بنت حوا..

عزيزي ابن ادم ..
تريد النساء في حياتها العاطفيه واحدا من اختيارين .... اما رجلا .. او ذكرا !

فإذا لم تكن رجلا بما فيه الكفايه لتعتمد عليك وتخفي همومها واعبائها خلف كتف افتراضيه وفرتها لها عن طريق منحها شعورا حقيقيا بالامان;
فعليك ان تكون ذكرا تزاوجيا لا مثيل له ... وحتي هذا قد لا يكفي تماما ..

واذا لم تكن قادرا علي ان تمنحها احساسا بالاكتفاء البيولوجي لأي سبب كان ... فعليك ان تكون صقرا لا يشق له غبار .. اسدا سيصارع كل الوحوش الخارجه من العاب الفيديو جيم ليبقيها امنه..وحتي هذا قد لايكفي تماما ..

فالحقيقه عزيزي ابن ادم ان النساء كائنات طماعه في حبها .. تريدك رجلا وترغبك ذكرا ولن ترضي رضاءا كاملا بغير هذا وذاك معا..
فلا تغتر عندما يخبرونك بسخريه عالمقهي كحلا لمشاكلك معها : "انهن لا يفقهن حرفا عما يردن" ... ولكن لتعلم انهن يعلمن تماما .. فهن يردن الكل وليس الجزء.

فاذا كانت امراتك تساورها الشكوك حيالك ولا تدري اتبقي معك ام ترحل وتحيل حياتك الي حجيم مستعر من البكاء ونوبات الغضب وغيرها ..فتأكد انه انت من ينقصك احدي الاختيارين السابق ذكرهما .. وهي فقط تحاول لفت انتباهك ...

فلا تشغل بالك بالمقابل الذي ستمنحك اياه لانه اكبر من قدراتك علي التخيل

فلتتأكد من ذكورتك قبل ان تتباهي بها .. وارجوك لتتحقق من رجولتك .. قبل ان تصدر احكامك ..
ولا تدفن رأسك في الرمال موقناً انك اكمل الكائنات .. وانهن ناقصات العقل والدين .

انتقال

اشتم رائحته وانا اخلع ملابسي .... ويأتيني عبيره وانا اطوح بها علي فراشي ..واتذكر:

في البدايه لم اكن اتقبل تلك الرائحه ابدا ...

 مزيج غريب من عطره ورائحه سجائره وعبير شعري.. انتقل اليه من كم المرات التي ارحت فيها راسي علي كتفه .

في البدايه كرهت ذلك المزيج الغير متناسق .. ومالبثت ان اشتقته ..فأدمنته ؟؟؟ وصرت اتعمد استنشاقه فور ان اراه ...

يضحك هو ...ناظرا لي ببراءه ..متسائلا عن سبب ذلك النفس العميق الذي ادخلته صدري بالقرب من ملابسه ..

ابدا لا افسر .. فقط اكررها عند رؤياه كل مره...

في البدايه لم اكن افهم ... وكرهت كل مستحضرات شعري التي تشارك فيه ..

والان صرت اتعمد ان انقله اليه ليُخلّّق المزيج ... تسللت الرائحة لجلدي لتصير رائحتي السريه

اريح راسي علي كتفه واغفو ... تماما..

 اغفوا كما لا اغفو في امان فراشي الوردي الوثير !!

ولا يتحرك كي لايوقظني ...واستيقظ لاتعجب؟؟

كيف ولم انم بالامس في ظلام وهدأة الليل ودفء فراش اعددته بيدي ,

ان اسقط غافيه في صخب وزحمة الصباح .. علي كتف.. لايميزه من الدفء سوي انه له ؟

........................................................................................................................................................

اشتم رائحة شعرها وانا اخلع ملابسي .. مختلطا برائحة عرقي !

حقا لا احتمل رائحه ملابسي الان الا معبقة بعبير شعرها ونفحات عطرها التي انتقلت اليهم.

كنت قبلا لا افهم لم تغيرت رائحتة ملابسي .. وربما رائحتي انا ايضا ؟

ثم فطنت للسبب وانا اتشمم راسها المستريح علي كتفي وانظر لعينيها الغافيتين بامان تام.

انها هي.. صار عبيرها هو عطري المفضل..

لكم تمنيت تلك اللحظة .. ان يشعر احدا بالامان بسببي وان يكون هذا ال"احد" .. هي وحدها

في البدايه كنت اتافف من راسها .. ثقله لايريحني ... ثم تعودت دفء خدها .. فاحببته فأدمنته

وصرت اقدم لها كتفي لترتاح .. املا ان ينتقل عطرها لملابسي ولكتفي دفء وجهها!

كيف صارت لي كل تلك الاهميه في الحياه؟؟ كيف اصبحت ابتسم مغمورا بالسعاده لاشياء تعودت ان تضحكني سخرية من قبل ؟؟

كيف احلم بتقبيلها فقط لانعم بالمزيد من الدف والعبير المنبعث منها ؟؟

اختزلت النساء في واحده .. ولكن كيف اختزل مخلوقا كهذا كل الرجال في شخصي؟؟؟

(مذكرات عنبه 8)جيزويت وكبده واشياء اخري

مذكراتي العزيزه :

انا واطيه وعارفه .. حقك عليا ادي راسك اهيه ابوسها ...

انا غبت كتييييييير اوي عليكي علي غير العاده .. بس واله مش من باب من لقي احبابه .. بس من باب اني في الفتره دي يا اما مشغوله اوي اني اكتب .. يامشغوله اوي اني اعمل حاجة اكتب عنها .. يامشغوه اوي في مشاكل كأباني ومش عارفه اكتب عنها ايه ولا ايه؟!

فسامحيني يامذكراتي العنبيه ...

ايه بقي اللي حصل في الفتره دي؟؟ انا قلت فوق .. طبعا المشاكل .. تنقسم في حياتي الي كذا نوع .. مشاكل في الشغل ..مشاكل مع ماما .. ومشاكل عاطفيه .. ومشاكل ماديه ..ومشاكل نفسيه

المشاكل مع ماما .. مش قد كده بحكم اني بكبر في السن وماما مربياني زياده عن اللزوم فهي عارفه اني مش هاتجوز عرفي ولا هارجعلها بحمل سفاح يوما ما وهو كل مايقلق امهات البنات في مصر .. علي اساس ان البنات لا بتضرب ولا بتشرب !! ماعلينا

غاية ما هنالك اني لما بروح متأخر شويه وفعلا بيكون بسبب المواصلات .. يعني مثلا من يومين قامت خناقه شنيعه لسه متصالحين منها النهارده لاني ... احم .. روحت بدري .!! اه والمصحف .. فانا اكيدد ماكنتش في الشغل لاني بتاخر في الشغل مع اني كنت في الشغل وروحت بدري عشان السكه .. بس نعمل ايييييييييييييه بقي ماما..

مشاكل الشغل قليله او معدومه الحمد لله  I heart my job جامد يعني.. والحمد لله .. وهذا يحل المشاكل الماديه كمان ...

يتبقي المشاكل النفسيه والعاطفيه والمشاكل النفسيه الناتجه عن المشاكل العاطفيه والمشاكل العاطفيه التي تسببت فيها المشاكل النفسيه ؟؟؟!!! ايه؟

المهم يعني اللي بالبلدي كده الجنان ... انا بتجنن عالواد وهو بيتجنن عليا ... انا لسه متضرره نفسيا من المعامله اللي كانت بيننا قبل كده او منه بمعني اصح ليا

... وهو مقدر ده للاسف .. فمش عارفه اخد منه لا حق ولا باطل وغالبا اليومين دول انا اللي بطلع غلطانه بس محدش يفتن بقي ..!! لا يتمرع وانا مش ناقصه ..

بتصرف زي الاطفال .. مع ان ده مش طبعي .. بس بعد الارهاق النفسي اللي اتعرضتله بسبب مشاكلنا القديمه اللي ما اتحلتش هي بس اتنست في غمرة الاعتقال و اتمسحت من المناقشه بمجرد خروجه ... الا اننا الان مش في عالم البوس في الرصافه .. احنا في العالم الحقيقي .. حيث ابن عمتك بيأسفنلي ...

وخالتك حاطة نقرها من نقري .. مامتك بتزيط علي فكره ... وماكنش المفروض تطلع اسرارنا برا ... وانتي اشتكيتي لاصحابي...مش واثقه فيا وقلة الثقه مش حلوه ... وانتا كنت بتكلم دي بتقولها ايه؟؟ وانتي بتهزري مع ده كده ليه ... وانا ما اسكنش في السادات .. انتا هاتتقمر ... انا عايزة ابقي جنب صاحبتي ..

الطبيعي يعني ..

بقالي مده معملتش اي نشاط .. يعني ماروحتش تمرين الباليه بقالي كذا مره ... بس النهارده حسب الاتفاق اللي تم بيني وبين شروق بنت خالة المحروس اللي في اعدادي اني اروح اذاكرلها شوية انجليزي والماني لحد ما يجيبوا مدرس   نزلت من بيتنا علي 4 وبعد التحرش والعراك اليومي وخلافه وصلت المنشيه وقابلته وبعد خناقه قصيرة لاني مخنوقه من التحرش ... ومن انه  ما استنانيش في المكان  المتفق عليه بالحرف ... وصلنا بيت الخال الساعه5 بالظبط...

اشتغلت شويه مع شروق ابنة خاله المدعوق اللي مطلع عيني ... وبعدين طانط مات خالته كانت عاملالنا اكله غريبه جدا في بيت يعني .. مكرونه بالكبده!! ولشده دهشتي عرفت السبب لما دوقتها ... كأني  بالظبط باكل في اكبر محل كشري في مصر ... تحفة لسه لحد دلوقتي نفسي انزل اركب واروحلها اقعد عالحله اجيب اخرها ... طبق واحد لا يكفي يا طانط فاطمه!!!

نزلنا وكالعاده اتخانقنا تاني ...بقي اسلوب حياه خلاص .. اتعوج عليا لاني كنت مزعلاه بشويه كلام قديم .. ولانه احم احم 5 قل اعوذ برب الفلق من شر ماخلق .. بيغير عليا J  يافرحتشي .. مع اننا كنا لسه ضاربين بعض بالجزم ... روحنا الجيزويت عشان كان فيه حفله لفريق نوبي اسمه هاي دام او السد العالي بيعزفوا اغاني نوبيه روعه ...

وهنا نأتي لفقره اجمل لحظات اليوم اللي بقيت بعملها دوما : ده اول نشاط ثقافي اقوم بيه من وقت انقطاعي عن دروس الباليه .. فدي نقطه ..

وكونك تشوفني واقفة في ظلام زحمة مسرح الجراج اللي في الجيزويت والمزيكا شغاله وهو واقف ورايا لافف دراعه علي رقبتي وايده علي كتفي ... وانا عماله اترقص يمين وشمال عالمزيكا النوبي الروعه واسقف مع الناس بعدين ابتسم ...لا يمكن بعدها تشك ان بتشهد احلي لحظات يومي ...

المهم ماطولناش كان اغنيه وهو اتخنق من الحر والناس الكتير خرجنا هو شرب سيجاره .. وانا اتخانقت معاه تاني _ماتستعجبشي ماتستغربشي_ لانه افسد عليا اللحظه !!

فهو بعد ما خلص قاللي ياللا ندخل تاني فانا صعب عليا صراحه ربنا فقلتله لا خلاص بلاش وبعدين الوقت اتاخر .. كانت لسه 8ونص بس كون النهارده الجمعه فانا بتعامل في البيت معامله سيندريللا .. لو اتأخرت عن 9 ماما هاتحولني انا شخصيا لبطيخة وقارعه كمان ...

فأثرت السلامه ووافقت انه يروحني ...علي مضض

الغريبه بقي اني فعلا اول مره اقطع حاله الانتخه دي النهارده ... يعني نزلت جمعه وانا مش من عاداتي اعمل كده .. روحت الجيزويت وانا بقالي زمن ماعتبتوش ... وتقريبا حجزت تذاكر لباليه بحيرة البجع بتاع سيد درويش يوم التلات او الاربع اللي جاي العرض يومين باذن الله ...

اول مره هاحضره انا حافظاه من المشاهدات لاني اتفرجت علي نسخ كتيره منه وعاجباني القصه فشخ !! بس هاتبقي باذن الله اول مره اشوف العرض حي قدامي ...

الخلاصه ايتها المذكرات العزيزه انها كانت ليله لطيفة مليئه باالباستا والكبده الحريفه.. والخناقات .. والجيزويت .. وسيد درويش ..

الليله كانت ببساطه علي طرازي المفضل من الليالي ....ليله حيه ...

سلام

(مذكرات عنبه 7) طعم الفرحة

(الخوف بقي بعد اللي حسين شافه يطلع يديني بالجزمة والصراحه هايبقي عنده حق هو مايعرفش اللي عملناه عشانه معلش .. هو كان فاكر انه لوحده وكمان هو مصاب بضلع مكسور من مجند ابن مره وسخة داس علي صدرة بالبياده وما اخدش اي علاج او رعايه طبيه فلو طلع مش طايق امي لانه فاكر اني ماسألتش عليه يبقي عنده حق الصراحه وماقدرش الومه ... بكره كله هايبان الخوف بقي لا اخد علي دماغي تفتكروا ايه؟؟؟)

دة كان المقطع النهائي في تدوينه امبارح والطبيعي اني اوفي بوعدي بما اني مش اخوان واحكي ...

الاول العيال ما جوش علي 11 ولا عالمنشيه استنينا من 9 ل3 وبعدين المأمور ابن المره الوسخة طلع بمنتهي التناكه لكم الناس اللي واقفة واعلن ان العربيات عطلت فهاينزلوا من قسم محرم بيه ..!!!

الكلام ده الساعه 3 حيث المواصلات من اي حته لاي حته حلم صعب المنال .. منال او سلوي حتي ..!!

المهم ناس راحت وناس فضلت لاتكون اشتغاله ... احنا (انا-مودي فتحي-نورهان احمد- والبت لو ) ركبنا تاكسي بعد مشقه وباقي الناس كل سلك طريقه .. انا كنت علي اعصابي .. ياتري هافضل احبه ولا هارفضه ؟ياتري هو هايحبني ويفهم اللي حصل ولا هايسلم ببرود ويمشي؟؟

لقينا تجمع ناس واحنا في التاكسي مودي كان راكب قدام ..

مودي: فرمل ياسطة ..حسين اهوه

قلبي: : بوم بوم بوم بوم بوم بوم!!

مودي نزل وانا فتحت الباب فضلت في التاكسي لثانيه مودي بصلي .. وشاورلي انه هايروح يسلم عليه انا قلت: روح روح

نزلت من التاكسي والموقف كالتالي:

الموبايل في ايد وJumper   الاحمر اللي اشتريتهوله النهارده في ايد.. لقيته بيحضن مودي وضهرة ليه كنت هاروح اسلم بس رجعت وقفت مكاني .. اتسمرت اقدم رجل واخر 10 علي حد قول نورهان..

حسين اتدور وشافني... جه عليا  وقف ثانيه كده وبصلي ... انا اخرت خطوتين لورا استعدادا للقلم علي وشي لاني واطيه من وجهه نظرة .!!

واذا بي افاجأ انه اترمي في حضني .!! الكلام ده فين يامؤمنين في الرصافه محرم بيه جنب القسم .!!

انا بقي وقع من ايدي الموبايل وكيسه الjumper الجديد وحضنته طبعا ينفع اسيبه يحضن وانا لأ؟؟؟

صراحة ربنا الواد عفقني ماحضنيش J  ..تقريبا والله اعلم بيحبني وكان مفتقدني فشخ؟؟

الحضن طول فالناس ابتدت تتفرج... الحضن مش بيخلص فاصحابنا ابتدوا يضحكوا علينا .. الحضن استمر اكتر ..فأهالي بقيه الناس عنيهم ابتدت تدمع ..

بس لما دخلنا في مرحلة البوس .. في الشارع في الرصافه-محرم بيه ..جنب القسم .. كان لازم الناس تيجي تفصل مابيننا .. كان فيه حبه ناس ابتدت تصورنا تقريبا ..!!

ياسر عبد القوي من بعيد: امسك ولاد الكلب دول ..؟!!

نور الزوربا: الله يخرب بيوتكم احنا في الشارع..

مودي : كفايه؟؟..احنا كده نحضرلهم كفاله فعل فاضح في الطريق العام .. وابصله ويحضضني ويبصلي ويبوسني ..

واخير بعد ما ياسر عبد القوي نجح في الفصل مابيننا لبسناه الjumper  وسلم عالباقيين .. الزياطين اللي مشوفتش خلقه حد فيهم ايام الفشخ في المحاكم ..

بعد الزيطة مودي اخده علي جنب اختصرله اللي حصل معايا في 20 يوم في 5 دقايق ..

ونور الزوربا بيقوللي : ايييييييييييييه ياما ؟؟ بالراحه اهدوا انتوا مش في باريس قلتله انا مالي هو اللي حضن والبوس دي كانت بوسه واحده..اخويه يعني !

نور: نعاااااااااااااااااام اخويه وبعدين انا عاددهم 4

.. نورهان كانت بتقوله وهو في حضني: كل اللي كان راعبها انك تبقي مش عارف ان فيه حد بيسال عليك وبيحاول يشوفك ويخرجك.. قالها: انا كنت حاسس والله ..!! انا عيطت طبعا ..

اخته جت... حضنته..نفس المشهد

 راحت شغلها وانا روحته البيت واخده اجازة بقي ... واتكلمنا كتيييييييييييير .. صعبان عليا كسرته هو واصحابه.. الشخص متغير تماما وما اظنش هايرجع زي الاول .. حسين كان عنده ضلع مكسور وبكرة هانروح المستشفي نعمل اشاعات وكشف وكده..  
كان بيهيس جامد جدا من كون محدش سأل عليه وتقريبا فقدوا الامل في انهم يخرجوا ... شخص مختلف تماما..
مش بيتكلم غير علي اللي حصل جوا اوفر اند اوفر اند اوفر.. انا عن نفسي هاسمع برضه اوفر اند اوفر اند اوفر .. الناس دي محتاجة دعم نفسي ابن كلب بعد مابيخرجوا ..

يوم الاربع ناس تانيه وقصص تانيه وقلوب تانيه مخلوعه من مكانها .. وناس مستنيه ارواحها تتردلها ..

جلسه من سيدي جابر للبرج مع العلم ان البرج اتعملتله دايره خاصه للعيال دي ... يعني احنا اشتريناهم بال70 الف بتوع امبارح.. الحمد لله ..

مكملين مع الناس الباقيه .. مكملين مع حسن مصطفي اللي جلسته برضه الاربع في البرج ..

النهارده يوم مرهق وسعيد زي امبارح بس اسعد بكتير طبعا .. يمكن ال5 دقايق الي اتقابلنا فيهم اسعد 5 دقايق في حياتي كلها .. حياتي بقالها معني .. معني مش حب وكده لأ .. لما الناس عنيها دمعت حطيت نفسي مكان اللي ساعدونا انا ومودي وباقي الولاد كويس (ماهينور_ياسر عبد القوي_شمعي اسعد) وغيرهم كتير ... عرفت ان فعلا اللي بيحصل في البلد دي ماينفعش يتسكت عليه باي حال من الاحوال ..لأنك لما تبقي مكاني ويبقي المحبوس ده قلبك انتا وحياتك انتا .. صدقني مش هاتقول ادوله فرصه.. نهدا شويه .. هما الناس دول عايزين ايه ؟!!

سلام

عذرا لو فيه اخطاء حروف او املاء .. انا مانمتش بقالي 73 ساعه :)

(مذكرات عنبه6) لولولولوي الف نهار ابيض

فاكرين واحد كده اسمه حسين؟؟ و14 واحد باقي معتقلين في الغربانيات ؟؟ اللي كنت بتكلم عنهم في اليوميات؟؟؟ وقارفاكوا حب ووجع قلب وحاجات كده ؟!!

اسككككككككككتوا مش دفعنالهم الكفالات وطالعين بكره الحد الساعه 11 الصبح باذن الله ؟!!

اه والله الحدوته طويله ملخصها ان ربنا كريم .. والعند لايورث غير النتيجه المطلوبه .. شكرا لدماغي العنديه انا فخورة بنفسي فشخ النهارده .. فعلا ومحدش يسألني ليه

العيال كلهم خارجين بكرة الوحش ان فيه 31 اسم تانيين راحو البرج من قهوة عبد الكريم اللي في سيدي جابر في احداث امبارح ... لابسين قضايا سلاح وبهدله وبرررررررررضه بالغش دفعه جديده ووجع قلب جديد بس فعلا ... مهما كبر الموضوع انا مقتنعه ان ربنا والعند والمشي ورا قلبك ممكن يحل اجعص حاجة تقعد شنبات في بيوتها ..

هانخرجهم باذن الله .. بس الاهم ان الناس فرحانه .. وانا طايره .. هاشوفهم بكرة ومش واحد ولا اتنين الفرحه جماعيه

كان المفرض ان المامور ابن الوسخة يجيبهم النهارده بس عشان اتنكنا علي اهله لما قال دول ممولين وهايطلعوا الكل .. جنون العظمه اكلوا في لامؤاخدة ..وقرر يجيبهم بكرا .!!!

اقول حاجة بقي وعسي ان تكرهوا شيئا وهو خير لكم انا متخيله العيال مبيتين ليله فل .. كفااااااااااااايه انهم زمانهم فاشخين النباطشية بتاعت الليل كلها وهايفضلوا فاشخينهم لبكره باذن الله ... لو كانوا جم النهارده كانوا هايجوا فجأة دلوقتي هما تلاقيهم زايطين علي ام السجن كله J

ربنا يجيبهم بالسلامه بكره .. ماهينور جت النهارده بعد ماطلعت انا لمأمور قسم المنشيه ابن المرة الشر***.. وفهمنا انهم جايين في ساعتها .. اصل الاستئناف كان اتأجل ليوم الاتنين .. واحنا في عرض ان العيال يباتوا في حضننا ساعه بدري .. مين يصبر ليوم الاتنين ؟؟حيث يمكن يحصل تجديد وتفضل الكفاله زي ماهي .. 70 الف جنيه اتلمت من الناس اتدفعت النهارده فديه ل14 واحد خاطفاهم الداخليه ... ولسه البقيه تأتي .

بكرة معادنا الساعه 11 قدام القسم ان شاء الله يجوا بالسلامه... انا مش مصدقة نفسي من اللي حصل النهارده بجد .. ربنا كريم .. الحمد لله .. الخوف بقي بعد اللي حسين شافه يطلع يديني بالجزمة والصراحه هايبقي عنده حق هو مايعرفش اللي عملناه عشانه معلش .. هو كان فاكر انه لوحده وكمان هو مصاب بضلع مكسور من مجند ابن مره وسخة داس علي صدرة بالبياده وما اخدش اي علاج او رعايه طبيه فلو طلع مش طايق امي لانه فاكر اني ماسألتش عليه يبقي عنده حق الصراحه وماقدرش الومه ... بكره كله هايبان الخوف بقي لا اخد علي دماغي تفتكروا ايه؟؟؟

ياللا احكيلكم بكرة عشان تعبانه جدا وعايزة انام .. ولو اني عارفة اني مش هاعرف اغمض عيني من السعاده :)

سلام

(مذكرات عنبه 5) الحمد لله!

مش هاكتب النهارده عن اغنيه ولا عن احداث ..الاشخاص اهم حاليا.

 امير اسعد خرج ! .. انا سعيده جدا.. ومكسوره جدا .. 

سعيده لان ببساطه (امير خرج).. "شمعي" اخو "امير اسعد" دفع الكفاله قبل الاستئناف وخرجه .. "امير" وصل وسط البلد عالعصر ..

اول ماشفناه طلعنا نجري عليه قدام قسم المنشية ... "امير" خرج وكان بيكلم الناس في تليفونات .. يمين وشمال كل الناس بتسلم عليه .. انا لقيت نفسي بحضنه وشمعي اخوه بيقوله :

خطيبه حسين يا امير .!

امير بصلي وفتح دراعاته وضحك: حسين ماكدبش يعني ..

رد جوز اخته : انتي حلوة اوي علي حسين خساره فيه يعني ...كلهم قعدوا يضحكوا ..

انا ماقدرتش غير اني اخد امير في حضني .. 10 ثواني بالظبط .. وماعرفتش اسيبه غير لما اخدت بالي انه مش حسين .!

كان المفروض حسين يبقي معاهم النهارده بس المحامي سبق وعمل استئناف ومبقاش ينفع ادفع الكفاله غير لما يتبت في الاستئناف دة اللي اتقاللي ..حسين تقريبا ماشافش مامته لما راحتله البرج هو لسه فاكر انهم مايعرفوش هوا فين ..!! لان امير بيقوللي اداله العنوان يقوللهم هو فين :(

امير : الو .. ايوه يا ماما انا خرجت.. ايوه ياماما انا واقف عالاسفلت اهوه (وبيضحك)

منظره وهو بيدب برجله الشمال علي اسفلت الشارع قدام القسم واحساسه بالحريه .. قتلني .. كان المفروض حسين كمان يبقي هنا دلوقتي...انا قلت كده لنفسي وانا بعيط.! كالعاده كلهم وامير من ضمن قعدوا يحايلو فيا .. ياجدعان زيطوا وسيبوكوا من الغم بتاعي .. امير خرج .!! انتوا بتقولوا ايه؟

احساس بالذنب ولا حبي ليه هو اللي قاتلني مش عارفه المهم اني بعد مرور حوالي 20 يوم علي اعتقالهم .. اول مرة احس اني مش يائسه ومش زعلانه ومش عاجزة ..

انا حسيت ان قلبي اتخلع من مكانه .. !!

لما امير ندهلي وقاللي هو كويس اوي وبيهزر وواقف علي رجليه ما اتكسرش كنت فخورة بيه جدا .. بس ماقدرتش امنع نفسي من حاجة غير لائقه علي الاطلاق انا شديت امير من هدومه وشميتها بنفس عميق .. قاللي ايه ده؟؟

بمنتهي البساطة رديت: ريحة الحبايب يا امير :)

الانسان اللي واقف قدامي ده كان معاه من اقل من ساعتين.!! بيني وبينه ساعتين زمن ومش عارفه اكسرهم لاني ببساطة مش من اقارب الدرجة الاولي ولا ليا واسطة في السجن !!

الكفاله تعسفيه وخساره الفلوس وهاتتخفض يوم السبت ...!! كل ده كلام قانوني رائع بس .. دبة رجل امير عالأرض قدامي.. وقولة انا في الشارع ياماما .. خلتني انسي كل ده ... طز في الحكومة والكفاله والفلوس .. طز في ال20 يوم اللي مش هايزودهم يومين كمان .. طز في كل لحظة هايقضوها معتقلين "ورجاله ابطال" .. طز في اي حاجة تمنع يوم واحد من حياتهم يضيع في زنزانه مقفوله عليهم زي الحيوانات ..

طز في اي حاجة تمنع انهم يعرفوا اننا طالع عين ابونا من يوم مااعتقلوا عشان نشوفهم حتي .. !!

مش هاحكي تفاصيل.. احاسيس بس ده اللي محتاجاه النهارده وده سبب اني عملت التدوينات دي اصلا..

1_محمد فتحي (مودي) العزيز "مودي" .. العزيز اوي "مودي" .. وجوده جنبي ضروري لعدة اسباب: بيحكيلي عن ايامهم سوا اللي ماكناش فيها انا وهو علي اتصال اوي .. بيحكيلي اني في عز ماكنت مطلعه عينه (انتقاما علي سوء معاملته ليا طبعا) كان مابيسلمش علي اي واحده حتي ولا بياخد باله ومش بيجيب غير سيرتي .. ومش بيقول غير انه بيعشقني ..!!!

مودي اللي لما بيقلده بيجيبه بالمللي وبيخلع قلبي بس بيخليني احس انه موجود...مودي اللي كلامي معاه يوميا عالتليفون او رؤياه في الشارع هو ونورهان اللي هايأتي ذكرها كمان شويه اكتر حاجة هونت عليا اخر 10 ايام..

قبل ما اقدر اوصله .. كنت متبهدله حرفيا .. كنت باخد صدمات الغاء الجلسات وعرضهم وانا في الطريق بطريقه كارثيه ...

مودي بيفكرني بحسين .. مودي بيحب حسين .. وانا مش قادره استغني عن مودي لاسباب عديده منها انه جدع .. وابن بلد .. بس اكتر سبب .. انه بيفكرني بيه ..بيكملي الجزء الناقص من الصورة اللي كان لايمكن اشوفه لولا الظرف ده .. بيكملي التصرفات اللي كنت بسال دايما عليها ياتري بيعمل ايه لما بتصرف معاه كده ؟؟

 واكتشفت الاجابه من مودي..ولا حاجة .. بيحبني .

سبب تاني عشان احب مودي انه عرفني علي نورهان .. بنت بلد مفيش منها اتنين معرفتنا لاتزيد عن اسبوعين وبتنزلي كل يوم المنشيه عند القسم او المحكمه او لما كنا في البرج عشان تبقي معايا.. هي ماشافتش حسين قبل كده ماتسمعش عنه غير من حكاياتي انا ومودي .. قالتلي النهارده: لما يطلع بالسلامه كلميني اجي اشوفه واسلم عليه .

نورهان مفيش بيني وبينها عشره .. بس فيه بيني وبينها ضيقه وشده .. في بيني وبينها كسرة قلب كانت بتداويها بحرفيه ..بيني وبينها جدعنه لما تطلع الفلوس وتدفع وتقوللي لما حسين يخرج ابقي اعزمينا .. ولما انا ادفع تحاول تردلي الفلوس .!!

نورهان بنت مفيش منها اتنين .. بنت منتهي الجدعنه .. فتنتني بطيبتها .. وعفويتها وطولة لسانها اللي زي العسل ..

عماد جاد واحمد ممدوح .. اتنين محامين زي الفل ونفسي ابقي محاميه بسببهم فقط لا غير .. انا قررت اني هارجع الجامعه تاني بس كطالبه حقوق السنه الجايه باذن الله .. عماد هو الوحي لده  .. واحمد ممدوح الشهير بدوحه احد اجدع محامي القطر السكندري.. هو الدافع والمحفز.

عماد اتفشخ معايا حرفيا وانا بقومه كل يوم تقريبا  الصبح علي تليفوني .. ايه حصل .. يكلمني ويقوللي .. يحكيلي لما  ما اعرفش اروح ويرجعني من الطريق لما العرض يتلغي عشان ما اروحش عالفاضي ..

احمد ممدوح : اتعرفت عليه علي تويتر زي عماد .. وزي عماد برضه ساعدني بدون سابق معرفه .. اعتمدت عليه زي اخ واكتر ولما اتشرفت بيه وجها لوجه .. زاد حبي ليه ..مليون درجة :)
لحد قبل ما يخلص النوت دي بثواني .. رن تليفوني ولقيت العزيز ممدوح بيكلمني لا لشيء غير انه يطمني عليهم في السجن ويطمنني انهم هايخرجوا .. وماتحسيش بالذنب .. وكلي هما بيكلوا كويس ومتغطيين ومش محتاجين لا بطاطين ولا اي حاجة ارحمي نفسك شويه انتي بنت حلوة وشكلك في المؤتمر كان تعبان جدا.. !!!!! فيه ناس كده
في حين اني بكلم عماد علي تويتر وبيحاول بمنطقيته الرائعه انه يهون برضه عليا.!!! حد شاف ناس كده؟؟؟ قبل كده؟؟ انا ماشفتش وماتخيلتش اني هاشوف !!

حياتي في الفترة الاخيرة بتتمحور حوالين الاربع شخصيات دول لمده 20 يوم هي الاصعب في حياتي لحد دلوقتي ... كانوا سندي المادي الوحيد .. ومكتفيه بيهم تماما .

ايماني بالله بيأتي من وجود ناس زيكم .. لو ربنا مش موجود كان لايمكن يبعتكم في طريقي ..وثقت فيكم ثقه عمياء وسبت نفسي تماما .. ولشدة دهشتي ماطلعتش غلطانه وما اتخذلتش ولا مره!.

انتم سببي الاعظم للايمان ...

ولو كنت مؤمنه بربنا قيراط قبل ما اقابلكم انا دلوقتي مؤمنه بيه مليون ... وبسبب انه حطكم في طريقي ,هافضل اصليله وادعي ان روحي تتردلي تاني ووانا واثقه انه هايعملها زي ما "كعبلني" فيكم.

ولانه حطكم في طريقي وصبرني علي رؤيتهم بيخرجوا واحد ورا التاني ووراني انه اكيد فيه حكمه من ده وغرض ... فالحمد لله .
سلام.

الاثبات العلمي لنظرية البطريق.. بحبكم ياولاد الايه :)

(مذكرات عنبه4) سيدي ياللالي !!!

الاربعاء: 6/2/2013 8:26 م

الاوله للنبي .. والتانيه لأيوب يالاللي..

والتالته قسمتي .. والرابعه المكتوب يالاللي..

والخامسه كنت غالب صبحت انا المغلوب ياللالي ..

النهارده كان العرض لمساجين قضيه احداث المنشيه في برج العرب كالعاده .. الصبح نزلت من البيت .. وروحت لاصدقاء المحابيس اللي اعرفهم و اللي كان المفترض انهم رايحين البرح علي 11 او 11 ونص بالكتير.

فوجئت لما وصلت انهم مستنين محمد عز واخته اسراء .. ييجوا من الابراهيميه للمحطة وهما لسه اساسا مانزلوش من البيت ؟! انا كان كل همي اني اروح البرج قبل عرضهم عشان ...احم .. اشوفهم !!كلهم يعني واطمن عليهم _مش كلهم يعني_والاكتر يعرفوا  اننا مش سايبينهم ..وخصوصا حسين بقي مش هاكدب .. لأن الباشا كان محفظ نمرة تليفوني للزنزانه كلها فمن الطبيعي اني كل مرة بروح متأخر عشان الشغل فالنهارده اجزت اصلا وطبقت صحيان من امبارح ...

فكوني ابقي واقفة منهاره في محطة مصر وهما مصرين يستنوا ؟؟ كان فوق احتمالي حاولت كذا مره امشي لكن مودي فتحي منعني بحجة انتي معايا .. يابنتي اهدي هانروح بدري باذن الله

انا: مامته في البرج من الساعه 7 يامودي كل اللي بتقولوه ده مايخصنيش؟؟ انا مش مشكلتي يطلع ولا لأ الطلوع اصلا من المنشيه والكفاله هاتتدفع في المنشيه ... انا عايزة اشووووووووفه عشان لو ماطلعش!!

هما بمنتهي البرود: انتي متعصبه ليه اهدي؟؟

المهم.. وصلنا متاخرين ... بعد العرض طبعا !!

وطلعت فوق الجبل قصدي اودعهم ياللالي

لقيتهم سافروا والريح متبعهم يالاللي

قابلت مامته كانت مفلوقه من العياط ... _اكيد يعني_ وقالتلي:  ماطلعوش يارودي.. انا شفته .. انتي جيتي متاخره..

انا سمعت الجمله الاخيره دي ولحد لحظات الي بكتب فيها الجمله كل ما افتكرها اعيط.. تاني !!

دي المشكله اني برضه روحت متاخره .. وده اللي محدش فيهم كان فاهمه لما اصابتني حالة الهستريا في برج العرب ..وقعدت اقول كلام كتير مش فاكرة منه كلمه غير اني كنت تقريبا بلوم نفسي اني روحت معاهم مش مع مامته... كان كافي جدا بالنسبه لي انه يعرف اني موجوده من اول يوم واني كنت بحاول اشوفه يوميا بس مكانش مسموحلي كان مهم بالنسبه ليه انه يعرف اني جمبه ....

 احساسي بالذنب اني المفترض الانسان الوحيد اللي هو افتكر نمرة تليفونه رقم رقم .. كان المفروض ابقي هناك من الفجر .. بس انا جيت متأخره L .

طبعا هما زعلوا من اللي قلته بس انا لو مكانهم هاحط في بقي جزمة واخرس خالص.. بس فوجئت باسراء شقيقة عز اللي افرج عنه امبارح بس.. بتقول لاحد اصدقائها :

هو حسين مطلع كفرانهم جوا وهي تطلع كفراننا برا ؟!!!

انا اتفاجئت ؟؟ انا كل اللي قلته اني اتأخرت واني عايزة اشوفه ومالحقتش وياريتني ماجيت معاهم؟!

فين الكفران اللي طلعته؟؟

رديت رد عبيط مش فاكراه بالتمام بس حاجة من قبيل: سوري يا اسراءاني طلعت كفرانكم بس انا كنت عايزة اشوفه مش اكتر!.

 عرفنا ان الخلاصه انهم اخدوا اخلاء سبيل ... بكفاله 5000 جنيه !!.. فشخ القضاء واجب علي فكره .. معظم الناس اللي باقيه بسطاء جدا مايقدروش يجمعوا المبلغ في اكثر احلامهم ضراوه.!!

وحسن مصطفي المناضل الجامد اوي علي فكره ..اساسا ما اتعرضش .. ونازل جلسة يوم 13 مهبب علي دماغهم فبراير باذن الله ..!! ربنا يسترها .

اندفسنا انا وماهينور ومامت حسين و3 محاميين شجعان (العزيز علي قلبي فشخ عماد جاد_ مؤمن دهب اللي اول مرة اتشرف بيه ومحمي تالت لم اتشرف باسمه الصراحه) داخل تومنايه عامله زي مكنة التفريخ اللي كنا بنبيض جواها علي حد قول عماد...

الكوميديا اني لسه مكتشفه حالا ان عماد اللي كنت قارفاه فيس وتويتر بقالي 5000 سنه كان قاعد ورايا !!

هو عرفني وانا بعيط ومسك ايدي وبتاع .. وطانط مامت حسين زغرتله اكيد J  وانا زي العبيطة لم اتعرف لوجهه العزيز افتكرته محامي اشفق عليا .!!.. اسفه ياعماد ..
كنت بحاول اكلمه وتليفوني ضرب فلاته فالشاشه ابيضت .. وهو اساسا كان قاعد ورايا وافتكرني تجنبت الكلام معاه عشان  _ حماتك كانت جمبك_ علي حد قوله من دقايق عالفيس بوك..!

ولا يفرق معانا ياريس وانتا بتقول ايه؟؟

كنت محتاجه اعرف انك عماد يا عماد ... L كنت محتاجة احس انك في ضهري كصديق عزيز ومحامي قدير .. ياللا الحمد لله كنت موجود بصورة ما.

المهم وصلنا المنشيه متأخرين وكان للاسف معظم الموظفين خلعوا ..بس المحامين الشجعان ومنهم العزيز اوي برضه احمد ممدوح _دوحه_  الجدع اوي ومن اخر الرجال المحترمين في مصر .. قدموا 

 زي طلب تخفيض كفاله وهايتبت فيه بالكتير سبت او حد وخلاص وينزل المبلغ لقدرة الناس...هأو

امانه ياريس الغليون ترجعهم ياللالي ..

اخد حبيبي في ايدي والباقي غرقهم ياللالي

انا هنا اتعرض لأزمه شديده هما هايجوا عالمنشيه تحت دفع الكفاله بكرة بالكتير باذن الله .. والاستئناف ياسبت يا حد بالكتير برضه ... مين يصبرني انا ؟؟

من الاخر مامته ماتعرفش تدبر المبلغ بالسرعه المطلوبه .. انا اعرف .. انا اوردي عملت حسابي علي اكتر كفاله اتدفعت في القضيه واخدت معايا الفين جنيه النهارده .. بس للاسف الكفاله طلعت ازيد .. الموقف كالتالي :

حسين هايبر اكتيف جدا_ماجمع الا  اما وفق ياروح امك_ ومطلع ميتين كل اللي جوا .. الشاويش كمثال بيسألهم بجهب انتوا بتوع البلاك بيري فرد حبيبي بألاطة لا حضرتك احنا بتوع الاي فون ؟!!

وهما نزلين من عربيه الترحيله شتم الظابط بأمه؟!!

هو اللي كان عاملهم حس .. اشطه؟؟ مطلع كفرانهم علي حد قول الاخت اسراء .. وهلما جرا ...

الفكرة دلوقتي هو معاه امير اسعد .. محمد البدري ....امير فيلسوف رهيب .. قله كده بس اهله اشطة هايدفعوا الكفاله ويخرجوه هواااااااا ...
حسين هاتتدفعله الكفاله انشالله بكرة الصبح قبل مايوصلو حتي.. محمد البدري عنده 18 سنه .. طيب جدا .. وغلبان اوي وعضمه نوعا ما طري . لو كل صحابه خرجوا ممكن يجرله حاجة حرفيا من الوحده ومش عارفه اهله يقدروا يدبروا المبلغ ولا لأ؟؟

الفكره اني عارفه ان سي زفت مش هايرضي يطلع ويسيبهم او يسيبه لوحده؟؟ اعمل انا ايه؟؟ وانا مال امي يعني بقي؟؟

 عماد بيقوللي نفس كلام ممدوح: ماتدفعيش ال5 الاف  انتي هبله؟؟ هما مزيطين وحبيبك ياختي لابس بنص كم في التلج ده ومزيط...

برضه مش فاهمه انا بقي المفروض اعمل ايه؟؟ وممكن التعريص يشتغل تاني ماتضمنش سيادتك؟!

بكره هاينزلوا القسم الزيارات بقي متاحة ومن حق اي حد يشوفهم يدخلهم اكل ..ميا.. سجاير ..هدوم... جن ازرق .. لو عرفت هاسأل هو عايز ايه ؟؟ تطلع ولا تفضل معاهم؟؟

انا عارفه الرد بس لازم اسال برضه J

مش عارفه هاشوفه ولا لا ولو شفته هايتصرف ازاي؟؟ ممكن يكون فاهم اني مش موجوده او سايباه فيقابلني وحش .. مش مهم .. اهو هانجرب والسلام ..

تفتكروا اعمل ايه غيركده يعني ؟؟

ياللا سلام .

(مذكرات عنبه 3)يوم طويــــــــــــــــــــــــــــــــــــــــــــــــــــــــــــــــــــــــل .. أوي!

الاربعاء: 6/2/2013 1:05 ص

يومياتي العزيزة :

اسكتي مش احنا وصلنا ليوم الاربع ؟؟ .. اخيرا شفت للاسبوع ده اربع ..

النهارده مكانش عندي شغل  كان عندي حاجتين اولهم مؤلم جدا .. وثانيهم مؤلم جدانين!

اولا: روحت  الابراهيميه شارع اللاجيتيه الساعه 5 ونص عشان كان المفترض فيه مؤتمر شبه صحفي لحوار الناس بتاعت المنشيه المعتقلين.. خلاصه المؤتمر ان فيه النهارده ناس تانيه خرجت منهم محمد عز .. .. ناس اتقبض عليهم وهما رايحين يركبوا عربيه من قدام القهوه ... بلد بنت ستين وسخة برخصه...

التفاصيل قطعت قلبي عيطت مرتين وانا بسمع نور زوربا وعز بيشرحوا نفس الكلام تقريبا ..

نور/عز: المعامله سيئه جدا... اضربنا في المدرعات .. اتسرقت موبايلاتنا وبعض اغراضنا الشخصيه.. اترحلنا علي برج العرب.. قلعونا بالسلبات وقعدنا عالبلاط لمده 14 ساعه في التلج ده... مقفول علينا باب مايتفتحش غير للأكل لمدة 14 يوم .. الاستحمام او النضافه وخلافه نوع من الطموح ... كان معانا واحد عيان بالقلب لما يتعب والناس تتوتر الشاويش يخش يشتمهم عشان يهدوا ... معامله غير ادمه ولا حيوانيه حتي.... كنا بنغني وحسن كان محبوس لوحده بس كان يهتف ويغني يسمع السجن كله ..

وغيره بس هي دي اهم التفاصيل اللي خلتني اعيط لمده ساعه كامله بلاتوقف ...

طبعا بعد اللي حصل ده ما حصل انا ماقدرتش لقيت كل اللي خارجين من السجن بدل ماحد يواسيهم بيواسوني انا .. معلش بكره حسين يطلع.. هما كويسين ..

انا: ازاي كويسين بعد الي قلتوه؟؟

هما: والله كان مطلع عنينا.. 

انا : بس هو لسه جوا ومعاه ناس تانيه كتير 17 واحد تانين؟؟ وبعدين انا اللي قاتلني يا نور ان محدش راح زاره .. انا مش مسموحلي لاني مش اقارب الدرجة الاولي .. حاولت كذاا مره ومانفعش .. هو حاسس انه لوحده

نور الزوربا: طب هما اهله فين صحيح الحاجة الوحيده اللي كانت مزعلاه ان محدش زاره

انا: اهله معتمدين علي محامي اصلا قايلهم معاد الجلسه غلط .. ومش مقتنعين بمرواحي للنيابه اجيب اذن زياره..

نور: ثانيه واحده ؟؟ انتي رضوي ؟؟

انا بهبل: اه ليه؟

نور بيكركع ضحك: انتي نمرتك ***************

انا بهبل تاني : اه ليه ؟

نور : ههههههههههههههه دة حسين قرفني بنمرتك  قعد يفتكرها بتاع يومين وحفظها للعنبر كله ههههههههههه كلم رضوي لما تخرج كلم رضوي !!

انا بهبل شديد: قول والمصحف؟؟

وهنا اعزائي المشاهدين اصل لجزئي المفضل من اليوم ...  انا بضحك ببلاهة وفاشخة بقي وعنيا محمره من الدموع .. مودي فتحي بيضحك وهو واخدني في حضنه.. ونور بيعيد علي مسامعي النمره ..ونورهان بتدعي عليه لأني وسختلها الjumper  بالمسكرة من العياط..

ماجاش في باله حاجة وهو جوا غير نمرة تليفوني؟؟ فعلا ؟؟ ما جاش في باله مرة اخته ؟؟ او مامته؟؟ او ابن عمه؟؟ او البقال اللي تحتهم حتي؟؟ قول والمصحف أاااااااااانور؟؟؟ أااااااااااانور؟

مش فاكرة حاجة غير اني كنت بضحك بعدها .. صعب عليا بس لما قالولي انهم حاولوا يوصلولي وتليفوني اللعين كان مقفول وان ابن الوسخة صاحبه التاني اللي كفايه عليه ابن وسخة لحد ما اشوفه قالهم مش هاقدر اوصل لحد من اهله؟؟ وانا ايه يابن ال*#@$$%#%:: زمالك يعني؟؟ ولا اسماعيلي؟؟

المهم خلص المؤتمر بمقابله العزيز احمد ممدوح المحامي وجها لوجه لاول مرة .. سألني علي حسين فكان الرد باين علي وشي .. قالي: بكرة باذن الله نروحلهم البرج نجيبهم ماتقلقيش :)

دي اول حاجة سيئه حصلت .. تاني حاجة اني روحت اعمل شعري !! اه طبعا عايزني اروح للواد منكوشه يوم مايطلع؟؟ معندكوش ذوق علي فكره !!  الفشيخ في الموضوع انا ساكنه في محرم بيه والكوافير جنب شغلي يعني في فيكتوريا وده لغير القاطنين بدير النحاس .... قصدي اسكندريه.. زي المسافه بين اسكندريه وتوشكي!!

ركبت مع مودي ونورهان .. هما نزلوا في فليمنج وانا كملت .. خلصت الساعه 11 بالليل وابتديت رحلة العوده.. ايه السيئ بقي في ده؟؟ ان جه في بالي فكرة .. طب لو ماطلعوش بكره؟؟؟ طب لو اتمنيت واستنين وروحت البرج بكرة وروحنا من غيرهم؟؟؟ طب لو طلعوا حبه وخلوا حبه ؟؟ زي حسن مصطفي اللي فاقدين امل خروجه ؟!!

بأذن الله لأ .. وباذن الله نخلص من الفران المسعوره _ الاخوان_ ومن قهر واحد زي  الظابط اللي قال لنور.. انتوا مش فاهمين ان البلد دي ماشيه بالكرباج لمدة 7000 سنه ...! مش هاتعرفوا تغيروها ...

ردي علي كل اللي حصل امبارح التلات  واللي ممكن يحصل النهارده الاربع.. جمله واحده قالها واحد من الحضور ردا علي نور: الكورباج ده هانشنقهم بيه .. واحب اضيف من عندي.. في ميدان عام وده مش هزار .

(مذكرات عنبه) 2

(الثلاثاء:5/فبراير/2013  3:10 فجرا)

مذكراتي العزيزة:

(لسبب ما غيرت اسمك لتالت مره.. ممكن عشان انا مترددة وبمليون رأي زي ما قلت قبل كده, ويمكن عشان هايبر اكتيف ومهببه علي عيني مخي مش بيطفي زي ما مودي بيقول ويمكن بس لمجرد ان الاسم القديم اكثر ارتباطا بيا .. كرضوي مش كمس رضوي وانا حاليا مس رضوي)

كمان المذكرات مذكراتنا والزنزانه انفراديتنا يعني محدش له عندنا حاجة.

بمناسبه الزنزانه بقي .. جه في بالي مليون مرة النهاردة _اللي هو امبارح الاتنين بحكم اني بكتب الساعه 3 الفجر يوم التلات _ ان الاسبوع ده بالذات مابيمشيش ... لسبب لا ادريه يوم الاربع اللي فات علي طول ده كان من 5 شهور مش من اسبوع زي مابيقولوا !!

 مستنيه يوم الاربع طبعا عشان الناس المحبوسه في البرج تخرج او مصر كلها تدخلهم لو ماخرجوش ..تهييس وش الصبح طبعا هو اللي بيتكلم مش انا فمحدش يدق.

 الغرض, ان انا كل يوم بحس ان بكرا الأربع وبعدين افتكر انه لأ مش هو .. مش عارفه اليوم ده هايعدي ازاي او هايحصل فيه ايه؟؟ والصراحة مش ناويه أشغل بالي .. المهم انه يطلع من الحبس وخلاص .. احم المهم انه يطلعوا يعني .. كلهم اكيد مش هو بس J

حالة القرف العامه عماله تزيد حوالينا في البلد النهاردة طنطا كان فيها لبش جامد جدا _ربنا يسترها عليك يادكتور احمد_ اهل السيد البدوي طفحوا شكلهم, welcome to the club ياشباب!.

اللي يوضح حالة القرف دي اوي بقي عندي عالاقل, إن فيه عامله عند ماما في المدرسه جت تنضف العمارة النهاردة ومعاها بنوتتها 11 سنه ! جايه تساعدها وناويه تخرجها من المدارس عشان البنت علي حد قولها "مالهاش في المدارس"!.

ده علي اساس انا اللي كان ليا ولا حد في مصر ليه ؟ التعليم في مصر نفسه مالهوش في المدارس, الخلاصه وصلت معاها لهدنه اني هاحاول اذاكرلها واساعدها شويه وبعدين نسيبلها هي الحكم

مامتها بتقوللي :

"دي منار تمسك أي شقه مهما كانت مكركبه, تخليها شقة عروسه تنضيف وترتيب وايه!!  بس مالهاش في العلام ..المدرسين مابيشرحوش .!! وبديها دروس وابوها شغال علي توكتوك بس هي مش حابه .!"

 مع العلم ان منار اكبر 4 اولاد للست دي اللي لشده صدمتي اكبر مني ب6 سنين فقط !

انا كان ردي لمنار: طيب طالما بتحبي التنضيف يامنار مش تبقي مهندسه ديكور احسن ولا تبقي خدامه؟

مامتها ردت وهي بتبصلها بترجي: "قوليلها والنبي ده احنا طافحين الدم علي علامها "

.. اتمني اني اشوف منار تاني الصراحه .. واعتقد انه هايحصل بأذن الله ..

في سياق أخر خااااااااالص _لاحظ سيادتك اني بكتب الساعه 3 الفجر وخلاص يعني بجيب زيت_ بعيد عن منار وتنضيف العمارة والتعليم وطنطا.

المحاضرات اللي كنت هاحاضرها النهاردة اتلغت فكان يوم فاكس بلا عمل !

فلما النور قطع الساعه 6 المغرب لمدة 3 ساعات كان طبيعي اني البس وانزل.. روحت فين؟؟ وسط البلد طبعا وانا ليا غيرها ملاذي من ايام الجامعه مع الشله الفاسده.. بس المره دي كنت لوحدي ..قلت اعدي علي مركز فيتنيس كده اسمه ريزو دانس وواضح من الاسم انهم اسمهم ريزو .. وبيعملوا دروس رقص! مش بقولكوا سياق تاني خالص؟!

روحت هناك المكان يدوخ بس لأنه مفيش يافطة, بس بمجرد انك تسأل في اول الشارع فين عمارة رقم 15 البوابين هايتبرعوا بسؤالك : "الجيم تقصد؟؟ .. بالنسبه لهم أي حاجة فيها حركة تبقي جيم.

بس المكان لما تطلعه ابعد مايكون عن الجيم, العمارة عالطراز الانجليزي القديم اللي محتل شوارع اسكندريه القديمه كلها من الشاطبي لبحري.. منتهي الجمال والرقي وسط القرف الكتير اللي بقي فيها!

المكان نفسه بقي لما تدخله خليه نحل فصل بيبدأ وتاني بيخلص أجانب علي مصريين .. شعر اشقر واحمر واسود ,ولاد بنات, ستات, بس لأ .. للي هايحاول يسأل لا لقيت فيه هاله صدقي ولا تامر هجرس .. ولا جنيفر لوبيز حتي, ماتيجي نرقص/ shall we dance   ستايل يعني .

 في الاستقبال شاب لطيف ملزق حبتين.. بس لطيف ..فكيته لما اتكلمت معاه بجدعنه ..عرف اني بنت بلد مش بنت باشا, المفاجأه بقي ان ده المكان الوحيد في اسكندريه اللي عنده فصول باليه للكبار ..المبتدئين ..اي والله يعني لو معندكش تاريخ رقص باليه قبل كده وسنك 60 ممكن تدخله اشطة!! شفت الانجاز ؟ انبهرت؟ طووويب!

اشتركت طبعا في الفصل المتقدم شويه لأني عندي خلفيه معقولة عن الباليه, #نيللي_كريم_ستايل :) 

عندهم جميع انواع الرقص لاتين وصالونات وكللللل حاجة ,..اللي يضحك اني وانا طالعه عالسلم كان تقريبا شغال فصل رقص شرقي والمزيكا كنت تصدح لحد الدور الاول, مزيكا شرقي شرقي, مزيكة "عوالم" من الاخر ..حاجه كده زي يانخلتين في العلالي مثلا!,  بس واضح انهم كانوا مستمتعين لانهم كانوا مش عايزين ينهوا الفصل. وهنا اذكر اغنية الريس عدويه : احب الناس الرايقه.

الاشتراك بقي هو قمة الصدمه تدفع 25 جنيه سنويا و10 جنيه لاي فصل رقص تحب تحضره ..؟؟؟

او 60 جنيه سنويا و250 كل شهر وتحضر اي كلاس عندهم ..والكلاسز كتييييييييييييير جدا وكلها ممتعه فشخ, دة كفايه مدير المركز الفني حكايه لوحده.. "monsieur "Lucian ... راجل كده يفكرك براقصي الباليه بتوع جوليارد او فرقة بوسطن .. هو رقص في فرنسا والمانيا احترافيا وكان بيدرب باليه في سيد درويش كمان .. مفهوم من الاسم طبعا انه فرنسي وهو اللي هايدربني باليه كمان !.. والعربي بتاعه مكسر بس شخصيه تحفه فعلا J

ليه هاروح بقي؟؟ والبلد والعه كده؟, والعيال مساجين ويمكن مايطلعوش يوم الاربع اللي انا مستنياه بقالي 6 شهور ده؟, ومنار ممكن تسيب المدرسه وماتبقاش مهندسه ديكور؟, والاخوان ممكن مايسيبوش مصر؟, واحنا ممكن مانعرفش نولع في المرشد علي طريقه باتيستا كما نصحت ماما.!

عشان ما اطقش... وما اهاجرش او أكتئب وأنتحر خصوصا إن انا ليا تاريخ حلو مع الإكتئاب والبروزاك والعلل دي ..

او ببساطة لأني حابه احس اني بني أدم تاني؟؟ زي ايام الطفوله مثلا او ان ليا حياة بعيد عن (الكاكا/ الخري) اللي عايشين فيه لحد وداننا دلوقتي!.

تلخيص اللي حصلي النهارده ان البلد فيها حاجه وسخة "اسمها الاخوان طبعا".. وانا رجعت أرقص باليه تاني! 

بس.

دة لوسيان وهو بيدرب البنات الصغنططين.. جاتكوا القرف ولاد ناس :(

يوم فل ( مذكرات عنبه)1

النهاردة بقي كان يوم مايعلم بيه غير اللي خلقه.. ابتديت اليوم في البيت وبعدين نزلت الشغل كأي مواطنه عامله تحترم نفسها ...

وطبعا كالعاده بما اني عايشه في مصر مارست حقي في التحرش الطبيعي بتاع كل يوم..

فيه بقي اكتشاف اكتشفته من كام يوم كده انهم بقوا بيعاكسوا البنات ويقولولهم (يا واد ياخول)!! وده لشدة دهشتي الحقيقة.
 ياللا ..اهي تسليه برضه بما ان الام بي ثري بتاعي باظ .. المهم بعد الكثير من العمل ويا واد ياخول.. كلمت محمد فتحي الشهير بمودي وده صاحب الولامؤاخذة (البوي فريند بتاعي) اللي محبوس من يوم 20/1/2013في الغربانيات ...السجن  اللي في برج العرب اقصد ... علي زمه قضية جنح غريبه المعالم كده لانهم اتمسكوا في مظاهرات المنشيه بتاعت محاكمه قتلة الثوار ..

المهم روحت قابلت مودي علي قهوة اسمها مش فاكراه.. قرب مسرح سيد درويش ولأني كان عندي شغل تاني الساعه 7 بالليل .. ماطولتش معاه في الكلام .. كان الحوار ان  فيه ناس من اللي كان مقبوض عليهم في نفس القضيه طلعوا النهارده وفيه كلام ان الباقيين هايطلعوا يوم الاربع اللي جاي واللي قاللي الكلام ده الاستاذ احمد ممدوح المحامي ..وقالهولي علي تويتر طبعا وانا ليا غيره ؟!!

مودي بقي في محاولات بائسه وبريئه كان بيحاول يطمنني انهم بخير ومزيطين وكده!! .. وكأن انا  المفروض اقتنع انك حتي لو محبوس في برج عاجي هاتبقي برضه حالتك تمام !! والنبي ارد عليه اقوله ايه؟؟ الناس بتتسحل عريانه في الشارع ودول في السجن ؟؟ يعني اقل واجب انهم يعدوا علي فرج !!
اهو كل السجن سجن ياسي مودي !!

انا كنت بعيط مش عارفه ليه ؟؟؟ ساعات بتمني انه يخرج لانه واحشني جدا برغم كل الخلافات والمشاكل اللي بيننا .. وساعات بحس اني خايفة انه يخرج لا يبقي رد فعله مشابه لحوارات محمد امام في عمارة يعقوبيان وهتكوا عرضي يامولانا وانا مش مستعد اكمل في علاقه وبلدي اولي بكدي والكلام اللي يشل ده...!!

انا مش بعمل كل ده عشان البلد الصراحة .. اه اصحابه يهمني انهم يطلعوا لانهم اصحابي انا كمان بس كوني في موقف اللي حد عزيز عليه مخطوف من الحكومه او مش معروف له  اول من اخر حاجة صعبه اوي..
بس حوار ان الكل طالعين يوم الاربع ده مش مطمني اوي .. اشمعني حبه يطلعوا النهارده والباقي يتأجلوا ليوم الاربع؟ مع انها نفس القضيه؟!

كنت بفكر النهارده بصوت عالي مع واحده صاحبتي في الحوار ده!! قالتلي برضه اطمني وكل شيئ بيحصل لسبب.. قعدت افتكر قبل مايتقبض عليه بيوم واخر مكالمه بيننا لما كنت مكفرة سيئات اللي جايبينه.. وشويه اضحك وشويه اعيط.. هستريا انثويه محضة يعني

.. فكنت بقولها انا هاقنع نفسي لما اشوفه اسلم عليه بالايد بس.. او احضنه بس.. او ابوسه بوسه اخويه بس .. او.........

قالتلي اييييييييييه ؟ وقعدت تضحك! تفتكروا ليه؟؟

الجدير بالذكر ان انا وهو .. علاقتنا حاجة كده زي توم وجيري .. هو يطلع عيني... وانا اطلع ميتينه .. وفي الاخر نرجع لبعض !! دي الخلاصه من الاخر.

المهم بعد ربع ساعه من محاولات مودي .....لقيت نفسي اتأخرت فشخ عالشغل علي الساعه 6 وربع فقررت اني احترم اكل عيشي وامشي حاسبت علي كوبايه كركديه رديئه ب5 جنيه كامله .. وطلعت اخدت تاكسي وروحت شغلي اديت المحاضرة اللي ماكانش فيه طالب منهم فيها بينطق ولااااااااااااااكأني بكلم نفسي ...

وانا مروحة بقي مع الانسه العزيزة سمر مديرتي في الشغل ورفيقة الشقا .. كنا ماشين في امانه الله طالعين محطة فيكتوريا ابو قير من ناحية الترام ... وكان فيه قطة صغنونه وبعيد عن السامعين حامل و"مقبقبه" جامد جدا يعني ...بتعدي السكة وانا سمر بنبصلها في هيااااام.. والله قطقوطااااااااااااااااااااااااااااه

 والاقيلك ياخويا موتوسيكل قام معدي بسرعه وقاسم القطة نصين..!!! انا اكاد اقسم اني سمعت طقطقه ضهرها وهو بيتكسر !!!

انا عمري في حياتي ماصرخت في الشارع الا النهارده اعصابي اساسا كانت علي شعرة ولما الموتوسيكل ماهداش.. والقطة قامت من تحت العجل وجريت الناحية التانيه افتكرت انها تمام وبخير ونجت بمعجزة...

 اتاريها اتقلبت علي ضهرها عالرصيف في ثواني وسلمت نمر L...

 انا وسمر فضلنا حوالي 10 دقايق كامله مش بننطق ولا بنتكلم .. مشهد يعبر بطريقه فجة عن اللي حاصل في البلد بنت ستين وسخة دي ...

محدش ليه قيمه زي القطط اللي بتتداس في الشوارع .. البلد كلها قضت نحبها في حادثة موتوسيكل سايقها واحد بدقن حاطط ديل الجلابيه في سنانه !!

سمر قالتلي اول ما اتكلمت تعالي نمشي علي جنب بدل مايدوسونا ويجروا احنا كمان !!

ماهو البلد دي بقي كل اللي فيها مايساويش..

.. ياللا.

بعد ماركبت الميكرويباص بقي .. كلمت مامت my boyfriend فقالتلي العجب العجاب تقريبا هي وكلت محامي جنايات عن القضيه والراجل ماصدق انهم طيبين فبيستعبط .. بيتكلم معاها عن قانون مش موجود اساسا في البلد وقايلها معاد جلسات غلط وتفسيرات قانونيه مش بتاعت قضايا جنح من اصله ...

الصراحة قفلي اليوم اكتر ماهو مقفول ...

الغرض :روحت البيت, واكلت بيض L لأنه الاكله المناسبه دلوقتي ..ومتوفر بكثره!!

مودي بقي كلمني عالفيس وخليته يقرا المقدمه اللي فاتت فقاللي هرتله بس حلوه استمري وقاللي كمان :

(بصى اكتبى الوقفة بكرة الساعة 12.30 قصاد المحكمة )

عشان الناس المحبوسه!!اديني كتبت اهوه. 
فلو اي حد قلبه جابه يكمل قرايه الهري ده لحد السطر اللي فات أديك عرفت فلو انتا في اسكندريه تعالي بكره الوقفة يمكن تحوق ويخرجوا الباقيين يوم الاربع اللي جاي 2/6 وارجع اتلهي في مشاكلي معاه وأرحم ابوكم من الهرتله الفاضيه دي!!
سلام.  

مايغركمش اشكالهم بس ولاد ناس والله .. الحاجة العدله الوحيدة اللي الداخليه عملتها انها حلقتلهم .. احمد يارب:)

فعلا حد قرا هري اليوميات ده؟؟

بما ان بعض الاصدقاء قروا المقدمه السخيفة اللي انا كتبتها وعجبتهم زاي ما اعرفش , فأنا قررت ان استمر في الموضوع بتاع اليوميات ده .. علي الاقل في الوقت الحالي.. اهو اديني بسلي نفسي .. وببيض عالناس اللي هايقروها .. واهو يبقي حاجة فاتحة شويه عشان الاحداث .. ..

واحد منهم ومدون كبير الا وهو كمال الدين....كمال الديننننننننننننن؟!!! ما عرفش الصراحة كمال الدين ايه؟؟ هابقي اسأله المهم انه اقترح عليا اغير العنوان يبقي يوميات عنبه او مذكرات عنبه تقريبا لانه اوقع بما ان اسمي الحركي في الشغل والفيس وبين صحابي عنبه .. لاسباب برضه هاشرحها يوما ما ان طال بي العمر..... التويته كانت تحديدا منه 

(( أقترح مذكرات عنبة.. وأعتقد إنه مناسب جدا، وكافى جدا))

فأنا الصراحة مترددة ومش عارفه هل يوميات/ مذكرات عنبه ؟؟ ام يوميات كرمبه السودا .. مع العلم ان اليوميات هيا اللي سودا مش كرنبه !! عشان السؤال ده جاني كتييييييير اوي .. 

فانا محتاره ولو الموضوع المهبب ده هايكمل اكيد هابقي محتاجة اعدي مرحله معضلة الاسم دي بسرعه ... وزي ماقلت في المقدمه التعبانه اياها انا مترددت لدرجة تثير الاعصاب ... بعمل الحاجة وعكسها .. واديني بتعلم ..

وده عيبي التاني هايبر اكتيف وبفكر في مليون حاجة في نفس اللحظة وتداعي الافكار عندي كارثي!!

تركيييييز تركييييييييييز اف بلرنمتمليتمتمتبلبم ..... ركزت اهوه.. الاسم .. الاسم .. الاسم

اختيار مابين اتنين كلاهما انا : الاول يوميات عنبه .. التاني يوميات كرمبه السودا ؟؟؟

وبما اني كتبت النهارده وكده كده مش هاعرف اركز اكتر من كده ....

فاكيد كل الناس بتتكلم عن موضوع حمادة اللي طلع مش حماده وانه خان وباع وكده؟؟ والنبي كفايه كلام في الحوار ده وسيبوا الراجل في حاله بتوا اتفسخت خطوبتها واتشتم من خلق الله كلهم كفايه عليه بلا جبان بلا نيله .. انا بنزل مظاهرات ومتنيله علي عيني بدافع عن حقوق الاناسين ...

ومن اول "افا "هارجع في كلامي فحت يعني...

 ففكوكوا من الحوار ده وفكروا معايا في اسم يمكن ربنا يجازيكوا خير ونقوم الصبح نلاقي الاخوان ولعوا ذاتيا هما والداخليه والقضاء ....

ايه ده هو انا مقلتش اني مش بحب الاخوان ؟؟ دي حدوته طويييييييييييله مش هاحكيها لان خلاصتها اني بكره ميتين ام الاخوان وكده .. يومياتي بقي وانا حرة ؟؟ 

يخربيت التداعي الحر ده .. فينه عم فرويد .. ولا كان يونج؟؟ ياللا ماعلينا !

المهم

فكروا معايا انهي اسم ؟؟

وبكرة زي دلوقتي هاقرر.. 

اه صحيح بمناسبة بكرة ...فيه وقفه  في المنشيه قدام المحكمه للناس اللي اتحبست يوم 20 ظلم وحوارات كده ابقوا تعالوا وهاتوا سندويتشاتكوا من الساعه 11ص

ياللا سلام بقي ..واكمل كلامي بكرة باذن الله 

واحده فاضيه !

قررت من فترة كده اني اكتب مذكراتي .. السبب .. فراغ طبعا ودي عايزة سؤال!

 انا مش مهتمه الصراحة انها تكون ادبيا ممتازة او ان حد يقراها .. بس الفكرة في انك تكتب يوميات او مذكرات انك يبقي عندك حاجتين
1-تراك للخط الللي ماشيه فيه حياتك,
2- تفريغ للحاجات السيئة اللي عايز تطهر نفسك منها .. والحاجات الحلوة اللي عايز تشاركها عشان تفضل فاكرها.

ليه مهم انك تقراها؟؟
مش مهم خالص طبعا انا قلت الكلام ده في الاول !!

 انا رضوي سلام ..انثي.. تقريبا يعني.. أو زي مابيقول دكتور رفعت اسماعيل .. لابأس بي علي الاطلاق .. مواليد 1988
  خريجة علم نفس وبدي محاضرات انجليزي .. كورسات يعني في معهد لغات شهير مش هاقول اسمه بالتأكيد لا لسبب غير اني ممكن اغير الكارير في اي لحظة! عادي يعني .

ورغم اختفاء الطبقة المتوسطة من مصر الا اني ادعو نفسي من تلك الطبقه  عايشه مع والدتي الي بفخر اني بقولها "ماما" مش مامي..
بابا متوفي وليه معايا حكايات طويله هابقي احكيها يوما ما لما يجي معادها ..

حياتي ساعات ممله لدرجة الوفاه الطبيعيه وساعات مليانه اكشن لدرجة السكته القلبيه.. بس الحاجة اللي دايما بعتبرها الميزة الاكبر فيا :اني مش بحكم علي اي حاجة غير لما اجربها . فبالتالي بجرب كتير.. في الاكل والهدوم والخروج والشغل والسياسه و......احم ...كل حاجة تقريبا :)

هاكتب فصحي هاكتب عامي حسب المود مش مهم خاالص.. ممكن اشتم ساعات لو استدعي الامر بس المهم اني هاكتب ..

كل واي حاجة بقي ..تيجي في دماغي او حصلت في حياتي ويبقي عندي شعور المشاركة المذكور اعلاه ده تجاهها.

المشكله الاولي اللي واجهتني : هاسمي المذكرات ايه؟؟  حيث اني شخص متردد لدرجة كارثيه.. فاكرين موضوع تغيير "الكارير" إياه؟؟

بس اذ ""فجأةًً"" افتكرت ان كان فيه برنامج اذاعي اخترعناه انا واخويا واحنا اطفال كانت بتقدمه كرمبه العروسه المفضله بتاعتي واللي كان عندي الطقم بتاعها الولد والبنت ... وكانت بتحكي فيه كوارث كوكب الكرانيب اللي هيا جايه منه .. حدوته تانيه برضه يطول شرحها وليها قاعده خاصه .. المهم ان البرنامج اسمه مناسب جدا لليوميات اللي قررت اكتبها ..

وهايكون عنوانها من هنا ورايح ( يوميات كرمبه السودا).

انا بعد  الاونلاين ميك اوفر لما كنت بجرب النضارات  :)