لا تهتم ..

تنظر لذلك الاسم فلا تجدها تهتم.. فقط تذكر ايام كانت تهتم !

تسمع ازيز الهاتف علي المنضده.. وتري الاسم يضئ مرارا..ولا تكاد تذكر ملامح صاحبه ...

متي توقفت عن الاهتمام؟ ولم؟.. ذكريات غائمه لا تدركها بوضوح فقط تذكر انها في وقت ما توقفت عن الاهتمام .. لسبب ما ..

ترشف من قهوتها  .. وتبتسم ..تذكرت شيئا ما.. ماهو؟ لا تستطيع تحديده  فقط تذكر انه كان موقفا سعيدا.. الان هي لا تذكر منه سوي الابتسامه ..

 تري اخر يأتي من بعيد ..تبتسم وتلقي بالهاتف في الحقيبه ...تنهض وتحتضنه بشوق..هي الان تهتم .

تواتيها فكرة ما للحظة .. متي ستتوقف عن الاهتمام مرة اخري ولاتتذكر سوي ايام كانت تهتم..

تبددت الفكرة سريعا تبتسم وتجلس ..

كيف كان يومك يا حبيبي؟؟

سنافر ضد التزوير ....

في عالم من عوالم الغابه  الساحرة كان السنافر يعيشون تحت سماء زرقاء كلون وجوههم حياة بسيطة ولكنها شاقه  كان السنفور الحاكم المسن  لئيما خافي اللؤم لا يستطيع ايا من السنافر ان يكتشف شره او ان يمسك عليه مذلة  ماعدا السنفور المنصور الذي كان يفضل "السي ديهات" ولكنه كان مجنونا بعض الشئ فلم تكن له مصداقيه  عند باقي السنافر..

المهم ان السنافر ضاقت بهم معيشتهم قرروا علي حسب اقتراح السنفور "الصغير"  خلع السنفور الحاكم المسن  لشدة ظلمه واجراء انتخابات بينهم لايجاد زعيم جديد وجرت الانتخابات بين العديد والعديد من السنافر لانها بالنسبة لهم كانت سابقه اولي ...

تسابق في الانتخابات السنفور "الشاب" الصغير نضر الوجه والسنفور "الحالم" والسنفور "المفكر" _ابو نظارة_ لم يستمر طويلا في السباق لانه اصيب بالاحباط وبادراك مبكر ان الانتخابات لعبه من السنفور الحكيم وانه لا داعي للدخول فيها ...

وجرت الانتخابات بمرحلتها الاولي وسط سعادة بالغه من جميع السنافر الي ان حدث  ااااااان ااااااان اااااااااااااااااااااااان _موسيقي دراميه_  

الي ان فوجئ الجميع يوم النتيجة بان الاعادة النهائيه ستجري بين السنفور الكسول وشرحبيل الشرير عدو السنافر وهادر دماؤهم ...

هنا انقسم السنافر الي اربعة فرق :

الفريق الاول قرر ان يتخذ السنفور الكسول كزعيما جديدا لانه مهما كان كسولا ومتراخيا ونائما عن حقوق السنافر فهو في اخر الامر سنفورا مثلهم ...

والفريق الثاني قرر اختيار "شرحبيل" الشرير لانهم راول ان شرحبيل بشره وقطه الاحمر المشاكس" هرهور " افضل بكثير من كسل السنفور الكسول وعصبته علي الاقل هو يمتلك من السطوة والقوة ماسيعيد الرهبه في قلوب لصوص الغابه ليبتعدوا عن ارض السنافر ...

اما الفريق الثالث فقرروا عدم الادلاء باصواتهم يوم انتخاب الزعيم من الاساس

ولكن الفريق الرابع  بقيادة بابا سنفور والسنفور "المفكر" وسنفور "الشاعر" وسنفور "العبقري" ومعهم العديد من السنافر الشباب مثل السنفور "الشجاع" والسنفور "المتحمس"  قرروا ان يذهبواولكن لابطال اصواتهم وكان في ذلك حكمه ...

فعندما يتم اختيار بين السنفور الكسول وشرحبيل الشرير سيفوز احدهما ولو بااكثرية الاصوات لا باغلبيتها بمعني انه لو فاز احدهما ب5 اصوات والاخر باربعه الاول سيصير زعيما علي السنافر...

قال السنفور "المفكر" ذو النظارات"_ تخيلوا معي ايها السنافر التعيسه لو اتي احدهم وهو يعلم انه له في صناديق الاقتراع من الاصوات الفا من الاصوات ؟؟؟هل سيقدر ان يفرض سيطرته علي رقابنا ؟_

قال الجميع فورا :لا ايها السنفور المفكر ...

قال: _فتخيلوا معي اذن لو جاء باغلبيه الاصوات ؟_

رد السنفور المتحمس سريعا :_سيقول كما جرت العادة ان شرعيه الاقتراع اتت به ايا كان ولن نكون علي حق ان اخبرناه ان الناس انتخبته لانها تكرة الاخر؟؟؟_

ابتسم السنفور المفكر ذو النظارات وقال:_ بالضيط._

_..نريد اذا كان علينا الاختيار بين الكسول والشرير الا نختار احدهما ولكن ان نختار السنافر ..ان تكون الكلمه لسنافر الغابه انفسهم ايما وقت نزلو لساحات الغابه ليعترضوا او ليطلبوا حقا سيعلم الحاكم ايا كان انه لايملك الاغلبيه وانه لا مناص من تنفيذ ارادة السنافر لا ارادته المزورة باسم صناديق الاقتراع فقط لان السنافر اعطته اصواتها لانها تكرة الاخر..._

هنا تدخلت السنفورة "الجميله" وقالت :_ولكن قل لي ايها المفكر اليس لو دعمنا الكسول كسنفور منا سيصون العهد بعد ذلك ويعلم اننا انتخبناه لاننا نخشي شرحبيل؟؟؟_

رد السنافور المفكر بابتسامه :_لا يابنيتي كلنا نعلم الكسول وكلنا نعلم عشيرته من الكسالي م اول من اتفق مع شرحبيل قبلا ليضمنوا حياتهم وهم اول من اتفق مع الحكيم في بدايه الامر ؟؟؟الا تذكرون عندما اخذنا اراء السنافر علي دستور قبيلتنا ؟؟وعايرونا بنتيجة الصناديق مع انهم اكثر من يعلم انها غير صادقة؟_

اومأ الجميع موافقا في صمت ...

وهنا قال السنفور "العبقيري":_ اذن فلناخذ الاراء من سيبطل؟؟وكيف..رفعت السنفورة الجميله يدها قائلة ساكتب في ورقتي السنفور العبقري..وقال المتحمس ساكتب في ورقتي السنفور صاحب بلياردو التيتي ...فضحك الجميع رد السنفور "المتحمس" ببراءة : لما تضحكون انه اكثر شهرة من الاثنين؟؟

وقام ثالث واقترح اسم السنفور "العبيط" واخر اسم السنفورة "اللعوبه" وهكذا الي ان استقر الجميع علي كتابه اسم سنفورا اخر ايا كان في ورق التصويت ...وفي يوم التصويت انتشرت الكلمه وعلم الجميع بالمراد وفهم الجميع ان شرعيه السنافر لابد ان تفرض نفسها ولو تلاعب الحكيم وشرحبيل او الكسول وعشيرته ...

اما عن راوي القصة فبعد ان انتهي من روايتها عليكم يا اطفال قرر ان لا يقاطع منعا لتلاعب شرحبيل او الكسول فقط سيذهب و يكتب اسم السنفور الشهيد الذي توفي وهو يدافع عن حق السنافر ضد الحكيم ورجال الزعيم السنفور المسن ...لانه الاحق بالذكر وبالشرعيه ....

والان دوركم  يا احبائي الصغار ما اسم السنفور الذي ستكتبونه في وريقاتكم الصغيرة؟؟؟ ولتجعلو الامر سرا بين السنافر وبينكم    (:

بين حمدين و ميا !!

مؤخرا مع زيادة الكلام عن الرئاسه ومن هو الرئيس القادم لمصر اصبت بحاله من الحماس الزائد المفرح بالنسبه لي لاني من الكائنات اللي لابد لها من الحماس لتحيا ..

بس ككل حاجة لازم يطلعلك فيها عفريت في الدنيا قابلت عدد كبير من الاحباطات من عيلتي ومن اصحابي ومن المعارف والحبايب والمجتمع والناس ..من نوعية ماتهمدي بقي ..اففففففف انتي مالك عامله كده ليه ؟؟

مش هاعمل أبو عرام وأقول اني كنت وتد في وش الريح الصراحة انا إتهزيت بس زي كل مرة كنت بتهز فيها كان ربنا بيبعتلي شاكوش يديني علي دماغي ويثبتني في الارض أكتر _بما إني وتد يعني_

الشاكوش اللي فعلا دقني فيه بصورة كبيرة ولا اعتقد اني هاتلخلع لفترة طويله بسببه او هكذا اتمني .. كان كالاتي:

من يومين بالعدد كنت مروحة من شغلي القاطن بدير النحاس المسماه  بمصطفي كامل

وكالعادة وقفت علي محطة سيدي جابر مستنيه الفرج باي مواصله مهما كانت ..

الفرج جه في صورة ميكروباص بسيط لكنه لامع و نضيف ..ركبت في المكان الوحيد الفاضي وهو كرسي الراكب الخارجي جنب السواق اللي هو بالمناسبه الكرسي المفضل بالنسبه لي في الصحرا..المهم ما اطولش عليكم  قولي طولي..شويه وكالعادة ابتدي الكلام في السياسه وكان بدايه الحوار عند واحد من الركاب

الراكب: هاتنتخب مين يااسطه؟؟

السواق :انتا هاتنتخب مين الاول ..

الراكب: عمرو موسي طبعا ..

فرد السواق كان :والرجاله راحوا فين ؟؟..

طبعا انا كركعت ضحك .. عجبني بشدة نظرة السواق للموقف بالبساطة والتسطيح ده .. اكتشفت طبعا بعد ثانيتين انه حمديني بسبب انه واهله ناصريين متحمسين بشده.. ساله الراكب تاني: ودة عمل ايه يعني؟؟ جاي يتعلم فينا الرئاسه ..

رد السواق بمنتهي البساطة للمرة التانيه: ولو انه متعلم لما طلع من عينه ..الا انه برضه هامشي معاك يتعلم فينا احسن مايعلم علينا ..

بعد مناقشات مشتركة دخلت في الحوار وبينه وبين الركاب ..انا عايزة اقولكم اني فوتت محطتي والمحطة اللي بعدها وفضلت اتكلم معاه لاخر الخط عن سياسه البلد دلوقتي وبرامج المرشحين واحوالنا الخارجيه  وكمان عن اعتراضي علي عصر ناصر في اجزاء كتيرة منه ليس منها حلم ناصر للبلد طبعا ...ومع انه ناصري اصيل ومن الهائمين بناصر..علي عكسي تماما.. الا انه وافقني واحترم رايي بمنتهي الديمقراطيه لما قلت ان مشكلة ناصر كان وجود العسكر وراه وكمان خلفيته العسكريه زودت الطين بله ..وان التريب ده هانتلافاه مع حمدين الناصري الخلفيه لانه مدني.

 ماكانش ناقص غير ان يبقي فيه موسيقي رومانسيه او إحدي أغنيات ليلي مراد الكلاسيكيه ليكتمل مشهد الإنسجام السياسي العاطفي الغريب ده.!!.

بعد اخر الخط كملت معاه عشان انزل في اقرب مكان لما يرجع يلف تاني والمرة دي مارضيش ياخد الاجرة لسبب قالهولي ببساطة منقطعه النظير برضه ..

_البنات الجدعه تتشال فوق الراس_

بصوا بقي..انا اتمدحت في حياتي بالعبيط بس فعلا  دي المرة الوحيدة اللي حسيت فيها بقيمة المديح وفخري الشديد بيه ...

وكان  تعليق السواق كمان علي مدي كم الشوادر الموجود للمرشحين في ظروف تبقي  يومين علي الصمت الانتخابي ..انه : كتير اوي مصعبين سكك الناس اكتر ما هي ؟؟ ليه بس كده؟

بعد ماوصلت لاقرب مكان لنزولي قال: اتشرفت بمعرفتك جدا

 قلتله :وانا كمان

ومد ايدة وصافحني مصافحة رجوليه واثقة كأنه بيودع صديق عزيز !!

الفكرة من الرغي دة كله مش اني بنت عبيطة بتحكي حدوث كهربا بينها وبين شخص ما...

الفكرة اني لاول مرة في حياتي اشوف الشغف بعنيا ..الشغف كلمه عايمه مالهاش اول من اخر بس في الساعه اللي ركبتها معاه اتجسد قدامي راس وايدين ورجلين ونفس ..

شغف غريب تولد من حوارعابر عن حمدين صباحي والانتخابات الرئاسيه بين سواق ميكروباص يساري و محاضرة لغه انجليزيه ليبراليه  مايعرفوش حتي اسامي بعض ..

و اني اندمجت مع السواق لدرجة اني حرفيا حسيت بكمياء غريبه بيننا وانه مثقف بشدة برغم انه شغال علي ميكروباص رغم انه علي عكس توقع كل الناس .. مفيش تناقض.

الانتماء السياسي او الاجتماعي لم يعني اي شئ في الساعه دي فقط الشغف كان هو الحكم ...

 هو الكركعه اللي خارجة مني لما قال ان  اخته الصغيره مصممه تنتخبه عشان وسيم!!

وهو السلام اللي كان مابينا ف ينهاية الحوار وهو سعادتي باني لاول مرة اقابل بني ادم متحمس لفكرة لدرجة الايمان ..

فانا لو كنت هافقد ايماني او حماستي بسبب عواجيز الروح اللي بيقولولي مالك متحمسه اوي كده ليه ماتتهدي بقي؟؟

هافتكر الموقف دة و اللمعه اللي في عين السواق وهو بيدافع عن فكره  مؤمن بيها ..

وافتكر اني ماشوفتش اللمعه دي غير في عنين حمدين ذاته وهو بيتكلم عن حلمه للبلد دي..

هافتكر ان الكلام ده مش كلام حرنكشي فارغ من بتاع رافت الهجان ومصر محتجالك يا جمعه ..والحوارات بتاعت خالتي بتسلم عليك ...

هاثبت علي موقفي وهتمسك بحقي في الحماس المشروع  ..لاننا لاول مرة من 30 سنه يبقالنا حق الحلم في ان البلد دي تتغير للاحسن. بجد

الخلاصه : انا  مش عايزاك تتخلي عن ايمانك بالقضايا اللي في قلبك.. وشغفك ماهواش ضحك او مجرد فضا دماغ زي ما هاتسمع من  عواجيز الفرح مهما كان اتجاهه: سياسي او عاطفي او حتي ديني..لان اللي يقول كده يبقي عمرة ماجرب الايمان بشئ..

 قلبي وعقلي مليانين تصديق بالبلد دي وبالبني ادمين اللي فيها واللي شاف اني افورت في حوارات الحماس يروح يحط دماغه تحت الحنفيه ويقرا مالأول

ونقولها للي فاته الكلام ومافهمش..

 انا صوتي لحمدين صباحي لسبب وحيد بسيط ..اني لقيت ايماني بالبلد وشغفي بيها معاه.. ..انتا بقي شغفك بيها مع مين ؟؟

بلاغة الاحا !!

 لن  اكتب اليوم عن السياسه ..مطلقا _خالص_ فقط سأحاول ان اوضح مدي اعجابي باللغه العربيه وخاصه اعجاز العربيه العاميه المصريه...

 لدينا الكثير من الالفاظ التي تطورت علي مر السنين لتصبح كلمات اما معيبه او غريبه في حين ان بدايتها كانت بسبب سياسي بحت _رجعنا للسياسه تاني..لا بس هاحاول احاسب_ مثل لفظة طظ القادمه من تاريخ السخريه من الاتراك في مصر بمعني كلمه الملح الذي كان معفيا من الضرائب فكانت الكلمه تقال للهروب بالبضاعه من الضرائب الي ان صارت سخريه من غباء الاتراك..ولفظه  احا ذات القصه الاشهر عن ظهورها اختصارا لكلمه احتج التي كانت ممنوعه ايضا لاسباب سياسيه!!_ربنا يستر_

ولن تدرك مدي بلاغه تلك الالفاظ وخاصه "الاحا " الا عندما تمر بما مررت به في الاربعة ايام الماضيه

في اليوم الاول كنت جالسه في منزلنا العامر واذابي اسمع _طشاش_ النشيد الوطني المصري قادما من بعيد_برضه سياسه يللا بقي هاولع في نفسي يعني؟ ..خربانه خربانه_

وعندما نظرت من الشرفه وجدت سياره جميله تحمل يافطات لاحد المرشحين لرئاسه مصر والمعروف بين اوساط الشباب "بالاستبن" ...السيد محمد مرسي وخلفيه صورته علم مصر !!

..ولانه في حال مثل هذا لا داعي للتفكير في حوارات طويله وتحليلات سياسيه او انسانيه عن علاقه السيد المرشح بالنشيد الوطني فلا هو الفه ولا لحنه ولا هو مرشح مصر والاخرون صهاينه!! فلم استطع الا ان اتعجب و  ادرك حقا بلاغة الاحا ..

في اليوم الثاني رايت في ميدان محطة سيدي جابر بالقرب من عملي صورتين ضخمتين بطول مبني سكني كاملا للسيد احمد شفيق تخبرك انه رمز السلم وانه رجل الافعال لا الكلام !!حقا انا اصدق هذا فالرجل فعلا لا يجدي الكلام مطلقا.. وبالطبع

في نفس اليوم وانا عائدة من منزلي رايت نفس السيارة التابعه للسيد محمد مرسي وربما كانت اخري ولكن هذة المرة تبدل بين النشيد الوطني وتسجيل لرجل ما ذكرني بالخطب التي اسمعها بعد صلاه العيد في فراشه الاخوان التي تنصب فب الشارع  ..يتحدث تقريبا عن المشروع وعن ان الاخوان هم من يحملون المشروع لمصر ووضح انه ليس اي مشروع بل هو مشروع النهضه..!!! وبالطبع بدلا من ان افكر واحاول ان اجد ردا مقذعا تذكرت انه لا داعي لاحتجاج كامل فهناك كلمه ابلغ الا وهي الاحا.

في اليوم الثالث وانا بالقرب من منزلي لابتاع بعض اغراض ا"لكيك" لامي مثل "البيض" وبودرة "الرفع " للخبيز .. وجدت صور السيد عمرو موسي عاقدا ذراعيه في عزم شديد وخلفه  بالابيض والاسود مباني شديدة الفقر والعشوائيه وطبعا الفلسفه الواضحة من البوستر المزين بعلم مصر الملتوي بشياكة كصاحب الصورة ان السيد عمرو موسي هو من يحمل الالوان لمصر موضحا بجمل قصيرة في بوسترات اخري صغيره متخذا مظهر اكثر_كاجوليه_انه تارة سيصلح التعليم وتاره الاقتصاد ...

وطبعا لم يفت علي بعد التوقف عند الكثير من تلك البوسترات ذات المعني المشابه لبوسترات الاخوان ..الا ان اتعجب واحمل البيض واتذكر بفخر بلاغه المصريين عندما لخصوا حياة عبثيه كامله بلفظة الاحا.!!

ما حدث فعلا في اليوم الرابع يستحق ان يروي  ..ففي ذلك اليوم رايت العديد والعديد بل العديد ايضا من الشباب والشابات _الاخوانيون بالتأكيد_ يوزعون صورا للسيد محمد مرسي ويتحدثون مع الناس محاولين اقناعهم بالتصويت له.

 وكذلك يقومون بتوزيع ارواق من ذات الطباعه الفاخرة اللامعه تحكي عن مشروع النهضة الذي سيطبقه المرشح عند فوزه _بأذن الله_ الغريب انه لم يحاول احدا ان يعطيني ورقه واحده مع انني مررت امام حوالي اكثر من عشرة منهم ربما لانني بدون حجاب؟؟ فظنوا انني مسيحيه او ربما وثنيه او ملحدة ؟؟او متبرجة او استغفر الله العظيم ليبراليه او علمانيه ؟ اليس هذا دخولا في النوايا .._بلاش_ هل الاخوان طرحوا مرشحا يترأس المسلمين الملتزمين فقط؟؟؟وعلي الساده من رودا المعتقدات الاخري  والمتبرجات معهم اختيار رئيس اخر؟؟

لم اتضايق فعلا ولكن ما هالني هو شاشه العرض التي تشبه ما يفعل في عروض كاذبون ومنهوبه بالضبط ..

مع صور ولقاءات لانجازات الحزب والسيد المرشح مصحوبه _لشده العجب باغنيه مليئه طبلا وزمرا وشخلله تتحدث عن محاسن المرشح وانه الرئيس المنتظر!! اليست المعازف حرام تقريبا ؟؟لانها صوت الشيطان او شيئا من هذا القبيل؟واذا لم تكن حراما لم رأونني متبرجه فلم يعطوني ورقا ؟؟ هل هم مؤمنون فلا معازف ام سياسيون فيحاولون اقناع ايا كانت خلفيتهم من المواطنين ؟ وسألت نفسي لم تتغير قناعات الناس بتلك الصوره  _المائه وثمانينيه؟_

ولا اتحدث عن المرشحين بالطبع وكون احدهم واقعا في غرام المشير والاخر كان سيصوت لمبارك ايا كان منافسه والثالث فوجئ بالترشيح علي كراهة منه ولكن الامر للمرشد وحده ..لا ليس هذا مقصدي ..انا اتحدث عن اللغة بالطبع ..لم بعد ان كانت لكلمه احا ذلك المعني السامي من الاحتجاج علي الاوضاع المعيشيه الصعبه علي المصريين ان تصير كلمه معيبه ؟؟؟ الم يتمني احدكم ان يخرس كل الرغي الدائر حاليا ويستبدل بكلمه احا؟؟ دعك من هذا اما كان من الافضل الا ترهق عينيك بقراءة هذا المقال الطويل وكنت انا اكتفي بكتابه تلك الكلمه العظيمه احا!!

حرب الكاريزما..

سنه 1960في انتخابات الرئاسه للولايات المتحده الامريكيه . ..تسابق جون كينيدي عن الحزب الديمقراطي وريتشارد نيكسون نائب الرئيس السابق ايزنهاور عن الحزب الجمهوري..وكعاده الانتخابات الرئاسيه في امريكا اقيمت  بين المرشحين  اربع مناظرات تقريبا ....

 وزي ما بنقول في مصر ..لو انت سمعت المناظرات علي الراديو هايتهيألك ان نيكسون افضل..

ولو انتا زي 70 مليون اتفرجوا علي اول مناظره رئاسيه تعرض في تاريخ التلفزيون هايتهيألك ان كينيدي هو الافضل..

الحدوته دي بقي حصلت ليه؟؟؟

لان ببساطة المشاهدة لأول مناظره كانت كبيره لا لشئ إلا لأن الناس كانت فرحانه بالمناظرات المعروضه لاول مره في التليفزيون !!..

نيكسون ماكانش واخد كفايته نوم ولا متمكيج ولا حالق دقنه!! ...فاللي شافه شاف شخص عنيه مدغمشه ..سنه كبير ..ومرهق جدا ..فحس بمجرد الرؤيه انه اقل من ان يفوز ...

الناس بقي لما سمعت علي الراديو ركزت في الكلام مش في كينيدي الشاب ابوكاريزما خارقه وزوجه انيقه..

فتأكدوا ان نيكسون هو الاصلح ..للاسف مستمعي الراديو كانوا نسبه قليله جدا ...

في المناظرات اللي بعد كده نيكسون اكتسح في اتنين واتعادل مع كينيدي في الاخيره ...

بس الفكره بأننا عايزين رئيس ذو كاريزما ..يملا العين قبل الودن ..تعارضت مع المنطق بان الاصلح يفوز مهما كان شكله... وده اللي خلى كينيدي يفوز بفارق بسيط جدا وهو 0.1% من الاصوات...

الفكره هنا هي انه ماينفعش نلوم الجمهور المصري في اول انتخابات رئاسيه  له علي الاطلاق بأنه عاطفي وبيحكم علي المرشحين بالاحساس  مش بالبرامج .

في الانتخابات رقم 44 لامريكا .متغير بسيط زي التلفزيون فرق من فوز عتل زي نيكسون ..

عشان اختار قائد لازم احس انه بيعرف يعمل اللي محدش يقدر عليه ..اومال هاسيبه يقودني بأمارة ايه ؟؟

التريب عندنا في مصر ايه بقي ؟؟

ان لاغلب المرشحين ..شخصيات وبرامج متقاربه لدرجة كارثيه..

فاللي بيختار علي اساس الاحساس هايوصل لنفس نتيجه  الاختيار القائمه علي البرامج الانتخابيه .

 بالنسبه للكاريزما:

لو المرشح عنده مدير حمله مخضرم يعرف من اين تؤكل الكتف ..ويعرف يوظف خصائص البرنامج بصوره تشبه عقليه المجتمع هايجبره انه يسمع...

انما "معظم" المرشحين ليسوا خطباء جيدين..ومش مهتمين غير بالكرسي ومش عايزين حتي يتعبوا شويه..واكاد اجزم ان مديرين حملاتهم غرقانين في شبر ميه زيهم بالظبط..

وماتنساش ان اغلب الشعب المصري في دماغه صوره للقائد اللي فيه شبه من ((ناصر)) شويه ..شكلا وروحا وموضوعا ..

شاب اسمر وسيم طويل شجاع خطيب بارع وجدع ..عارف هو عايز ايه ..بيدعم الغلابه ومحبوب منهم بصدق ..وحتي لو كرهته ماتقدرش تشيل عينك من عليه وهو بيتكلم!!

اغلبنا مش لاقي ولا صفه من دول في معظم المرشحين الموجودين ..اكثرهم عجائز مملين بكروش يبدو عليهم مابدي علي نيكسون من ارهاق .....الي جانب ثقه كبيره بالفوز..وللاسف ثقتهم بفوزهم عامل مضاد..من باب ..علي ايه يا حسره؟؟ 
اما الشباب اليافع فحدث ولا حرج ..لا كاريزما ولا تقدر تركز عينك عليهم اكتر من 15 ثانيه!

واللي يقول هاترشح ..مش هاترشح ..كأنهم يحسنون علي الشعب بترشحهم !

بالظبط  كما تفعل الراقصه بمعجبيها في الكازينو فتجعلهم ينتظرون في شوق!!

 اما بالنسبه للبرامج:

فكان ممكن لاجواء الانتخابات تكون افضل بكثير..خصوصا اننا اُمهلنا اكتر من سنه ونص!!

 كان ممكن يتم تحضير ودعايا لائقه..وتدريب للمرشحين علي عرض برامجهم ..بل وتغيير برامجهم عشان يبقي فيها اختلاف بجوهر البرنامج ويبقي مرتكز علي نقطه او نقطتين اساسيتين يتم تطبيقهم علي العموم  فلو حد سألك اوباما مثلا هايعمل ايه ؟؟ هاتقوله التغييييير وماتضطرش تحفظ عشر مجلدات لبرنامج اللي هايطلع في الاخر شبه برنامج تاني!

وماتبقاش الدعايه متمثله بس في فيضان بوسترات للمرشح  مايفضلش غير انك تلاقيه مطبوع علي جلدك!!

فلو انت بتتفرج علي التلفزيون وبتسمع الراديو وبتقرا الجرايد وبتروح مؤتمرات المرشحين ..هاتحس ان زيد زي عمر ..لان معظمهم واحد..مفيش فيهم كتيرالزعيم اللي ياخد بصرك وعقلك سواء بشكله ,كاريزمته او بمنطقه..

متساوون امام الكاميرا وخلفها .

مش بس بورنو ...دي كل حاجة حلوه..

بدأت القصه لما كان عندي 6 سنين ..اتفرجت علي فيلم غرام في الكرنك..

واسرتني جدا الاغنيه بتاعت العزبي ..هس هس اسكتوا لا تصحوها .

طبعا كانت الاغنيه عن الملكه حتشبسوت..الملكه الفرعونيه  اللي حكمت مصر القديمه 20 سنه بالتمام والكمال وعشان كانوا معارضين ان البلد تحكمها امرأه..عملت بنصيحة محمد نجم الشهيره ..انا أركَََب دقن واروح لابوكي...

فعلا ركبت حتشبسوت دقن وبطلت تلبس هدوم حريمي..عشان الكهنه يسمحوا لها بتولي العرش اللي هو اصلا من حقها لأنها كانت الوحيده من نسل ملكي بعد وفاه امها اللي هي كانت السبب في ان ابوها اصلا يبقي ملك لانه مش من عيله حاكمة وأم حتشبسوت هي اللي كانت اميره !

الخلاصه كل ما افتكر حياة حتشبسوت ..قد ايه حاربت عشان تحكم البلد وقد ايه اهينت لتترك الحكم بعد 20 سنه لان زوجها خلف تحتمس التالت من عشيقته  ...

بحس ان الغباء مالوش نهايه ..زي مستر اكس بالظبط.

 فيه ناس كتير مصممين ان منع المرأه من الحكم نابع من أمر ديني في حين ان المرأه تمنع من تقلد المناصب من قبل ظهور اي من الاديان السماويه التلاته...وده ليه ..لأن ببساطه شديدة المرأه كائن جميل..له اثداء (وهانش)..والرجاله بيعشقوها لأسباب لا علاقه لها بالعقل مطلقا...!!

فمثلا سيادتك ممكن تقبل ان عربيتك اللي عليها تابلوه يهبل ..تديرك في الشغل ؟؟اكيد لأ

الموقف الذكوري ده هو هو حتي ولو لا شعوريا.. وده موقف مفهوم تجاه اي واحده هاتعلن نيتها للترشح للرئاسه في الفترة دي ..او في اي فتره تانيه علي فكرة ..الموضوع مالوش علاقة بالزمن لان نظةه الرجال ما تغيرتش للمرأه في اي زمن ..

المرأه زمان كانت متاع..وبعدها بشويه صارت ملك يمين..ثم تقدمت فصارت جاريه..ثم تتطورت اكثر فصارت ام العيال..ثم وصلت للعالميه بأن صارت موديل لانجري مشهوره او فتاة اعلانات بميني جيب في اعلان لحاجة مالهاش اي علاقه بالمرأه من قريب او بعيد كمكن الحلاقه مثلا!

.بس فعلا الرجال لا يؤاخذوا في نظرتهم المتدنيه للمرأه عموما....لأن ده ببساطه تاريخ  وطبيعه  اينعم خاطئه بس طبيعه .اذا كانت النساء انفسهن بينظروا نفس النظره دي للمرأه المرشحة لمنصب سياسي او قيادي.. وده الموقف اللي لا يمكن تقبله ابدا من اي امرأه تجاه امرأه اخري.

 المشكله اني حاولت احصر اسباب رفض المرأه لنصرة المرأه برضه ..فلم اجد اسباب..؟؟ لا تصلح وخلاص الست مننا ايه من غير راجل يشكمها!!

والحجة دائما اي شئ مهين لعقليه اي بني ادم.. .

صوره عبثيه ...

لكن اطرف ماسمعت ان المرأه لايمكنها الزعامه لانها تأتمر بأمر زوجهاوهذا سيضر بالصالح العام..كما انها غير مؤهله عقليا للقياده! اه..والله عقليا وساعات عاطفيا كمان!

تعلمت مؤخرا مصطلها يدعي كره النساء او

Misogyny

والمصطلح تعريفه كبير بس اختصاره انه  طغياً علي الإناث في المجتمعات ذات السيطرة الذكوريه من نكات او تقليص للمرأه كرمز جنسي لا غير  او الاحتقار والازدراء اللي بيتم تعليم المراه انها تحس بيه ناحيه جسمها..

كلام كبير ..بس للاسف  اكتر كارهي النساء تطرفا هم النساء انفسهن!!

مش هانقول ان اي ست زي امك واختك والكلام العيان ده لان ببساطه الرجل  بيحب نساء عيلته جدا بس مش هاينتخب اخته او امه رئيسه عليه..حتي لو بتفهم احسن منه...فالموضوع مقفول من الناحيه دي!

ماينفعش تقنع حد انه يوكل إمرأه في الرئاسه بأنك تستعطف حبه لأمه هو بيحبها بس مش عايزها تترشح رئيسة جمهوريه..عايزها تطبخ له يوم مايعزم اهل خطيبته..

احنا للاسف ناسيين ان النساء كمان في بلدنا ليهم حق التوكيل..ماتنتخبيش المرشحه لو برنامجها مش عاجبك التصويت حاجة تانيه خالص

..بس علي الاقل اضمني لبنتك فرصه انها تبقي رئيسه جمهوريه ...

اعملي توكيل وادي فرصه لنفسك ولغيرك ان الراجل يشوف فيكي حاجات اكتر من مقاسات  صدرك و وسطك!!

ادي لبنتك فرصه يبقي عقلها اكثر جاذبيه مليون مره من مؤخرتها....

اسمحلي لشخصيتك تبقي ثري دي ويتشاف فيها اكتر من اللي كانت بتدور عليه  ماري منيب لابنها في لبني عبد العزيز..

ادعمي مرشحه امرأه بتوكيلك لان ده ليكي عشان مايتحكمش عليكي بالقبح لمجرد انك مش علي مقاييس موديلز اللانجيري اللي خطيبك معجب بيهم.

اعمل توكيل لامرأه عشان بنتك ماتبقاش سلعه يتقالها اكتر حاجة بحبها فيكي هي دي
 ..وعشان اللي اخدت خرطوش في ضهرها وهي بتجرك علي المستشفي الميداني ..محدش يسيب كل بهدلتها ويقول اه بس حتة بت مكنه...

التوكيل هايغير حاجات كتير مش مجرد رقم زيادة في ارقام المرشحين..لأ مليون زياده في حياه اي واحد او واحده ...مش بقول اديها صوتك ..الصوت للاصلح انما التوكيل للمستقبل.

انا هاعمل توكيل لامرأه عشان تدخل انتخابات الرئاسه ..لأني مؤمنه اني استحق اكتر من اني اتلزق علي علبة سمنه وخلاص او اني اطلع في اعلانات الحلاقه لابسه شورت وبحسس علي خد اللي حالق بسعاده غير مبرره!

معقول؟؟؟

لما قرأت الحكم في قضيه سميره عن كشف العذريه اللي المفروض يبقي اسمها قضيه هتك العرض العلني داخل الثكنات العسكريه.

ما استغربتش الحكم مش لأني عارفة ان استقلال القضاء وهم..ولا لأن المجلس العسكري لن يسمح بالإدانه ..لأ

السبب إن دي مش اول مره الناس تنكر علي الناجين زي ما بسميهم من حوادث الاعتداء الجنسي  حقهم..

انا مش هاتكلم عن سميرة لان في غيري افضل مني مليون مره اتكلموا عنها..

انا هاتكلم عننا احنا الناس اتلعاديه اللي مش في ايدها اي قرار..

التحرش مش حاجة جديده ..والناس هريته كلام في التليفزيون والاذاعه واتعملت دراسات نفسيه بالعبيط عنه..ودي معروفه للجميع..

المشكله في حاجة اسمها ..التحرش بالاطفال..او بمعني اصح الاساءه الجنسيه للطفل...ودي اشكالها كتير ..ايا كان مش مهمتي اني اعمل توثيق لحاله نفسيه مذكوره في الكتب من مئات السنين...

الجديد هنا ان الموضوع ده فعلا منتشر في مصر والمشكله انه ساعات بيقع تحت سمع وبصر العيله ومابيتحسش بيه..يعني مثلا التحرش بالاطفال الذكور في مصر له اهميه كبيرة وناس كتير فاكرة ان اللي بيتحرش بالاطفال ده _راجل شاذ وبيجرب مع الاطفال عشان الكبار هايدوه بالجزمة.

.للاسف الشديد ان معظم متحرشي الاطفال ان  ماكانش كلهم اسوياء في ميولهم تجاه الجنس الاخر. بس حب التحرش بالاطفال مرض مختلف تماما عن اتجاه الميول الجنسيه لنفس النوع سواء ذكر او انثي....او مايسمي بالشذوذ.

الجديد كمان ان نسبه كبيره من التحرش بالفتيات الصغار لا يعمل له حساب بالظبط زي الفتيات الكبار ..وللاسف كمان علي عكس التحرش بالكبار مش معروف ... زي التحرش بالاطفال الذكور مثلا

الاهم من ده وده...ان فيه حاجة اسمها التحرش الجنسي داخل الاسره ..انا اسفه اني بعطل اله دماغ سيادتك وبقولك ان اه نسبه كبيرة من التحرش بالاطفال بيقوم بيها حد من داخل الاسره ربما خال او عم ..وساعات اخ اكبر او عمه او خاله او جد واحيانا للاسف بيبقي الاب ...

الدراسات  بتقول ان معظمها في حالات ادمان المخدرات او الخمرعموما..لكن كمان في مرض اسمه حب الاطفال الغير سوي..ممكن يكون عند شخص ما تجاه اولاده اخوه او اخته الصغيره...

ابن اخته او ابن خالته او بنت الجيران حتي.. المهم انه طفل والسلام..

المتحرش مش دايما شخص مجنون وقالع هدومه.. بالعكس هو شخص سوي ممكن كمان يبقي مراهق وممكن يبقي اكبر من ابنك بسنتين تلاته بس! وممكن تكون انتا نفسك بتحبه جدا وشايفه شخص رائع

الموضوع ده صعب يكتشف لاسباب كتيرة منها ..الاطفال مش بتتكلم لخوف من عدم التصديق لانه شايف العيله واثقة في الشخص ده قد ايه..

او لانه  اساسا من العيله..

او لانه ببساطة المتحرش بيستغل حاجة الاطفال للانتباه وبيفهمهم ان ده نوع من انواع الحب فالطفل بيخاف انه يتكلم ليتم ابعاده عن الشخص مع ان دايما بيقي عارف ان ده غلط..وده اسوأ نوع لما الطفل يبقي عارف انه غلط بس بيحب الشخص ده لاهتمامه الزائف..

ولو الطفل عدي المراحل دي واتكلم غالبا بيتم تكذيبه ونسبة كذبته للتلفزيون اللي خرب دماغ العيال..

او لان الشخص اللي هو بيتهمه موثوق جدا علي الطفل لانه ممكن يكون حتي اخوه الكبير او ابوه!!

ولو تم تصديقه بيبقي موضوع يجب التكتم عليه لانه هايسئ للطفل ولأهله ..الا اذا كان الاهل متفتحين او المتهم من برا الاسره تماما كجار او صديق....

المصيبه كلها بتصب في صالح المتحرش اللي من العيله لانه لابيحاسب قانونيا ولا حتي داخل العيله لان الطفل غالبا مش هايقول...معظم الاطفال بيستسلموا لحد مايوصلوا لدرجة من القوه بتكون غالبا في مرحله المراهقة وبيبدأوا الرفض بشده وساعات عند الذكور ايذاء المعتدي جسديا..كنوع من قول انا خلاص مابقيتش اخاف!

الموضوع اوسع  من انه يتكتب في مقال..و منتشر بس علي الاقل بيعترف بيه في اماكن تانيه كتير وبيعاقب كمان...

 عندنا مش بنصدق ومش عايزين نعترف انه حتي موجود...الايذاء الجنسي صعب اثباته قانونيا بدون دلائل لايمكن توفرها وعقوبته هينه جدا لو تم الاثبات..فمابالك بالاطفال ؟

انت ممكن تدور بعدين علي مراجع لو مهتم بالقهر الجنسي عموما اوعلي الابحاث والحالات الكتير جدا اللي اعترفت بالتعرض له .سواء بالغين زي سميره مثلا او اطفال.

..

مش المهم انك تعرف اكترعن الموضوع...كفايه اوي تعرف انه موجود  ... واعرف كونك مش مؤمن بحاجة مش معناه انها هاتختفي ..

ادعم الناس ولو بفهمك ان فعلا في  مشاكل ابشع  من كونك مش لاقي وظيفه وشقه تتجوز فيها.

الدنيا مش وردي او للدرجة اللي فيها تصديقك لوجود حاجة زي دي ممكن تعكر صفو مثاليتها عليك..

الايذا الجنسي بكل انواعه اعنف انواع الايذاه لانه بيتعلق بالقهر وهدم الشخصيه من اساسها سواء للكبير او للصغير ..

الاسوأ منه ان يتم انكاره ..والاسوأ ان يتم دعم وتصديق الانكار ده..انتا كده بتقتل بني ادم كل جريمته انه حاول ينقذ حياته او حياة غيره.

...ماتنكرش علي البني ادم  حق الكرامه   

.ماتنكرش علي اي حد حقه في انه حتي يتكلم عشان يشيل جبل من علي قلبه..ماتخليش الناس تكدب علي نفسها عشان عالمك المثالي الوهمي مايتهدش ..

ماتخليش حد يبكي بسبب نكرانك انه اتأذي..ماتشاركش في اذيته ..بكلمه..

معقوله؟؟ انا مش مصدق .

الكفر صَنعَه

The Death of Socrates by Jacques Louis David

كون صوابعك مش زي  بعضها وكون كل واحد فيهم ليه بصمه مالهاش زي في الكون ..وكون( دي ان إيهك الDNA  بتاعك يعني)

مالوش مثيل في البشر كلهم ..دي مش حاجة جديدة ..لان البشر نفسهم مافيهمش اتنين زي بعض ..واعتقد دي الحكمة من اختلاف البصمات ..مش بس مسك الحرامية والمجرمين القِراريين..

فببساطه اتفقت معظم المجتمعات الانسانيه علي وضع قواعد كلاميه او اعراف بيظنوا انها بتحافظ علي وحدة المجتمع بتاعهم ايا كان نوع المجتمع ده عربي غربي هندي حتي عشان مايبقاش الاختلاف مفرق للمجتمع..وجرت العاده ان اللي يخرج عن الاعراف دي ..اما مجنون او كافر...

مش مجرد الخروج دينيا علي ثوابت اي مجتمع هي الكفر يعني زي ابراهيم وموسي وعيسي عليهم السلام ...لأ الخروج علميا او اخلاقيا كمان كان بيحكم عليه بالكفر..الاختلاف في الرأي ساعات بيبقي كفر برضه...

طب ليه فيه ناس بتصمم انها تقول رايها؟؟وانها تخالف شرع المجتمع؟؟مع انهم عارفين العاقبه ؟

ده لان  من اهم ثوابت المجتمع الانساني إفقاد افراده الثقة في نفسهم او في قدرتهم علي التميز عشان نبقي دايما كلنا في الهوا سوا.

يعني انتا احسن لك تخفي تفردك لانك شاذ ومش هاتفلح!! وعيب وغلط وحرام انك اساسا ماتبقاش زي ابوك وجدك وجد جد اللي جاب جدك!

المشكله ان خالف تعرف مثل مغلوط  جدا بس بيعبر عن رفض المجتمع للتميز الفردي.

 ..احنا اصلا مختلفين خلقه..ربنا ماخلقش اتنين زي بعض.. عشان انت تخالف لتعرف!!

بس الحالتين واحد .. ثقتك في نفسك لو زادت او اختفت هاتسعد بتفردك لانه بيميزك اما عن غيرك من البشر و اما عن مجموعة ناس بتكرههم لانهم رافضينك زي مانت وعايزين يحولوك لنسخة من حد تاني.

.اما لو انتا زي السواد الاعظم من البشر بتحب الانتماء وبتكره العزله فانتا هاتخفي تفردك لانك هاتعتبره شذوذ عن المجتمع اوكفر بدين المجتمع وانتا طبعا مش عايزهم ينبذوك ونفسك تنتمي و لو علي منطق فاسد.

مثلا السيد سقراط بعد ان كان دلوعه المجتمع والنظام السياسي السائد ..حكم عليه بالموت مسموما ..لانه اغضب الحكام بافكاره المشجعه للناس علي التفكير الذاتي المتفردواعتماد المنطق في كل الامور ..واولها السياسه.

 اتهمه احد المواطنين(( الشرفاء)) بالكفر بالالهه وبإدخال شياطين جديدة الى المدينة..وطبعا كان الحكم بأغلبيه تصويت 280 من اصل500 قاضي أًُحضروا له خصيصا.... بالموت عن طريق السم لثبات تهمه الكفر.

فيلسوفي المفضل ابن رشد  علي كل انجازاته في اغلب العلوم الانسانيه الا انه اتهم بالكفر في اواخر حياته برضه ولم تشفع انجازاته له  عندما قرر الحاقدون اتهامه بالتهمه الجاهزة للتصديق عن اي  واحد بيفكر غير الباقيين وهي..برضه الكفر ...فنفاه المنصور وحرق كتبه كلها ولما عفا عنه ورجعه لقرطبه ..الراجل مات بعدها بسنه  وكان برضه مالوش كتاب واحد  متداول بشكل قانوني.

وعشان كده برضه الشيوعيه عوملت بمثل ماتعامل به العلمانيه والليبراليه حاليا في عالمنا العربي رغم ان كلمه ليبرالليه مشتقة من الكلمه الانجليزية ذات الاصل اللاتيني liberty  وهي ماتعني حريه..اي انها ماينفعش  تنضم (للكوليكشن الرائع ده)

المشكله الاكبر بقي ان خلفيتك مش مهمه ..اعمالك..افكارك مهما كانت بناءه برضه مش مهمه ..لأنك في النهايه هايتم اتهامك تهمه لافرار منها..الذكاء من الناس دي انهم مش بيقولوا فلان كافر ..حيقولوا مثلا..الليبراليه  كفر

..فطالما انتا ليبرالي ..فلاتهم صلاتك ..ولا يهم ذهابك لكنيسه او لجامع ..فلا فرار من التهمه 

المثقف كافر..والمتميز كافر..وجاليليو كافر لانه قال ان الارض هي اللي بتدور حوالين الشمس..مع ان علاقه ده ايه بالدين ماحدش يعرف!

انت مش كافر والدين مالوش علاقه بالموضوع ولا الناس في دماغها الكفر بالله اصلا ..

انت بتمس فرديه المجتمع بس ..انت بتمس ثقافه القطيع..اللي عندها استعداد تدوس علي اي حاجة تفسد حركة القطيع الجماعيه ..انت بتبين ان البني ادمين غير بعض ..فمعني ده ان انا كمان المفروض يبقي لي فكر مستقل بما اني غير اي حد
بس الاسهل اني ابقي مع القطيع..الاسهل اني ابقي من ضمن حتي لو كان لايناسبني داخليا...او زي مابيقول الاجانب ..

Misery loves company او البؤس يحب الصحبه ...

التفرد بيهدد سلامتي الشخصيه وبيهدد نظرتي لنفسي علي اني بتصرف كده عشان علي دين ابائي..

فالاسهل من ده كله انك انتا تبقي انتا الكافر ..اتحلت المشكله ..انتا في النار وانا بطل ومؤمن وكلنا هانخش الجنه كقطيع برضه وانتا لوحدك اللي هاتولع.. مش لانك مختلف بس لانك بتصرح بإنك مختلف.

خبط بالعقل!

من اولها كدة انا مش من هواة ادعاء الحكمه المتأخرة..

يعني من الاخر انا زيي زي ناس كتير ماكنتش اعرف حاجة عن خالد علي مرشح الرئاسه الجديد اللي بيقولوا عليه يساري ولو اني ضد التصنيفات الغريبه دي..!

فانا مش هاقول ده ممتاز لاني عارفاه وعاشرته عشرة الاخت لاخوها التوأم..ولا هاحاول اطلعه بصورة اللمبي لما المدام قالتله يور ماي هيرو..ولا حد هايموت في هواه بعد مايخلص قرايه...

وبرضه مش هانهي البوست بجمله انتخبوا خالد عالي  للرئاسه عشان حلو وعليه سكر..انا بس هاقول كلام سمعته بكثره في الموضوع ده..

كونك تنتخب خالد علي , حمدين صباحي, او ابو اسماعيل او حتي احمد شفيق دي حاجة راجعه لقناعتك الشخصيه بقدرة المرشح ده علي تحقيق حلمك لمصر بأنها تكون افضل...

اما كون ان فيه ناس بتهاجم مرشح بعينه لمجرد انه(مين خالد علي ده اساسا)..فهو ده اللي ماينفعش في فتره زي اللي احنا فيها دي...

لأن ببساطة شديدة مفيش حد فينا كان نايم في حضن واحد من باقي المرشحين او يعرف عنه القدر المفيد او حتي الكافي من المعلومات ..بس المشكله ان فيه ناس كتير مصممه ان طريقة اللي نعرفه احسن من اللي مانعرفوش...هي الانسب لاختيار رئيس جمهوريه

حتي لو كان اللي نعرف  ده...نعرفه بالشكل بس!!

مشكله معظم الناس مع خالد علي انها ماشافتهوش قبل كدة..ماسمعتش عنه_زيي بالظبط علي فكرة_ فجأه طلع..

بس دة زيه زي احمد شفيق..يعني احنا كنا نعرف ايه غير انه وزير الطيران وبقي رئيس وزراء لمدة شهرين إلا..ثم باي باي..؟

ابو اسماعيل.محامي وداعيه ..تعرف عنه ايه برضه؟؟؟

طيب حمدين صباحي؟..

.وناس كتير ماتعرفش عن العوا غير انه اخوان..اوحاجة زي كدة...

 البرادعي  قيل عنه انه المرشح البراشوتي؟ لانه برضك غير معروف لعامة الشعب ..اللي هي اساسا هاتنتخب

بس دول علي الاقل احنا نعرف اشكالهم..والله فعلا ناس كتير قالولي كدة؟؟
هي الفكرة في الريس انك تبقي متعود علي شكله في التليفزيون او في الجرايد؟؟؟
طب مانجيب جمال ولا مبارك بقي ؟؟؟لو هي دي الفكره ؟

خالد علي ناشط حقوقي ومحامي له وزن ثقيل في اوساط النقابات العماليه وحقوق العمال وقضايا الخصخصة ضد الحكومة.. ...و هو كمان رئيس حاجه اسمهاالمركز المصرى للحقوق الاقتصادية والاجتماعية

 بس كان بيشتغل اندر جراوند زي مابنقول..مع الناس التحتانيه اللي هما انا وانتا وابوك وامي ...

انا قريت عنه وعن قضاياه كتير بعد ماطلع اسمه كمرشح واتفاجأت انه هو اللي مسك قضيه خصخصة التأمين الصحي اللي شغلت بيتنا لمده طويله بحكم عمل امي...

انا عرفت عن خالد علي اكتر من اللي عرفته عن حد زي عمروموسي مثلا...لأني عايزة اعرف معلومات عن مرشح رئاسه مش بنقي موديل او عريس..

الناس بتقول ترشيحه حلم ..المؤيدين له بيقولوا..من حقنا نحلمه..ويمكن يتحقق بنسبه كبيرة...

والمعارضين بيتكلموا بمنطق خليهم يحلموا..الحلم مش حرام!!

لكن المشكله اننا حاليا مش محتلين ولا تابعين لحكم اي امبراطوريه او خلافه..فللأسف بعد ماعملنا الثورة مش لاقيين واحد الباني نمسكه البلد.. واحنا اساسا عندنا عمر مكرم؟

احنا حتي فقدنا قدرتنا علي الحلم بواحد زي اوباما من سود البلد اللي اتهضم حقهم من زمان...احنا السود بتوع مصر ..احنا الفقرا والمتغلبين والمضروبين علي قفانا..احنا الاقليه مع اننا اغلبيه..

ومش معني ان اوباما ماكانش في شهرة كلينتون...انها كسبته..بس عشان الناس فكرت في الاصلح وفي التغيير...

من حق البلد دي تغير..من حق البلد دي تجازف بحد من مطحونيها طالما هي كده كده كلها مجازفه بخالد او بغيرة من اللي علي الساحه ...

خالد علي ليس اقل من اي من المرشحين...وكونه صغير في السن بالنسبه للباقيين..ده يديله ميزة الحراره والسخونه في الدفاع عن حقوق البلد...ويغنيه عن الخبره اللي الكثيرين بيتشدقوا بيها وكأنها لبانه من السحري...

ازاي نطلب مرشح صغير ومدني ..ودم جديد ومش من النظام السابق...ومس متلوث ولما يجي واحد فيه كل ده ..نقول اصلنا مانعرفهوش من النظام السابق وصغير علي الرئاسه ..ومش معروف؟؟؟

المطلوب بقي ننزل اعلان زي اعلانات الوظائف اللي بتجنن الشباب دي؟ ..مطلوب رئيس حديث التخرج ذو خبرة لا تقل عن 30سنه ولايزيد سنه عن 45 عام؟؟

وبالنسبه لنقطة تفتيت الاصوات...ده علي اساس ان فيه مرشح اسرائيلي مش عايزينه يكسب فبنجمع الاصوات ضده؟؟

هي دي كمان فيها تفتيت وليبرالي واسلامي؟ ....الاصوات مش هاتتفتت لو الناس عرفت يعني ايه انتخابات رئاسه..ويعني ايه يبقي عندنا اكتر من 10 مرشحين فيهم علي الاقل 6 ماينفعوش ومش بيذكروا اصلا ...

الانتخابات مش معناها واحد مطلق..زي ما اليمن عملت وياخد 99 في الميه من الاصوات؟جابوا واحد توافقي وقالوا هيييييييييييييييه وانتخبوا وزيطوا...بس هل فيه تغيير؟

ياريت ماننساش ان البلد قامت بثورة..وماينفعش نغلط نفس غلطة عمر مكرم...شيل خورشيد وحط محمد علي

لازم نختار وندور وندي كل واحد فرصته ...مانقفلش الباب لان اصلا شروط الرئاسه معقدة كفايه فمفيش داعي نعقدها علي نفسنا اكتر...ونخلي واحد كان ممكن يعمل حاجة يمشي لمجرد اننا مش متعودين عليه او وشه مش من النوع المألوف!

اسمع..وفكر...وقرر.. وخد من خالد زي ما هاتاخد من العوا وابواسماعيل وموسي وصباحي..وحاول تفهم انك بصرف النظر عن اللي وشوشهم اتحفظت في التليفزيونات..

انتا برضه ماتعرفش عنهم حاجة لأن ببساطة مفيش حد فيهم كان ريس قبل كده..ففكر بعقلك وصوت بأيدك مش بعينيك وذاكرتك البصريه

وماتعملش زي حسب الله  لما خبط بدماغه علي الباب..لما ريا  قالتله خبط بالعقل..

المرشح الغير محتمل

بلغني ايها الشعب الفطين ذو العزم المتين ..والصبر الب*ين

انه كان ياماكان في سالف العصر والاوان..
طفل صغير برئ واسمه احمد بن الفشيق
كان الفتي عاشقا للطيران والبنبوني..كعشق بيتهوفن للموسيقي السمفوني
..
وكان يحلم بان يصير عسكريا قدير.. يشارك في المهمات الحربية ويطير..
مرت الايام وشب الطفل الحالم بالامجاد..فالتحق بالكليه الجويه عام 1961 بعد الميلاد

وكان له من اساتذته نظرة محلله..هذا الفتي ستصير له سمعة مجلجله
ومرت السنون ونْسيت الاحاديث وحصِِّّّّل الفتي علي الزماله من باريس

.. ا..ومرت الايام مرة اخري في تواكب.... وتولي الفشيق العديد من  المناصب.
وكان ماكان من هوجه خمسه وعشرين ..وحديث الرجل عن علاقه البنبون بالثائرين

كان قد وصل يومها لمنصب رئيس الوزراء...وهو منصب كان يعد رفيعا في غير تلك الاثناء
كانت مشكلات المنصب جساما والوضع كان متنيل...مش زي ماكان بيلعب بالطيارات وهو لساه عيل

وبعد ان توسم فيه شعبه القليل من الامل...كانت حركة نداله منه في موقعة الجمل
صدم الناس ولم يجدوا تفسير... وطالب الجميع باستقاله حكومة التسيير...

وبعد تنحي الرئيس الضيف...:)بانت العمليه وكأنها بقت ميه بيضا .. علي نضيف
ولم يدري الغلابه ما سيدور مع العسكري من سجال...ولكن هذا في الحديث له مجال غير المجال...

الفائدة ان الفشيق استقال مع وزارته المدمجة...و كالعاده لم يبقي منهم سوي "فايزة ابو النجا"

وقال الجميع انه بعد دوش الاسواني... لا بد اننا لن نري وجهه من تاني...
وظنت الجماهير انه بالتأكيد اعتزل السياسة ..حتي فوجئوا به يعود..مرشحا للرئاسه؟؟
 فضرب العامه والخاصة كفا بكف...وقالو لابد وان عقل الرجل قد خف

كيف يظن ان يصير رئيسا للجمهورية وقد طرد من الوزاره بعداتمام  الشهر بشويه

وطرح في المجال سؤالا وجيه...: هو جنس جبلة ملتك ايه؟؟

الم يكفيك مسخرة الكتاب والاحتجاجات ..والتهزيق اللي خدته عالهاشتاجات؟؟..
ام ان السيد الفشيق ليس له من العقلاء صديق..؟؟

وظل الناس في حيرة من امرهم..لايدرون يمينهم من شمالهم
هل نضحك وننكت ونتويت ونفتري؟؟ متي سيفهم اننا مش عايزين يحكمنا عسكري!!!!؟؟
..
ونظر الجميع لوهله لبقيه المرشحين...وضحكوا وقهقهوا..علي هذا الاسفين
فلا احدا منهم يملأ اعين الامه العظيمه...كلهم شمال بلاقافيه ولا واحد فيهم عليه القيمه

وفطن جميع من بالبلدة للافيه البهيج.....انه لا انتخابات من اصله وده كله تهريج

والسيد الفشيق مؤد بارع لدورة في المسخره
حتي لا يبدو العسكر نسخا مكرره

فمنهم من يكركب المصارين بطلته البهيه.....ومنهم كالفشيق من يرفه عن الرعية

وليعلم الانسان ان الفشيق من ضروريات الكون..وليتأكد المؤمن انه يخلق مالا تعلمون!!!
وسواء كنت مؤيد لحكم  الجيش والعسكر او غير.... فالفشيق اكد نواياهم بعد معاشرته للمشير

فهذا الرجل اسطوري يستحق سلسله كوميكس...لكونه الرجل المناسب للساعه ومش اي ساعه ..دي روليكس!!!!

وبناءاً عليه

لقد قمت بكتابة بوست سابقا لهذا تعقيبا علي حاله الحزن الاستثنائية التي عمت مصر بعد مذبحة بورسعيد ..

يحكي انه اتفق الجميع علي ان البلد اصيبت بحاله من الاحباط .....والحداد المزمن والاكتئاب والعياط

..فنحن لم نر هذا الحزن في مصر من سنين ............... بالتحديد منذ نكسة سبعة وستين..

ولكن شاء العزيز المقتدر الا تكون حياتنا كلها كدر في كدر...

فلقد قررالشعب منذ زمن ليس بعيد ان يقوم ببعض الانتخابات ويعيد...

فأحضر بعض رجالات السياسة  الشداد...ليكون بيدهم سلطة رفع الفساد..

وصال الخناق بين الناس وجال.......هل ننتخب الاسلاميين ام الليبرال؟

ولكن هذا لم يفرق مع الفوترز بذره...فقام بالتصويت من جوه ومن برا...

ودارت الايام وجرت كالماء..حتي وقعت تلك المذبحة الشنعاء

اكثر من سبعون من خيرة شباب الالتراس...راحو فأكل في لحمهم كل م**ص

واتت تلك الحاله من الحزن التي ذكرناها .........لتخيم علي كل مدن مصر قبل قراها

ولا خرجت كلمة ولا مزحة ولا حتي لطمة.......فكان الشعور الاعظم هو شعور الصدمة

وبدا ان الفرح لن يعرف دربا لقلوبنا... ...واننا معذبون الي يوم مماتنا

حتي كان انه في يوم من تلك الايام القاسية... تذكر احد الشطار الانتخابات الماضية

وقال في عقله بتفكير مكير,,هيا نعقد المجلس لعله يكون لشهدانا  نصير...

فيفرح الناس من بعد ضيقهم ..ويعلموا ان مجلس الشعب صار صديقهم...

وانعقد المجلس وبدات الجلسات ...بما لايخالف شرع الله بالذات...

وكان الحل حقا في اجتماع الساسه في مواعيد مقرره...لان الشعب من ساعتها لم يكف عن الكركرة

زالت حاله الحزن فجاه وبدون انذار...فصار الضحك يباع في الاسواق بالقنطار...

وفرح الشعب وهلل وزيّّط...بعدما كان حزين بيصوت ويعيط

فالمجلس ولا حلقات مسلسل فريندس...ولا اللمبي في زمانه ولا كرمبو وسحس

النواب غايه في الطعامة والذاذة ...زي مايكونوا في مارينا بياخدوا...اجازة

واللجان نازله انعقاد تقولش مهرجان اللجنه للجميع......وصار ت اخبار الشهداء والقصاص في الوقيع...

كان الالتزام الشديد باللايحة والرولز....ووزع علي النواب بونبوني ماركة هولز

وتعارك  النواب باسلوب فروسي وباروني....ليه هو ياخد وانا ماخدش بنبوني؟؟؟

وتذكر الجميع محاربي الفساد وحاملي الامانة......وتم التصفيق عندما نعت البرادعي بالخيانه

ولكن الجلسات لم تكن خالية من "الشك" والبطع...فلقد اعلن احدهم انه جلس علي مسمار فبنطلونه اتقطع!!!

واستشعر الجميع ان هذا مجلس  ملئ بالحوار الفكري.... وخاصة ((حوارات)) العضو الكبير مصطفي بكري

ومحمد ابو حامد تم تسفيه كلامه..يستاهل مش ليبرالي؟؟ ده لابد من اعدامه

وانتقلت اللجنة ولحقت  احتفالات الغاز في الساعة الاخيرة.....وصفق لوزير الداخليه علي عدم استعمال ذخيرة

وتم اعلان خبر انتظرناه من زمان ..ان الاسلام اخيرا فتح البرلمان...

واذن مؤذن انه قم للصلاة ولا تكن لنفسك ظالم.............وبعد الاذان ردحوا لبعض ردح عوالم

برر الشيخ انه يدعو للرياض...فقال له الكتاتني بحنكة..اقعد يااض

وقام من بعده شيخا اخر ليصحح...وقال بما معناه ..مش هاتفهم اكتر مننا ..اتلقح

وضحك الناس وهتففوا في المظاهرات....زادكم الله حظا ياحضرات...

وانهالت الدباديب وباقات الورود علي نواب المجلس الموقر....فهم من اخرجونا بتفاهتم من هذا الحزن المسكر

وبناءا عليه علم الجميع فائدة التصويت في المرة. الاولي...وندم من لم ينزل ليدلي بصوته في مجلس الشوري..

فهذا المجلس هزم بشدة المجلس اللي فات ...ولابد ان تتخلل اجتماعاته بعض الاعلانات...

الجميع يصفقون بشدة وحراره...دون اي تبرير سوي فقع ال............هع ..المرارة

فلا تشاهد اذن مسلسلات الهزل والبواخه......ولتتابع المجلس فهواصلا لكل وساخه

..

وبعدما قدم الشعب رساائل الشكر والجوائز....وشكر شباب المجلس قبل العجائز

ابتسم الجميع علي هذا الفُجر والفتي والعبط.......وصرخت امهات الشهداء عليه العوض ومنه العوض
وقرر الجميع القيام بالانجاز....وصار سلوجان المرحله...فلتتحدث 
في البوتجاز.

حداد

اتذكر من عام مضي انني بكيت ..بدايات الثورة بكيت فرحا ثم في موقعة الجمل بكيت حزنا

وعند كل خطاب لمبارك...بكيت غيظا...

ولما رايت صور خالد سعيد ..وقتلي ماسبيرو ...بكيت فزعا..

وفي احداث مجلس الوزاء ..بكيت كمدا...

ولكنني لا اذكر ان رأيت امي تبكي في ايا من هذه المناسبات ..المفرحة فعلا...!!

فقط كانت تعلق بغيظ او غضب او تبدي رايا سريعا ..وتتماسك وتنهي كلامها بحسبي الله ونعم الوكيل ..او حتي ربنا ينتقم منهم..

فقط كانت تحتضني عندما اصاب بحاله من الهستريا ..كما حدث لي عندما رايت صورة جثة خالد سعيد !!

اليوم كان الامر مختلف...تماما

لأول مرة منذ قيام الثورة واحداث العنف وكم الجثث التي نشاهدها علي التلفاز وفي الجرائد ..رايت امي تبكي!

بكت فعلا ..بحزن وحرقة لا لمدة طويلة ولكنها بكت فعلا...فاجأني هذا لن انكر...

تجمعت الدموع في عينيها واحمرت مقلتيها وهي تستمع لتفاصيل الهجوم علي استاد بورسعيد ..او كما تصفها هي مذحة القلعة الثانية..

تشبه مافعلة محمد علي بالمماليك...قالت هي..لقد لحموا الابواب...الفجرة وقفوا وشاهدوهم وهم يقتلون..بدم بارد!

وبكت...

قالت لم ار في حياتي فجرا كهذا...

انا حزنت وبكيت واحمرت عيناي وانفي والتهبتا بشدة..ولكن هذه هي عادتي..واعترف بهذا

انما عهدي بتلك المرأة دوما الثبات الانفعالي في المصائب بصورة ربما تكون مستفزة ...هي من علمني معظم التفكير المنطقي وعدم الفزع في المواقف الصعبه...

هي نفسها جلست تبكي بحرقة وانفعال ..وهي صامته...

لا ادري لم كان علي ان اكتب هذا او ان اذكره حتي ..ولكن مصر لم تعد كما كانت...

لامزيد من النكات..لا مزيد من المزاح

كف الناس عن الضحك فجاه.......

لا اغاني حماسية....لاشئ...

فقد الوطن طبيعته كما فعلت امي...فقط لاشئ غير السواد والحزن.

الاعلاميين في التلفاز ارتدوا الاسود...

..حتي الطلبه الذين احاضر لهم ...ارتدوا الاسود...

تدخل مصر دائما في حداد ولكنها دائما ما تجد مخرجا..

..جمله ساخرة...اغنيه غاضبةهذه المره اختلف الامر ..تماما

مصر توقفت عن الضحك...وهذه سابقة