انا كل ما ادور علي راجل محترم الاقي العبارة دي في وشي... الرجاله راحوا في 73 ؟؟؟
انا لقيتها شبه جملتي اوي اللي بقول فيها ان الرجاله راحوا في الوبا علي غرار الاخت العفيفة هنادي... اللي هي اساسا ماراحتش في الوبا ولا نيلة .. دي راحت من ال.. احم العك ولا مؤاخذة..
فقلت اسأل اصحاب العلم والتجربة يمكن حد يعرف يفند النقطة دي ويدلني علي المكان اللي مخبيين فيه الرجاله ..ده لو كانوا لسه ما اتعرضوش للانقراض اصلا .. واتمني من كل قلبي نلاقي رجاله ولو حتي من مصابين الحرب .. اهو ينفعوا برضوا لحد ماربنا يفرجها علي البلد دي بشوية رجالة ناجين من الوبا و من ال..... الجيش قصدي التجنيد يعني بتاع 73محدش يفهم غلط والنبي.. انا جتتي مش خالصة ومااستحملش محاكمات عسكرية ولا مدنية حتي...انا عن نفسي مش عارفة الاجابة وماما مصممة علي ان الرجاله في مكان غامض من قبل 73 اصلا بزمن يعني نظرية 73 بالنسبة لها نظرية تفائليه.
الصراحة انا كنت دايما بقول ان نساء عائلتنا مصابات بلعنة من نوع نادر اسمها ولامؤاخذة "الرجاله النص كم" اذا اصطلحنا علي تسميتهم برجاله...
يعني علي غرار لعنة كينيدي اللي ظبطت العيلة بحالها ولو ماتعرفش لعنة كينيدي "ماتقرفنيش" و جوجل عليها عشان انا مش رايقة احكي الصراحة....
بس بعد مدة متوسطة الطول والعرض وشلحة من تجارب شخصية وسلخة من تجارب الاخرين و"بردخ" من اللي بيحصل في البلد وقراءة متفحصة لكتب الفلسفة والمنطق بتاعت ثانوي وجامعة وصلت "لكونكلوجن" يعني نتيجة الا وهو ان الرجاله اختفوا من الوجود في حادث غامض وسابوا الدنيا تهيص الا من نماذج ._ يعني يحسب لها شرف المحاولة _ اذكر منها علي سبيل المثال لا الحصر كابتن احمد الشحات اللي تسلق المبني السفارة الاسرائيليه عشان ينزل العلم ... ولو اني معترضة طبعا علي مبدأ ان يكون دة هدفنا من الاعتصام امام السفارة ... انزال العلم...بجد ماستغربتش من كون مفيش حد اعترضة من السفارة ...كنت متأكدة من دة العاملون بالسفارة .. والحكومة اللي وراهم في تل ابيب اذكي بكتير من انهم يعملوا كدة يعني .. من باب: سيبهم يفرغوا الكبت يا عزرا ياخويا ... كدة يعني لو مانزلناش العلم كنا هانزل حاجة تانية وماكانتش هاتبقي قماش بقي من الاخر.....
بس الحركة عجبتني كونة مالوش لا في الطور ولا في الطحين .. يعني العمليه كلها وجدان جمعي... موروثات ان العلم الاسرائيلي دة عامل زي ماتقوم من النوم الصبح علي برص ماشي علي مناخيرك مثلا ...لا شعوريا هاتقوم تنفض نفسك ويمكن تضرب مناخيرك وانت مش حاسس .
المشكله ان الرجاله انحصر حضورهم في مواقف مش في شخصيات .. يعني مثلا فين الاقي راجل ينزل بدل العلم اتفاقية تصدير الغاز ..او بلاش يبعت حتي باتنين جنية عيش للمجاعة في الصومال ..ولابلاش سيرة افريقيا بتعفرت الناس .. يقولوا احنا مااالنا ؟؟؟ مش نخلص من مصايبنا الاول... ثم ان كمان الصومال مش داخلة في اتفاقية الميه ..نتعب نفسنا ليه بقي.. اهو لو فيها راجل كان عرف هانتعب نفسنا ليه..
القصد ..مثلا لو فيه رجاله في البلد كان معبر رفح اللي بينيمني متنكدة يوميا دة اتفتح او اتوارب نص فتحة ...او اتعمل فيه خرم من باب التهوية حتي
لو فيها راجل ماكانش يطلع لنا واحد يقول عايزين نبني البلد الانتخابات والاستقرار ..استقرار ايه و عمل ايه بس المصالح مسوسة والشركات متخصخصة والمشاريع متوقفة
لو كان فيها راجل ماكانش عمال كابوا اللي وقفوا في عز الشمس يومين ورا بعض في عرض طريق ابوقير امام قسم باب شرقي عدل
وتصدقوا والنعمة ماحد تف في وشهم ولا قفاهم حتي...
الله يرحم الرجاله ...الفاتحة علي روحهم وروحنا من بعدهم.
ليست هناك تعليقات:
إرسال تعليق