبارح التلات  واللي ممكن يحصل النهارده الاربع.. جمله واحده قالها واحد من الحضور ردا علي نور: الكورباج ده هانشنقهم بيه .. واحب اضيف من عندي.. في ميدان عام وده مش هزار .