(مذكرات عنبه 5) الحمد لله!

مش هاكتب النهارده عن اغنيه ولا عن احداث ..الاشخاص اهم حاليا.

 امير اسعد خرج ! .. انا سعيده جدا.. ومكسوره جدا .. 

سعيده لان ببساطه (امير خرج).. "شمعي" اخو "امير اسعد" دفع الكفاله قبل الاستئناف وخرجه .. "امير" وصل وسط البلد عالعصر ..

اول ماشفناه طلعنا نجري عليه قدام قسم المنشية ... "امير" خرج وكان بيكلم الناس في تليفونات .. يمين وشمال كل الناس بتسلم عليه .. انا لقيت نفسي بحضنه وشمعي اخوه بيقوله :

خطيبه حسين يا امير .!

امير بصلي وفتح دراعاته وضحك: حسين ماكدبش يعني ..

رد جوز اخته : انتي حلوة اوي علي حسين خساره فيه يعني ...كلهم قعدوا يضحكوا ..

انا ماقدرتش غير اني اخد امير في حضني .. 10 ثواني بالظبط .. وماعرفتش اسيبه غير لما اخدت بالي انه مش حسين .!

كان المفروض حسين يبقي معاهم النهارده بس المحامي سبق وعمل استئناف ومبقاش ينفع ادفع الكفاله غير لما يتبت في الاستئناف دة اللي اتقاللي ..حسين تقريبا ماشافش مامته لما راحتله البرج هو لسه فاكر انهم مايعرفوش هوا فين ..!! لان امير بيقوللي اداله العنوان يقوللهم هو فين :(

امير : الو .. ايوه يا ماما انا خرجت.. ايوه ياماما انا واقف عالاسفلت اهوه (وبيضحك)

منظره وهو بيدب برجله الشمال علي اسفلت الشارع قدام القسم واحساسه بالحريه .. قتلني .. كان المفروض حسين كمان يبقي هنا دلوقتي...انا قلت كده لنفسي وانا بعيط.! كالعاده كلهم وامير من ضمن قعدوا يحايلو فيا .. ياجدعان زيطوا وسيبوكوا من الغم بتاعي .. امير خرج .!! انتوا بتقولوا ايه؟

احساس بالذنب ولا حبي ليه هو اللي قاتلني مش عارفه المهم اني بعد مرور حوالي 20 يوم علي اعتقالهم .. اول مرة احس اني مش يائسه ومش زعلانه ومش عاجزة ..

انا حسيت ان قلبي اتخلع من مكانه .. !!

لما امير ندهلي وقاللي هو كويس اوي وبيهزر وواقف علي رجليه ما اتكسرش كنت فخورة بيه جدا .. بس ماقدرتش امنع نفسي من حاجة غير لائقه علي الاطلاق انا شديت امير من هدومه وشميتها بنفس عميق .. قاللي ايه ده؟؟

بمنتهي البساطة رديت: ريحة الحبايب يا امير :)

الانسان اللي واقف قدامي ده كان معاه من اقل من ساعتين.!! بيني وبينه ساعتين زمن ومش عارفه اكسرهم لاني ببساطة مش من اقارب الدرجة الاولي ولا ليا واسطة في السجن !!

الكفاله تعسفيه وخساره الفلوس وهاتتخفض يوم السبت ...!! كل ده كلام قانوني رائع بس .. دبة رجل امير عالأرض قدامي.. وقولة انا في الشارع ياماما .. خلتني انسي كل ده ... طز في الحكومة والكفاله والفلوس .. طز في ال20 يوم اللي مش هايزودهم يومين كمان .. طز في كل لحظة هايقضوها معتقلين "ورجاله ابطال" .. طز في اي حاجة تمنع يوم واحد من حياتهم يضيع في زنزانه مقفوله عليهم زي الحيوانات ..

طز في اي حاجة تمنع انهم يعرفوا اننا طالع عين ابونا من يوم مااعتقلوا عشان نشوفهم حتي .. !!

مش هاحكي تفاصيل.. احاسيس بس ده اللي محتاجاه النهارده وده سبب اني عملت التدوينات دي اصلا..

1_محمد فتحي (مودي) العزيز "مودي" .. العزيز اوي "مودي" .. وجوده جنبي ضروري لعدة اسباب: بيحكيلي عن ايامهم سوا اللي ماكناش فيها انا وهو علي اتصال اوي .. بيحكيلي اني في عز ماكنت مطلعه عينه (انتقاما علي سوء معاملته ليا طبعا) كان مابيسلمش علي اي واحده حتي ولا بياخد باله ومش بيجيب غير سيرتي .. ومش بيقول غير انه بيعشقني ..!!!

مودي اللي لما بيقلده بيجيبه بالمللي وبيخلع قلبي بس بيخليني احس انه موجود...مودي اللي كلامي معاه يوميا عالتليفون او رؤياه في الشارع هو ونورهان اللي هايأتي ذكرها كمان شويه اكتر حاجة هونت عليا اخر 10 ايام..

قبل ما اقدر اوصله .. كنت متبهدله حرفيا .. كنت باخد صدمات الغاء الجلسات وعرضهم وانا في الطريق بطريقه كارثيه ...

مودي بيفكرني بحسين .. مودي بيحب حسين .. وانا مش قادره استغني عن مودي لاسباب عديده منها انه جدع .. وابن بلد .. بس اكتر سبب .. انه بيفكرني بيه ..بيكملي الجزء الناقص من الصورة اللي كان لايمكن اشوفه لولا الظرف ده .. بيكملي التصرفات اللي كنت بسال دايما عليها ياتري بيعمل ايه لما بتصرف معاه كده ؟؟

 واكتشفت الاجابه من مودي..ولا حاجة .. بيحبني .

سبب تاني عشان احب مودي انه عرفني علي نورهان .. بنت بلد مفيش منها اتنين معرفتنا لاتزيد عن اسبوعين وبتنزلي كل يوم المنشيه عند القسم او المحكمه او لما كنا في البرج عشان تبقي معايا.. هي ماشافتش حسين قبل كده ماتسمعش عنه غير من حكاياتي انا ومودي .. قالتلي النهارده: لما يطلع بالسلامه كلميني اجي اشوفه واسلم عليه .

نورهان مفيش بيني وبينها عشره .. بس فيه بيني وبينها ضيقه وشده .. في بيني وبينها كسرة قلب كانت بتداويها بحرفيه ..بيني وبينها جدعنه لما تطلع الفلوس وتدفع وتقوللي لما حسين يخرج ابقي اعزمينا .. ولما انا ادفع تحاول تردلي الفلوس .!!

نورهان بنت مفيش منها اتنين .. بنت منتهي الجدعنه .. فتنتني بطيبتها .. وعفويتها وطولة لسانها اللي زي العسل ..

عماد جاد واحمد ممدوح .. اتنين محامين زي الفل ونفسي ابقي محاميه بسببهم فقط لا غير .. انا قررت اني هارجع الجامعه تاني بس كطالبه حقوق السنه الجايه باذن الله .. عماد هو الوحي لده  .. واحمد ممدوح الشهير بدوحه احد اجدع محامي القطر السكندري.. هو الدافع والمحفز.

عماد اتفشخ معايا حرفيا وانا بقومه كل يوم تقريبا  الصبح علي تليفوني .. ايه حصل .. يكلمني ويقوللي .. يحكيلي لما  ما اعرفش اروح ويرجعني من الطريق لما العرض يتلغي عشان ما اروحش عالفاضي ..

احمد ممدوح : اتعرفت عليه علي تويتر زي عماد .. وزي عماد برضه ساعدني بدون سابق معرفه .. اعتمدت عليه زي اخ واكتر ولما اتشرفت بيه وجها لوجه .. زاد حبي ليه ..مليون درجة :)
لحد قبل ما يخلص النوت دي بثواني .. رن تليفوني ولقيت العزيز ممدوح بيكلمني لا لشيء غير انه يطمني عليهم في السجن ويطمنني انهم هايخرجوا .. وماتحسيش بالذنب .. وكلي هما بيكلوا كويس ومتغطيين ومش محتاجين لا بطاطين ولا اي حاجة ارحمي نفسك شويه انتي بنت حلوة وشكلك في المؤتمر كان تعبان جدا.. !!!!! فيه ناس كده
في حين اني بكلم عماد علي تويتر وبيحاول بمنطقيته الرائعه انه يهون برضه عليا.!!! حد شاف ناس كده؟؟؟ قبل كده؟؟ انا ماشفتش وماتخيلتش اني هاشوف !!

حياتي في الفترة الاخيرة بتتمحور حوالين الاربع شخصيات دول لمده 20 يوم هي الاصعب في حياتي لحد دلوقتي ... كانوا سندي المادي الوحيد .. ومكتفيه بيهم تماما .

ايماني بالله بيأتي من وجود ناس زيكم .. لو ربنا مش موجود كان لايمكن يبعتكم في طريقي ..وثقت فيكم ثقه عمياء وسبت نفسي تماما .. ولشدة دهشتي ماطلعتش غلطانه وما اتخذلتش ولا مره!.

انتم سببي الاعظم للايمان ...

ولو كنت مؤمنه بربنا قيراط قبل ما اقابلكم انا دلوقتي مؤمنه بيه مليون ... وبسبب انه حطكم في طريقي ,هافضل اصليله وادعي ان روحي تتردلي تاني ووانا واثقه انه هايعملها زي ما "كعبلني" فيكم.

ولانه حطكم في طريقي وصبرني علي رؤيتهم بيخرجوا واحد ورا التاني ووراني انه اكيد فيه حكمه من ده وغرض ... فالحمد لله .
سلام.

الاثبات العلمي لنظرية البطريق.. بحبكم ياولاد الايه :)